Umulimo Uwacindamisha
1. Ukutemwa umulimo wa kushimikila kukalenga tukaipeleshe ukucita finshi?
1 Mulandu nshi batukoselesesha ukubomba inshita iikalamba mu kushimikila, ukubomba na maka yesu yonse, no kubomfya ifyuma fyesu? Pantu takwaba umulimo uwacindama ukucila umulimo wa kushimikila! Ukutontonkanya pa fisuma ififumamo kukalenga tulebombesha muli uyu mulimo uo tushakabombeko na kabili.—Imil. 20:24.
2. Bushe umulimo wa kushimikila utwafwa shani ukulenga ishina lya kwa Yehova ukuba ilya mushilo?
2 Ulenga Ishina Yehova Ukuba Ilya Mushilo: Umulimo wa kushimikila ulenga bonse baishiba ukuti Ubufumu bwa kwa Yehova ubo Kristu Yesu abapo Imfumu, bukafumyapo amabuteko ya bantunse yonse no kupwisha amafya ya bantunse. (Mat. 6:9, 10) Yehova alacindikwa icine cine ukutila e wakwata amaka ya kulubula abantunse ku malwele ne mfwa. (Esa. 25:8; 33:24) Apo ni fwe twakwata ishina lyakwe, abantu bambi nga bamona imibele yesu iisuma pamo no kucincila kuti bacindika ena. (1 Pet. 2:12) Ala mwandini tulomfwa bwino ukubomba umulimo wa kulenga abantu bonse mwi sonde ukwishiba ishina lya kwa Shikulu Mulopwe Yehova!—Amalu. 83:18.
3. Busuma nshi abakutika ku mbila nsuma iya Bufumu basanga pali ino nshita e lyo na ku ntanshi?
3 Ulapususha Abantu: Yehova “tafwaya umuntu nangu umo ukonaika lelo afwaya ukuti bonse bakalapile.” (2 Pet. 3:9) Nomba, nga ca kuti tapali uwa kubasambilisha, bushe abantu kuti baishiba shani ifyo Yehova amona imibele isuma ne fyo amona imisango yabipa? (Yona 4:11; Rom. 10:13-15) Ilyo abantu baumfwa imbila nsuma, imikalile yabo ilawama nga nshi pantu balaleka imisango yabipa. (Mika 4:1-4) Te apo peka iyo, balakwata ne subilo lya kuti bakaba no bumi bwa muyayaya. Nga tulebombesha mu mulimo wa kushimikila, kuti twaisapusuka kabili na bo tushimikila nabo bene kuti baisapusuka. (1 Tim. 4:16) Kanshi caliwama sana ukubombako uyu mulimo pantu walicindama nga nshi!
4. Mulandu nshi tufwile ukubeela abacincila mu mulimo wa kushimikila pa Bufumu no kulenga abantu ukuba abasambi?
4 Nomba line ubucushi bukalamba buli no kulenga cino calo cabipa ukupwa mu kupumikisha fye. Abasalapo ukubombela Yehova bakapusuka. Kanshi umulimo wa kushimikila no kulenga abantu ukuba abasambi, e mulimo wacindamisha, uo tulingile ukubomba mu kwangufyanya, kabili e mulimo uuleafwa sana abantu ino nshita. Lekeni bonse tubike uyu mulimo pa ntanshi ya fyonse ifyo tucita mu bumi bwesu!—Mat. 6:33.