Mwilatiina Ukushimikila
1. Cinshi ukushipa kwacindamina ilyo muleshimikila?
1 Bushe mwalifilwapo ukushimikila pa sukulu pa mulandu wa kutiina ukumuseka? Ca cine pa kuti mushimikile kano namushipa, maka maka nga muli ba nsoni. Finshi fikamwafwa pa kuti mwilatiina ukushimikila?
2. Bushe ukwishiba ilyo mulingile ukushimikila kuti kwamwafwa shani ilyo muli pa sukulu?
2 Muleishiba Inshita ya Kushimikila: Nangu ca kuti isukulu kuti lyaba cifulo cenu ica kushimikilapo, muleibukisha ukuti tamulekabila ukushimikila kuli bonse aba pa sukulu nga filya mwingacita ilyo muleshimikila ku ng’anda ne ng’anda. Muleishiba inshita ya kushimikila. (Luk. Mil. 3:1, 7) Ilyashi ilyo balelandapo mu kalasi nelyo imilimo iyo bamupeela pa sukulu nalimo kuti yalenga mwakwata ishuko lya kushimikila. Limbi umunenu pa sukulu kuti amwipusha umulandu mushicitilako ifintu fimo ifyo bambi bacita. Abena Kristu bamo balyebela libela bakafundisha babo nga baya pa sukulu ilipya ukuti ni Nte sha kwa Yehova kabili balipeela bakafundisha impapulo shesu ishilanda pa fyo twasuminamo. Bambi na bo balasha impapulo pa ma tebulo yabo pa kuti abanabo pa sukulu nga bamona kuti baipusha ifipusho.
3. Kuti mwaipekanya shani pa kuti mushimikile pa sukulu?
3 Muleipekanya: Nga muleipekanya, tamwakulatiina ukushimikila. (1 Pet. 3:15) Kanshi muletontonkanyapo pa fipusho ifyo abantu bengamwipusha, kabili muletontonkanya na pa fyo mwingasuka. (Amapi. 15:28) Nga kuti mwakumanisha, mulesenda ku sukulu Baibolo ne fitabo fimbi, pamo nga Ukupelulula, Ifipusho Abaice Bepusha, ne fitabo ifilanda pa bubumbo, pa kuti ilyo muleshimikila kuti mulefibomfya. Ipusheni abafyashi benu ukuti ilyo mulecita amapepo ya lupwa, mulecitako ne filangililo pa fyo mwingashimikila.
4. Mulandu nshi mufwile ukutwalilila ukushimikila pa sukulu?
4 Muleicetekela: Mwilatontonkanya ukuti lyonse abanenu ku sukulu bakulamuseka nga mulenda pali Baibolo. Bamo limbi kuti bakumbwa ukushipa kwenu kabili nalimo kuti bafwaya no kukutika. Lelo mwilafupulwa nga ca kuti tapali nangu umo uukutike. Yehova akatemwa ukumona ukuti namwesha ukushimikila. (Heb. 13:15, 16) Twalilileni ukumulomba pa kuti alemwafwa ‘ukulanda icebo no kushipa konse.’ (Imil. 4:29; 2 Tim. 1:7, 8) Tontonkanyeni ifyo mukasansamuka nga umuntu umo akutika ku fyo muleshimikila. Uyo muntu nalimo mukuya kwa nshita kuti aba umubomfi munensu uwa kwa Yehova!