Kalata Ukufuma Kwi Bumba Litungulula

TULAPEPA no mukoosha kuli Lesa atuti: “Ishina lyenu lishishiwe,” nga fintu Yesu atusambilishe. Ifyo fwe Nte sha kwa Yehova twaikala e filangilila ukuti tulafwaya sana ukukonka ifyo ili pepo lilanda. Kwena, tatufwile fye ukwishiba ishina lya kwa Lesa, ifingi filafwaikwa. Tufwile ukulacindika ilyo ishina lyonse fye ilyo twashukila inshita. Takwaba icacindama ukucila pa kuba Inte ya kwa Yehova.—Mat. 6:9; Esa. 43:10.

Ukulingana na Amalumbo 110:3, abantu ba kwa Yehova baliipeelesha ukulabomba umulimo uo Yehova atila ufwile ukubombwa. Mulandu nshi abantu ba mishinku yonse ne nkulilo balebombelako umulimo wa kubila imbila ya Bufumu? Icikalamba icilenga, kutemwa Lesa e lyo no kuipeela kwabo kuli ena. Amalango 6:5, 6 yatweba ukuti tuletemwa Yehova ‘no mutima onse, umweo onse, na maka yonse.’ Uku kutemwa kwa cine cine kulenga tulebomfya inshita yesu, amaka yesu, ne fyuma fyesu ukusandulwilako Ubufumu bwa kwa Lesa, kabili inshila imo iyo twingasandulwilamo ubu Bufumu kubila imbila nsuma ukulingana na papelele maka yesu.

Icalenga ukuti Yehova atume abantu ba kubila imbila nsuma ya Bufumu isonde lyonse, mulandu wa kuti alitemwa abantu. Tafwaya nangu umo ukonaulwa lelo afwaya bonse ukulapila no kupilibukila kuli Kabumba pa kuti bekafwa. (2 Pet. 3:9) Yehova atila: “Nshibekelwa mfwa ya mubifi; kano ukuti umubifi abwele ku mibele yakwe, no kubo wa mweo.” (Esek. 33:11) Ilyo abantu baletumona tuli mu mulimo wa kubila imbila ya Bufumu, ninshi tulebela Yehova ubunte bwa kuti alitemwa abantu banensu. Kanshi ici cilalenga ukuti tuleba ne nsansa no kulasekelela mu kubombako uyu mulimo wacindama.

Ukutemwa twatemwa sana Yehova kumonekela na mu fyo twacindamika Amalembo ya Mushilo, Icebo cakwe icapuutwamo. Akubulaba Baibolo, nga tatwaishiba Lesa kabili nga tatwaishiba ifyo twingapalama kuli ena, nga fintu Yakobo 4:8 itweba ukucita. Kabili nga tatwaishiba ico twabela abomi ne fyo cikaba ku ntanshi. Nga tatwaishiba ukuti Adamu, icikolwe cesu bonse, e walenga ukuti tulecula. (Rom. 5:12) E lyo kabili nga tatwaishiba ulwa kutemwa kukalamba ukwa kwa Lesa ukwalengele ukuti atume Umwana wakwe uwafyalwa eka ku kutulubula. Kwalibako inshila na shimbi isho Yehova atusambilishishamo, ukutupandako mano, no kutwafwa ukuba abantu beluka. Ala twalicindamika nga nshi ubupe atupeela, Icebo cakwe icapuutwamo no mupashi! Kanshi nga tulatasha pali ubu bupe, tufwile “ukuilubwile nshita” ya kubelenga, ukuisambilisha, no kutontonkanya pa fyebo fya kwa Lesa. (Efes. 5:15, 16; Amalu. 1:1-3) Tatufwile ukumona kwati tuleonaula inshita ukubelenga Icebo ca kwa Lesa cila bushiku. Lelo, ukutemwa Lesa kufwile ukulenga kuti tutemwe ne Cebo cakwe, icingalenga no kuti tumwishibe no kumutemwa nga nshi.

Twalisambilila mu Baibolo ukuti ilyo Adamu abembukile Yehova, alengele ukuti ifintu fibipile sana abana bakwe bonse abali tabalafyalwa. Lelo Lesa alikwata amaka ya kupokolola abantu kabili ifyo fine fye e fyo acitile, pantu alipekenye ukuti ukufwaya kwakwe kukafikilishiwe pe sonde.—Ukute. 3:15.

Ifwe bonse tufwile tulafwaya ukuti ishina lyawamisha ilya kwa Lesa wesu libeelwe akatiina. Ilyo tuleishibilako Lesa wesu uwapulamo Yehova, tulakoseleshiwa ukubombela pamo nankwe no kuteyanya kwakwe mu kwebako bambi ishina lyakwe ilikalamba no kufwaya kwakwe. Twalicetekela ukuti Lesa akatupaala pali ino nshita kabili twalicetekela no kuti ku ntanshi tuli no kuba no bumi bwa muyayaya mu calo cipya.

Ifwe fwe baba mwi Bumba Litungulula, twalimutemwa bamunyinefwe na bankashi. Kabili tulemutasha nga nshi pa fyo mulebombesha ukulabila imbila nsuma ku bantu abengi pali iyi nshita isheleko ilyo “ubucushi bukalamba” bushilatendeka. (Ukus. 7:14) Ifi mulecita, muleafwa abantu bambi ukwishiba Lesa na Kristu ukwingalenga baisakwata umweo wa muyayaya.—Yoh. 17:3.

Ni fwe bamunyinenwe,

Ibumba Litungulula Ilya Nte sha kwa Yehova