“Ukulanda Icebo ca kwa Lesa Ukwabulo Mwenso”
1 Bushe limo limo mulomfwa umwenso wa kulanda ifyo mwasumina lintu kwaba ishuko lya kucita ifyo pa sukulu nelyo ku ncito? Bushe cilamukosela ukushimikila ba lupwa lwenu ilyo mulelanda na bo lyashi nangu abena mupalamano, nangu abantu mushaishiba? Cinshi icikatwafwa “ukulanda icebo ca kwa Lesa ukwabulo mwenso” ilyo twakwata ishuko lya kushimikila?—Fil. 1:14.
2 Mwitiina: Bushe kuti mwaikala fye tondolo ukwabula ukupokololako cibusa wenu nelyo lupwa lwenu uo babepeshe fye ubufi? Yehova cibusa wesu, balimubepesha ubufi pa myaka iingi. Twaliba no mulimo waibela uwa kubela Lesa mukulu ubunte ku bantu bambi! (Esa. 43:10-12) Nga twalitemwa Yehova tatwakaletiina ifyo abantu bambi bengatontonkanya pali ifwe nelyo ukuba no mwenso kabili ukutemwa kukalenga tulecitila ubunte icine mu kushipa.—Imil 4:26, 29, 31.
3 Muleibukisha ukuti ubukombe tubila ni mbila nsuma. Abantu nga baumfwa iyi mbila nsuma, bakasangamo ubusuma ububelelela. Nga tuletontonkanya pa busuma bwaba mu mulimo wa kubila imbila ukucila ukulatontonkanya pali ifwe bene nelyo ukulatontonkanya pa bakanya umulimo, tukalabila imbila nsuma mu kushipa.
4 Ifya Kumweneko fya Bantu Bambi: Abantu bambi ababombela Lesa mu cishinka kuti batukosha pa mulandu wa kuti balelanda Icebo ca kwa Lesa ukwabula umwenso. Ica kumwenako twingalandapo ni Enoke. Tali na mwenso ukweba abantu ababembu ubupingushi bwa kwa Yehova. (Yuda 14, 15) Noa na o talekele ukushimikila abantu abashalefwaya ukumfwa ubukombe. (Mat. 24:37-39) Abena Kristu ba kubalilapo abali “abantu abashasambilila kabili abantu yaweyawe” balitwalilile ukubila imbila nsuma nangu ca kutila balebakanya. (Imil 4:13, 18-20) Mu Ulupungu lwa kwa Kalinda na Loleni! ilingi line mulaba amalyashi ya bantu abashaletiina abantu kabili abaali abacincila ukubila imbila nsuma pa mulandu wa kuti batetekele Yehova.
5 Nga twatontonkanya pa babomfi ba kwa Lesa aba kale abali ne citetekelo nangu ca kuti baali na mafya ayapusanapusana, na ifwe bene kuti twashipa. (1 Isham. 19:2, 3; Marko 14:66-71) ‘Balishipile muli Lesa wesu’ kabili balandile Icebo ca kwa Lesa ukwabula umwenso. Na ifwe kuti twacita cimo cine!—1 Tes. 2:2.