Ukutantika Ukulongana Kwa Mulimo

Umulungu wa Kutampa June 13

Ulwimbo 198

10 min: Ukubilisha kwa pa mwenu. Ukubilisha kwasobolwamo mu Ubutumikishi Bwesu Ubwa Bufumu. Bomfyeni ifyebo fili pe bula 8 (nga nafilinga mu cifulo mushimikila) mucite icilangililo pa fya kushalika Ulupungu lwa kwa Kalinda ulwa June 15 na Loleni! uwa Apr.–Jun. Kuti mwalangilila nangu fimbi ificitika. Mu cilangililo cimo na cimo, langilileni ifya kushalika magazini mu lyashi fye.

15 min: Afweni Bambi Ukuba Bakasabankanya Bashabatishiwa. Ilyashi no kulanshanya ne bumba, ukulandwa na eluda, ukufuma mu citabo ca Abaiteyanya Ukucita Ukufwaya kwa kwa Yehova, pa mabula 79-81. Landeni pa fyo ciba pa kuti cishibikwe ukuti ukulingana ne fyalanda Amalembo, umusambi wa Baibolo nalinga ukutendeka ukushimikila pamo ne cilonganino. Imilungu ibili iileisa tukalanda pa fyo twingasambilisha abasambi ba Baibolo abafikilepo ukuba bakasabankanya bashabatishiwa ukutendeka ukushimikila ku ng’anda ne ng’anda.

20 min: “Ukushimikila Kulatwafwa Ukushipikisha.”a Ebeni ibumba ukulanda na pa malembo nga kuli nshita.

Ulwimbo 149 ne pepo lya kusondwelela.

Umulungu wa Kutampa June 20

Ulwimbo 206

10 min: Ukubilisha kwa pa mwenu. Pitulukeni mu fishinka fikalamba ifyali mu Ubutumikishi Bwesu Ubwa Bufumu ubwa mu July 2003, pe bula 8. Londololeni ifyo bakasabankanya bengapoka impapulo sha mu ndimi shimbi. Landeni pa fyo ifi fyebo fingabomba mu cifulo mushimikila. Nga mulefwaya impapulo sha mu ndimi shimbi, lembesheni ku mubomfi wa fitabo nangu fye lupapulo lumo mulefwaya pa kutila shikese bwangu.

15 min: Ukukabila kwa pa mwenu.

20 min: “Ukutungulula Amasambililo ya Baibolo Ayalunduluka—Ulubali 10.”b Citeni icilangililo pa fya kupituluka mu fya kuyalanda mu butumikishi. Ilyo umusambi aleesha ifyo alayalanda, uumutungulule sambililo, uuli mwine ng’anda mu cilangililo, akaana nga fintu abengi bacita. Cilya umusambi afilwa ifya kucita, uumutungulule sambililo amweba ifyo aciba no kucita. Kabili, ebeleni limo kasabankanya umo nelyo babili ukulanda pa fyo basambilishiwe ilyo batendeke ukushimikila ku ng’anda ne ng’anda.

Ulwimbo 208 ne pepo lya kusondwelela.

Umulungu wa Kutampa June 27

Ulwimbo 113

10 min: Ukubilisha kwa pa mwenu. Ebeni bakasabankanya ukuleta amalipoti ya mulimo aya June. Belengeni lipoti wa ndalama no kutasha pa misangulo yapokelelwe. Bomfyeni Ifyebo fili pe bula 8 (nga nafilinga uko mushimikila), no kulangilila ifya kushalika Ulupungu lwa kwa Kalinda ulwa July 1 nelyo Loleni! uwa Apr.–Jun. Nga mulefwaya, kuti mwacite cilangililo cimbi icingalinga. Pa numa ya cilangililo, landeni pa mashiwi kasabankanya acilanda pa kutendeka ayacilenga mwine ng’anda ukukutika.

15 min: Cincileni Ukushimikila ku Ng’anda ne Ng’anda. Ukulandwa na kangalila wa mulimo. Ifyebo filefuma mu cipande twalanshenye umulungu wapwa icileti “Ukutungulula Amasambililo Ayalunduluka—Ulubali 10.” Pali baminiti batatu, pitulukeni mu fishinka fikalamba ifili muli ici cipande. Ukushimikila ku ng’anda ne ng’anda e nshila ibomfiwa sana “ukushimikisha ubunte.” (jv 100; Imil. 10:42) Abengi ababatishiwa pali nomba bashimikilwe ku baleshimikila ku ng’anda ne ng’anda. Cinshi bamo bakosela mu kushimikila ku ng’anda ne ng’anda? Balisambilishiwa kabili balapekenishisha limo ukulabombako uyu mulimo wacindama cila nshita. Nangu ca kutila bonse twalipeelwa uyu mulimo wa kushimikila, imibombele yesu tayalingana. (Moneni 1 Abena Korinti 12:29, 30) Bamo bafwile ukukoseleshiwa; bambi nabo balabomba bwino muli fimo, lelo mumbi te sana. Bushe abashilabelesha inshila shimo shimo isho tushimikilamo ku bantu kuti bayafwiwa shani ukulunduluka? (Fil. 3:16) Icilangililo (3 min): Bakangalila ba masambililo ya citabo pa cilonganino bafwile ukwafwilisha bambi ukushimikila mu nshila shalekanalekana. Lekeni eluda alangilile ifyo bakasabankanya abanono fye bengabakanya pa kuya mu kushimikila. Abaletungulula amasambililo ya Baibolo limo kuti baya na beka. Pa kukumana kwa mulimo wa mwi bala, uuletungulula afwile ukwakanya abashilakosa sana nelyo abalingile ukusambilila kuli bambi ifya kushimikila ku ng’anda ne ng’anda ukubomba na bakosa abengabalanga ifya kubomba no kubakoselesha. Bafwile ukupeelwa icifulo ca kubombelamo. Ilyo tuleebako bambi pa cishibilo ca kubapo kwa kwa Yesu, shi umupashi wa mushilo ukaletwafwa ukukonka imitantikile ya cilonganino iya kuti tuleshimikila ku “ng’anda ne ng’anda . . . ukwabulo kuleka.”—Imil. 5:42.

20 min: Ukushalika ba broshuwa mu July na mu August. Ilyashi no kulanshanya ukufuma mu ca mu kati. Londololeniko panono ifya kubomfya ica mu kati. Landeni pa mukululo uli pe bula 3 na pa fishinka fikalamba pe bula 8 mu Ubutumikishi Bwesu Ubwa Bufumu ubwa January 2005. Lanshanyeni ifyo twingalanda ifingalinga uko tushimikila pa kuti tushalike ba broshuwa pa muku wa kubalilapo ukutandala. Bomfyeni iyi mitubululo ku kucita ifilangililo fibili nelyo fitatu. Lekeni kasabankanya umwaice na o ashimikileko mu cilangililo nangu cimo fye.

Ulwimbo 196 ne pepo lya kusondwelela.

Umulungu wa Kutampa July 4

Ulwimbo 70

10 min: Ukubilisha kwa pa mwenu.

15 min: Bushe Mwalitantikila Ulupwa Lwenu Ifya Kucita? Pitulukeni mu fyebo fyali mu ca mu kati ca Ubutumikishi Bwesu Ubwa Bufumu, ubwa May 2005 kabili ebeni icilonganino ukulanda pa fyo bacita pa kuti balekonka ifi fyebo e lyo no busuma balesanga mu kucite ifi fintu.

20 min: “Ukushimikila Bwino Abantu Abasangwa mu Fifulo fya Cintubwingi.”c Landeni pa fyo Ifyebo fingabomba mu cifulo mushimikila. Cinkuleniko bakasabankanya ukubomfya formu wa Twapaapaata Fwayeni Uyu Muntu (S-43) ilyo calinga.—Moneni Ubutumikishi Bwesu Ubwa Bufumu, ubwa February 2005, pe bula 7.

Ulwimbo 120 ne pepo lya kusondwelela.

[Amafutunoti]