Umukululo Wa Mepusho

◼ Bushe “umusha wa cishinka kabili uwashilimuka” alatungilila amabumba ya Nte abakumana pamo ku kufwailisha nangu ku kulanshanya ifya mu Malembo?—Mat. 24:45, 47.

Iyo, tatungilila abantu ba musango uyu. Nomba nangu tatungilila abantu abacite ifi, mu fyalo fyalekanalekana, mwaba bamo abampana no kuteyanya kwesu abapanga amabumba aya kufwailisha imilandu ya mu Baibolo. Bamo balasambilila fye ne ciHebere ne ciGriki ico babomfeshe pa kulemba Baibolo pa kuti baceeceete ifyebo fyaba mu Baibolo ya kuti New World Translation ukumona nga fya cine. Bambi na bo balafwailisha ifya sayansi ifyaampana ne fyalembwa mu Baibolo. Balikwata fye na ma-adresi ya pa Intaneti, kabili pa Intaneti pene apa balipekanya ukuti balelanshanya na baNte banabo pa malyashi yalekanalekana. Kabili limo no kukumana balakumana no kulemba fye ne fitabo pa fyo bafwailisha no kusanga pa kuti balunde pa fyo tubomfya pa kusambilila pa kulongana kwa Bwina Kristu ifyaba mu mpapulo shesu.

Isonde fye lyonse, abantu ba kwa Yehova balapeelwa amafundisho yaba mu Cebo ca kwa Lesa ayengi icine cine kabili balakoseleshiwa pa kulongana kwa cilonganino, ukulongana kwa muputule no kwaibela, pa kulongana kwa citungu, e lyo na mu mpapulo sha kuteyanya kwa kwa Yehova. Ukupitila mu mupashi wa mushilo na mu Cebo ca cine, Yehova alatupeela ifyo tukabila pa kuti abantu ba kwa Lesa bonse babe ‘abaikatana mu mano yamo yene na mu kutontonkanya kumo kwine’ no kuba ‘abaikashiwa mu citetekelo.’ (1 Kor. 1:10; Kol. 2:6, 7) Tufwile ukutasha Yehova pa fyo atuteyanishisha ukusambilila ifyebo fyakwe muli shino nshiku sha kulekelesha. E ico “umusha wa cishinka kabili uwashilimuka” tatungilila impapulo ishili shonse, ukubungana, nelyo ma-adresi ayo abantu baipangila fye abene pa Intaneti.—Mat. 24:45-47.

Cisuma nga nshi ukukwata abantu abafwaya ukubomfya amano yabo mu kusandulula imbila nsuma. Nomba kwena, icintu fye conse ico umuntu alebomba tacifwile ukulenga ifyo Yesu Kristu alebomba mu cilonganino cakwe pano calo muno nshiku ukumoneka kwati tacafikapo. Ku kutendeka kwa buKristu, umutumwa Paulo alisokele Abena Kristu ukuti belaitumpa mu fikansa ifyalebanasha fye, no kubapoosela inshita pamo nga ukufwaya ukwishiba “fintu ifikolwe fyakonkana, ifishipwa, lelo ifiletako fye amepusho ya kusapika ukucila ukupeela conse ica kwa Lesa mu citetekelo.” (1 Tim. 1:3-7) Abena Kristu fye bonse bafwile ukutaluka “ku fya kwipushaipusha ifya buwelewele ne fya ntuntuko sha fikolwe ne fikansa no kulwila pa mafunde, pantu tafyafwa kantu kabili fya fye.”—Tito 3:9.

Nga kuli abalefwaya ukwishibilapo na fimbi ifya mu Baibolo no kufwailishako fimo, mulandu nshi te kufwaila fye muli Insight on the Scriptures, Amalembo Yonse Yantu Yapuutwamo Kuli Lesa Kabili ya Kunonsha, na mu mpapulo shimbi, nga shilya shilanda pa masesemo yalembwa mu mabuuku ya mu Baibolo aya Daniele, Esaya, na Ukusokolola? Muli ifi fitabo mwaba ifingi nga nshi ifyo umuntu engasambilila pali Baibolo no kwetetulapo, ica kuti umuntu kuti ‘aisulamo ukwishiba kwine kwine ukwa kufwaya kwa kwa Lesa mu mano yonse no kukutuluka ifya bumupashi, pa kuti ende umwawamina Yehova ku kuleka ateemunwe ukufikapo ilyo aleya aletwale fisabo mu mulimo onse uusuma no kwisulamo ukwishiba Lesa bwino bwino.’—Kol. 1:9, 10.