Pashanyeni Ubupingushi bwa kwa Yehova
1 “Yehova atemwo bupingushi.” (Amalu. 37:28) E ico, nangu Lesa atila cino calo cabipa cikonaulwa, ateyanya ukuti abantu basokwe intanshi. (Marko 13:10) Ukusoka kuti kwalenga abantu ukulapila no kupusuka. (2 Pet. 3:9) Bushe tulefwaya ukupashanya ubupingushi bwa kwa Yehova? Bushe ukumanama no kucula kwa bantunse kulatulenga ukweba bambi isubilo lya Bufumu? (Amapi. 3:27) Ukutemwa ubupingushi kukatulenga ukubombesha ukubila imbila nsuma.
2 Mwiba na Kapaatulula Ilyo Muleshimikila: Ilyo tulebila ukufwaya kwa kwa Lesa kuli bonse ukwabula akapaatulula, ninshi ‘tulecito bupingushi.’ (Mika 6:8) Tatufwile ukuba no musango abantunse bashapwililika bakwata uwa kupingula bambi pa kumona fye ifyo balemoneka. (Yako. 2:1-4, 9) Yehova ‘afwaya ukuti abantu ba misango yonse bakapusuke no kufika ku kwishiba bwino bwino icine.’ (1 Tim. 2:4) Icebo ca kwa Lesa icabamo icine kuti calenga abantu ukwalula imicitile yabo. (Heb. 4:12) Ukumfwikisha ici cishinka kuti kwatulenga ukulanda na bantu ukwabula umwenso, nangu fye ni balya abakeene ukukutika pa kubala.
3 Nkashi umo uubomba mwi shitolo aletiina ifyalemoneka umuntu umo uwaleisa lyonse ku kushita mwi shitolo. Awe pa nshita yalinga, aeseshe ukumushimikila pali Paradise Lesa alaya. Uyu mwaume atile tasumine mu nshimi, talefwaya ukuumfwa ku fyo bambi balelanda kabili alenwa imiti ikola. Lelo nkashi yesu tanenwike. Bushiku bumo aipwishe nkashi ifyo aletontonkanya pa mushishi wakwe uutali. Nkashi amulondolwelele ifyo Baibolo ilanda pa mushishi. (1 Kor. 11:14) Apapile nga nshi ilyo uyu mwaume abwelele ubushiku bwakonkelepo ninshi nabeya umwefu no mushishi! Alombele ukumusambilisha Baibolo, kabili munyinefwe atendeke ukumusambilisha, kabili uyu mwaume alilundulwike asuka aipeela no kubatishiwa. Nge fyo cali kuli uyu mwaume, abengi ababombela Yehova leelo balatasha ukuti ababashimikile pa Bufumu tabali na kapatulula kabili bali no mukoosha.
4 Nomba line Yehova akafumya ububifi mwi sonde lyonse. (2 Pet. 3:10, 13) Muli iyi nshita inono isheleko, shi natupashanye ubupingushi bwa kwa Yehova ilyo tulepeela abantu bonse ishuko lya kupusuka ukonaulwa kwa calo cibifi ica kwa Satana ukupaleme.—1 Yohane 2:17.