Ukulembesha mwi Isukulu lya Butumikishi bwa Teokrasi

¹ Isukulu lya Butumikishi bwa Teokrasi lyaliba ilya kwaafwa apakalamba mu kukansha amamilioni ya Nte sha kwa Yehova pamo nga batumikishi ba mbila nsuma. Abengi aba ifwe tulebukisha fintu twayumfwile aba mwenso kabili abashafikapo lintu twalembeshe muli ili sukulu pa kubalilapo, kabili nomba mu kubamo kutasha natwishiba fintu libomba mu kulunduluka kwesu ukwa ku mupashi pamo nga bakalanda kabili bakasambilisha ba Cebo ca kwa Lesa. (Linganyeniko Imilimo 4:13.) Bushe mwalilembesha muli ili sukulu lyawamisha?

² Ni bani bengalembesha? Ibula 73 mu Citabo ca Abateyanishiwa ku Kupwilikisha Ubutumikishi Bwesu casuka ukuti: “Bonse ababishanya ne cilonganino mu kucincila kuti balembwako, ukusanshako na bantu abapya abalesangwa ku kulongana, cikulu fye tabaleikala ubumi ubwafuma mu mutande wa fishinte fya Bwina Kristu.” Tulelaalika bonse abafikilepo—abaume, abanakashi, na bana—ukutununuka kangalila we sukulu no kwipusha ukulembwa.

³ Programu we Sukulu uwa 1997: Programu we Sukulu lya Butumikishi bwa Teokrasi uwa 1997 akalalanda pa fisambilisho fya Baibolo. Mu kulunda pa kulundulula amaka yesu aya kulanda no kusambilisha, tulasambilila ukufuma ku fyuma fya ku mupashi ifingi ifyo fisangwa mu fisambililwamo cila mulungu. (Amapi. 9:9) Nga ca kuti twapekanishisha isukulu, icilesanshamo ukubelenga Baibolo ukwa cila mulungu, kabili lyonse tulesangwako, kuti twanonkelamo ifya ku mupashi ifyafulilako muli programu.

⁴ Mu 1997 Amalyashi Na. 2 aya kubelenga Baibolo ayengi yali ayepi ukucila fintu yali imyaka ya ku numa. Lintu alepekanishisha ili lyashi, umusambi alingile ukupima inshita alebomfya pa kubelenga mu kusakamanishisha no kumona inshita engabomfya ku mitendekele no kusondwelela mu maminiti yasano ayapeelwa. Ici cikalenga umusambi ukubomfya inshita yakwe mu kukumanina no kulundulula fyonse fibili amaka ya kubelenga no kulamuka kwa kulanda mu kukanalolesha pali autulaini.—1 Tim. 4:13.

⁵ Ubunte bwa mu lyashi nabulundwako pamo nga imitantikile ingabomfiwa mu Lyashi Na. 3, ilishimpilwe pa citabo ca Ukwishiba. E ico, nkashi napamo kuti asoobolapo icipempu ca kubwelelamo, isambililo lya Baibolo ilya mu ŋanda, nelyo ubunte bwa mu lyashi pamo nga imitantikile ya ili lyashi. Kwena, ico tufwile ukutwalilila ukumona nga icacindama cili kusambilisha kwawamisha nga nshi te mitantikile iyo.

⁶ Nampo nga mukwete ishuko lya kulanda ilyashi lya kufunda, ifishinka fikalamba ifya mu Baibolo, nelyo ilyashi lya busambi, kuti mwalangilila ukuti mulatasha Isukulu lya Butumikishi bwa Teokrasi ukupitila mu kupekanya no kupituluka mu lyashi lyenu bwino, ukupitila mu kulilanda mu kuba no kushininwa no kucincimuka, pa kukanacila mu nshita, ukupitila mu kukutika no kubomfya ukufunda kwa kwa kangalila we sukulu, na pa kutukusha ukufikilisha ilyashi lyenu mu kusakamanishisha. Muli iyo nshila ukulembesha kwenu mwi sukulu kukaba lipaalo kuli imwe na kubalekutika abali mwi bumba.