Muleenda nga Bantu ba Mano
1 Ilyo Yesu aebele abalondo bane ukuti bamukonke, babe abasambi bakwe, tabaikete na ku cani, baimine fye “apo pene . . . no kumukonka” balamukonka. (Mat. 4:18-22) Ilyo Sauli uwa ku Tarsi apilibukile ku buKristu atampa no kumona na kabili, na o wine tatalile alaalikisha lelo “ilyo line mu masunagoge atendeke ukushimikila [abantu pali] Yesu.” (Imil. 9:20) Inshita yena taibwelela numa; nga yapwa ninshi capwa naipwa. E mulandu wine kanshi cacindamina ukuti ifwe ‘tuleenda nga ba mano’ mu fyo tubomfya inshita yesu.—Efes. 5:15, 16.
2 Ifya Kupumikisha: Inshita tukwete pali lelo iya kubombela Yehova limbi te kuti tuimone na kabili. (Yako. 4:14) Umuntu fye uuli onse kuti aponenwa ne “ca mankumanya.” (Luk. Mil. 9:11) E lyo kabili ifwe bonse twile tulekula, kabili pali ino nshita umuntu te kuti aipokolole ku nshiku “sha bubi” ishiisa pa mulandu wa kukota ishilenga ukuti twilafikapo ukubomba umulimo wa kwa Yehova. (Luk. Mil. 12:1) E ico kanshi, uwa mano te kuti alesengelesha inshiku ku ntanshi ukuti e lyo akaipeela kuli Lesa nangu ukulalolela ukuti ifintu fikawame e lyo akalabombesha mu mulimo. (Luka 9:59-62) Abrahamu aali no mutima watekanya kabili uwa mutelelwe ilyo akotele, kabili afwile na ku mutima tuutu ninshi “mukote kabili uwapilulwile imyaka” pa mulandu wa kuti ubumi bwakwe bonse alebombela fye Yehova.—Ukute. 25:8.
3 Inshita Isheleko Naiceepa: Tulingile ukubomfya inshita yesu mano mano pantu inshita isheleko naicepa. (1 Kor. 7:29-31) Impela ya cino calo ili mupepi. Ishuko lya kubombako umulimo wa kulonganika abantu baba nge mpaanga muli ino nshita ya “kulobolola ifya pe sonde” ili no kupwa. (Ukus. 14:15) Tatulingile ukuleka amasakamiko ne mitabotabo ukutupwishisha inshita iyo tulingile ukubomfya mu mulimo wa kubila imbila ya Bufumu. (Luka 21:34, 35) Ala ku ntanshi tukomfwa bwino nga twaibukisha ifyo twabomba pa mulandu wa kuti twali abacincila mu mulimo wa kulobolola!
4 Tufwile lyonse ukuba abaiteyanya ukubombako imilimo yonse iyo twingashukila. Shi natukosepo ukulabombela Yehova lyonse, kulila fye nga nabuca “Ubwa leelo,” tulingile ukubikapo fye ukulamubombela. (Heb. 3:13) Nga tulebombe ifi, tukalangilila ukuti tuli ba mano icine cine, pantu “uucito ukufwaya kwa kwa Lesa ekalilila umuyayaya.”—1 Yoh. 2:17.