Bushe Abana Benu Nabaipekanya?

1. Mulandu nshi abana besukulu balekabila ukuipekanya?

¹ Inte sha kwa Yehova abacaice balakwata amafya ayengi ilyo bali pa sukulu. Lyonse nga baisula amasukulu, balakwata amafya ayalekanalekana. Lelo aya mafya bakwata yalalenga bakwata amashuko na yambi aya ‘kuti babe inte ku cine.’ (Yoh. 18:37) Nomba bushe abana benu nabaipekanya lyonse kuli ifi?

2. Pa kuti abana benu baipekanye, finshi bafwile ukwishiba?

² Bushe abana benu balishiba bwino bwino ukuti tabalingile ukulacitako ifintu fya kulumbilisha icalo na maholide yafuma ku bashalepepa Lesa no mulandu cabipila ukulacitako ifya musango yu? Bushe bali-ipekanaya ku mafya bakakwata pamo nga ukufwaisha ukusambilila sana, ukwishishanya, no kunwesha ubwalwa ne miti iikola? Bushe bakalanda fye ukuti ukucita ifya musango yu kwalipusana ne mipepele yabo, nelyo kuti balondolola bwino bwino ifyo basuminamo?—1 Pet. 3:15.

3. Bushe abafyashi kuti babomfya shani inshita ya Mapepo ya Lupwa ku kwafwa abana babo ukuipekanya?

³ Bomfyeni Inshita ya Mapepo ya Lupwa: Kwena, ca cine ilyo abana bakulaya ku sukulu mwakulalanshanya imiku iingi ukulingana na mafya abana bakwata. Lelo nga mulebombesha ukulalanshanya amafya abana bakwata ilyo amasukulu tayalaisuka, abana benu bakulaicetekela. Mulandu nshi te kuti mubomfeshe ubushiku bwa mapepo ya lupwa bumo nelyo ukucilapo pa kuti mulande pa mafya ya musango yu? Napamo kuti mwaipusha abana benu ifilebasakamika sana ilyo baletontonkanya pa kubwelelamo ku sukulu. Kuti mwapituluka mu fintu fimo ifyo mwalanshenyepo na bo imyaka iyapita apo nomba abana nabakula kabili nabeshibilapo ifingi. (Amalu. 119:95) Kuti mwacitako ne filangililo umo imwe mwe bafyashi mwaba kwati ni mwe bakafundisha, aba kupanda amano, nelyo mwaba umwana we sukulu. Sambilisheni abana benu ifya kwasuka ukubomfya Baibolo no kubomfya ifitabo pamo nga Ukupelulula e lyo na Ifipusho Abaice Bepusha. Umufyashi umo alebomfya inshita ya filangililo pa Mapepo ya Lupwa ku kwafwa abana bakwe ukwishiba ifyo bengalanda na bakafundisha abapya lyonse ilyo baisula amasukulu no kubeba ukuti ni Nte sha kwa Yehova.—Moneni Ulupungu lwa kwa Kalinda ulwa December 15, 2010, amabula 3-5.

4. Finshi abafyashi ba mano bakacita?

⁴ Amafya abacaice Abena Kristu balepitamo muli shino nshiku isha kulekelesha ‘nayafya nga nshi’ kabili yaleya yalefulilako. (2 Tim. 3:1) Abafyashi ba mano balatontonkanishisha libela aya mafya no kulangila limo abana ifya kucita ilyo amafya yaisa. (Amapi. 22:3) Cila nshita ilyo amasukulu tayalaisuka, mulebombesha ukwafwa abana benu pa kuti babe abaipekanya.