Ipekanyeni Bwino Ukulashimikila pa Sukulu
1. Lishuko nshi mwe bacaice mwakwata pa sukulu?
1 Mwe Bena Kristu bacaice mulakwata amafya inshita yonse, cibe e mwaka wenu uwa kubalilapo pa sukulu nangula iyo, kabili abanenu balafwaya sana ukumupatikisha ukucita ifyo mushilefwaya. Lelo nangu cibe fyo mulakwata ishuko lya ‘kube nte ku cine.’ (Yoh. 18:37) Bushe namuipekanya bwino ukuya mukushimikila?
2. Finshi ifingamwafwa ukulashimikila pa sukulu?
2 Yehova ukusanshako na bafyashi benu e lyo no musha wa cishinka kabili uwashilimuka balimwafwa sana pa kutila ifintu fimuwamine mu bumi. (Amapi. 1:8; 6:20; 23:23-25; Efes. 6:1-4; 2 Tim. 3:16, 17) Ukwabula no kutwishika mufwile nomba mwalishiba amafya ayo mukwata ku sukulu. Apo Yehova alimukansha kabili mwalishiba bwino na mafya yaba ku sukulu, kanshi ipekanyeni pa kutila muleshimikila. (Amapi. 22:3) Bikeniko sana mano ku kufunda kusuma e lyo na ku mitubululo iilanda pali Baibolo iisangwa mu fitabo fibili ifya “Abacaice Bepusha ukuti,” e lyo na mu fyebo na fimbi ifilanda pa bacaice ifiba lyonse muli Loleni!
3. Ni mu nshila nshi ishalekanalekana umo mwingashimikila?
3 Ilyo muli ku sukulu kuti mwashimikila mu nshila ishalekanalekana. Bambi nga bamona ifyo mufwala ne fyo mumoneka bwino, imibele yenu iisuma ne milandile, e lyo ne fyo mwaba no mucinshi ku bana be sukulu banenu na kuli bakafundisha, kabili ne fyo mukwata amatoni yasuma mu fisambililo ne fyo bamukusha bwino, kuti fyalenga bamo balaipusha ukutila, “Mulandu nshi mwapusaninako ku baice bambi?” (Mal. 3:18; Yoh. 15:19) Nga cabe fyo kuti calenga mwakwata ishuko lya kushimikila e lyo no kulondolola ifintu ifyo mwasambilila mu Baibolo. (1 Tim. 2:9, 10) Lyonse ilyo isukulu lyabuuka mwakulakwata amafya pamo ngo kumupatikisha ukusefya inshiku sha mwikalwe e lyo no kusefya kumbi. Nga bamwipusha ukuti mulandu nshi mushisefeshako, bushe mu kalanda fye ukuti “Ni co uko mpepa tatusefya; ndi Nte ya kwa Yehova,” nelyo nalimo kuti mwashukila iyi nshita ukubashimikila pali Shinwe uwakwata ukutemwa Yehova? Nga mwapekanya bwino e lyo mwalomba na Yehova ukumwafwa, ukwabula no kutwishika mukalashimikila bwino sana kuli bakafundisha na bana be sukulu banenu e lyo na bantu bambi.–1 Pet. 3:15.
4. Mulandu nshi mushiletwishikila ukuti mukasambilila bwino?
4 Nangu cingatila mulomfwa umwenso ukuba ku sukulu, ico mufwile ukwishiba ca kutila kwaliba abengi abamutungilila abafwaya ukuti mukasambilile bwino. Na kabili tuleumfwa bwino pantu mukalashimikila ku banenu. E co kanshi shipeni kabili ipekanyeni ukulashimikila ku sukulu.