Afweni Bambi Ukusanga Inshila Iitwala ku Mweo wa Muyayaya
1 Nangula imipepele yonse itila ilatungulula bwino abantu ku kubombela Lesa, ifisambilisho basambilisha fyalipusana. “Kasesema” Yesu tasambilishe ukuti imipepele yonse yaba fye ni nshila shapusana ishitwala kwi pusukilo. (Yoh. 7:40; Mat. 7:13, 14) Nangu ca kuti alishibe ukuti bamo bali no ‘kulamoneka kwati baliipeelesha kuli bukapepa,’ Yesu alicetekele ukuti bambi baali no kusanga ukupepa kwa cine.—2 Tim. 3:5; Yoh. 4:23.
2 Bushe bambi kuti basambilila shani icine pali Lesa no kumupepa mu nshila asuminisha? Ukupusana kwa mipepele kuti kwapikululwa mu mutende nga basumina ukuumfwila intulo ya maka iilanda icine pali Kabumba. Iyo ntulo ni Baibolo. (Yoh. 17:17) Nangula abengi bapepa fye ukwalepepa abafyashi babo nelyo ukupepa kwi calici lyaba uko bekala, abalanda kuti ‘bapalama kuli Lesa’ nga ca kuti fye bafwailisha mu Malembo pa lwabo no kubomfya ifyo basambililamo. Nga bacite fyo balakwata ubukose bukabilwa ku kuleka imyendele yonse iifulwisha Lesa.—Yako. 4:8.
3 Broshuwa atila Bushe Mwalisanga Inshila Iitwala ku Mweo wa Muyayaya? alabebeta mu nshila ya mucinshi ifisumino fyaseeka ne fishilano. Nga balinganye fi ku Cebo ca kwa Lesa, aba mitima ya bufumacumi bakakoshiwa ukuleka imipepele ya bufi yonse ukwabula ukusakamana ifingalanda aba mu bwikashi na balupwa.—Mat. 10:36; 2 Kor. 6:17, 18.
4 Amasambililo ya kubalilapo yabili muli uyu broshuwa yalanda pa milandu isuma iya kucetekela Baibolo no kuimona ukuti e ca kupiminako ukupepa kwa cine. Amasambililo 3, 4 na 5 yabebeta ifyo Amalembo yasosa pa lwa bwikalo bwa mipashi, pa bafwa na pa kupupe mipashi. Amasambililo yashala yaafwa abalefwaya ukwishiba ukupepa kwasuminishiwa no kubacincisha ukucita ifyo balesambilila. Ifilangililo fyayanguka ukuumfwa ifyashimpwa pa fintu ifyo abantu baishiba, ifyo babelesha, filangilila sana ukuti ifilelandwapo fya mano. Ifyacitikila abantu abalekele ifintu fyabipa, filanga abantu ukuti Yehova akaafwa abafwaya ukucita icalungama no kutaluka ku calubana.—Fil. 4:6; Yako. 4:7.
5 Abantu ba mu nko shonse baleankula ku bwite bwa kuti, “ingileni pa mpongolo ya kamfyemfye” kabili bale-enda mu nshila iitwala ku mweo wa muyayaya. Twalikwata imilandu ya kwenekela ukuti mu butumikishi bwesu mukafume fisuma no kutetekela ukuti Icebo ca kwa Lesa calikwata amaka ya kwalula abantu. Natulange bambi mu fyo tusosa na ku myendele yesu ukuti ca mano ukuba mu kupepa kwa cine, pa kuti na bo bakeseipakisha amapaalo ya kwa Yehova umuyayaya!—Mat. 7:13, 14; 2 Kor. 10:4, 5; Amalu. 37:29.