Isukulu Ilitukanshisha ku Kucite Fyacindamisha

¹ Abantu baya ku masukulu ku kusambilila ifingabaafwa ukufishapo ubuyo bwabo mu bumi. Lelo, buyo nshi bwacindama ukucila pa kulumbanya Kapeela wa bumi no kwafwa bambi ukwishiba ubufwayo bwakwe ne mibele yakwe? Tapaba. Ubufwayo bwe Sukulu lya Butumikishi Ilya Bulesa bwaba kutupekanya ukuti tusambilisheko bambi ifyo twasumina. E ico, ilyo tulesangwa kwi sukulu cila mulungu, ninshi tulenonka ukulamuka ukutupangasha ku kucite fintu fyacindamisha mu bumi.

² “Ukutantika kwe Sukulu lya Butumikishi Ilya bulesa mu 2003” kwali mu Ubutumikishi Bwesu Ubwa Bufumu ubwa mweshi wapwile. Muli uku kutantika mwaba imitantikile ya fintu isukulu lili no kutungululwa. Napamo mukasanga ukuti kuti cawama ukusungila uku kutantika mu citabo cenu ica Nonkelenimo mu Masambililo ya Isukulu lya Butumikishi Ilya Bulesa, ico mulingile ukusenda cila mulungu pa kusangwa kwi Sukulu lya Butumikishi Ilya Bulesa. Moneni fimo fimo ifikaba mwi Sukulu lya Butumikishi Ilya Bulesa mu 2003.

³ Ukufunda pa Milandile: Ukutampa mu January, ukulongana kwe sukulu kumo na kumo kukalatendeka no kufunda kwa maminiti yasano pa milandile nelyo pa mibelengele, ifya kusambilila, atemwa ifya kusambilisha. Kangalila we sukulu e ukalanda uku kulanshanya kwa kwiswila, nelyo kuti apeela kuli eluda umbi uwafikapo ukulanda ili lyashi. Kalanda kuti alanda pa bulondoloshi no bucindami bwa iyo milandile. Lyene alingile ukulundapo na fimbi ukupitila mu kulanda pa fya kumwenako fya mu Malembo no kulangilila ifya kucita pa kubomfya ico cilelandwapo, ukulanda sana pa fyo ukucite fyo kwingawamyako ubutumikishi bwesu ubwa mwi bala.

⁴ Ilyashi Na. 1: Bamunyina bapeelwe ukulanda ili lyashi lya kufunda na kabili bebelwe “ukukomaila pa bunonshi bwa fyebo filelandwa.” Ici cilepilibula ukweba icilonganino ifya kubomfya ifyo fyebo. Nga mwapokelela ili lyashi, belengeni amabula 48-9 aya citabo ca Isukulu lya Butumikishi ku kusanga imitubululo pa fya kupekanya, kabili belengeni ifya kuloshako fili mu cisontelelo pa mutwe uleti “Ukulondolola ifyo ifyebo fingabomba.”

⁵ Ukutantika kwa Kubelenga Baibolo: Nga ca kuti kale mwalefilwa ukwendela pamo no kubelenga Baibolo ukwa mulungu no mulungu, mulandu nshi mushingapampamina pa kwendela pamo na kwene mu kutantika kwa uno mwaka? Abakendela pamo na kwene uno mwaka bakapwisha Amalembo ya Bwina Kristu aya ciGriki ilyo umwaka ukapwa. Ubusuma bwa kutampila na Malembo ya Bwina Kristu aya ciGriki mu mitantikile ya kubelenga Baibolo bwalilandwapo pe bula 10, paragrafu 4 mu citabo ca Isukulu lya Butumikishi.

⁶ Ifishinka Fikalamba mu Kubelenga Baibolo: Ulu lubali nalulefiwako ukufika ku maminiti 10 pa kuti ibumba lileasukapo pa kubelenga kwa uyo mulungu. Abapeelwe ulu lubali balingile ukusunge nshita. Ulu lubali lukalabako cila mulungu, ukusanshako na mu mulungu wa kupitulukamo kwa pa kanwa. Ilyo mulebelenga ifipandwa fya uyo mulungu, fwayenimo ifishinka ifikamunonsha mwi sambililo lya lupwa, mu butumikishi, nelyo mu mikalile yenu. Mibele nshi iya kwa Yehova iyamoneke mu fyo alebomba na bantu ne nko? Finshi mwasambilile ifyakoseshe icitetekelo cenu no kulenga mucishepo ukutasha Yehova? Muleitemenwa ukulanda pa cishinka icili conse mu fipandwa fya uyo mulungu, kuti mwalanda na mu fikomo ifili no kubelengwa mu Lyashi Na. 2, apo munyina ukalalanda ili lyashi talelandapo pa fikomo.

⁷ Ilyashi Na. 2: Ilyashi lya kubalilapo ilya musambi cila mulungu likaba kusambilila ukubelenga pa cintubwingi. Ukubelenga konse kukalafuma mu kubelenga kwa Baibolo ukwa uyo mulungu ukufumyako fye ukubelenga kwa kulekelesha ukwa mu mweshi. Ukubelenga kwa kulekesha mu mweshi kukafuma mu Ulupungu lwa kwa Kalinda. Umusambi afwile ukubelenga ifyebo apeelwe ukwabula ukulandapo amashiwi ya ntendekelo nelyo aya kusondwelela. Nga alecite fi, kuti atontomesha sana pa mibelengele yakwe.—1 Tim. 4:13.

⁸ Amalyashi Na. 3 na Na. 4: Amalyashi yamo pali aya yali ne fyebo ifingi ififumine mu citabo ca Ukupelulula ukucila yambi; yambi na yo yakwete fye umutwe. Abapeelwe amalyashi ayashikwete ifyebo ifingi nelyo ayakwete fye umutwe bali ne shuko lya kulundulula amalyashi yabo ukupitila mu kusapika mu mpapulo shesu isha Bwina Kristu. Ici kuti calenga bankashi cilebangukila ukulosha ifyebo fyabo kuli bakaafwa wabo.

⁹ Imitantikile: Nga fintu cilangililwe pe bula 45 ilya citabo ca Isukulu lya Butumikishi, kangalila we sukulu kuti amupeela imitantikile. Nga tacitile fyo, ninshi bankashi kuti basala imitantikile ukufuma pa mutande uli pe bula 82. Nga ca kuti nkashi alelanda ilyashi limo mu myeshi ibili, kuti abomfya ilya mitantikile 30 mu myaka isano. Bankashi abasala imitantikile Na. 30 iitila, “Imitantikile imbi iingabomba ku ncende mwabela,” balingile ukulemba imitantikile pe samba nelyo ku numa ya slipi wa kupeelelwapo ilyashi (S-89). Kangalila we sukulu akalemba ubushiku bwe lyashi lya musambi pe bula 82 ilya citabo mupepi ne mitantikile abomfya. Kuti alemba lilya line aleconga pali formu wa kufundilwapo uwa musambi.

¹⁰ Formu wa Kufundilwapo: Formu wenu uwa kufundilwapo ali mu citabo cenu. Ali pa mabula 79-81. Kanshi pa numa ya kulanda ilyashi lyenu, mulingile ukutwala icitabo cenu kuli kangalila we sukulu. Kangalila we sukulu akakabila ukukwata icalembwa ca fishinka fya kufundilwapo ifyo umusambi alebombelapo.

¹¹ Ukupitulukamo kwa pa Kanwa: Ukupitulukamo kwe Sukulu lya Butumikishi Ilya Bulesa kwakulaba kwa pa kanwa. Kuli no kulabako pa myeshi ibili kabili kukaba kwa maminiti 30. Amepusho ya kwipusha mu kupitulukamo yakatwalilila ukufuma mu Ubutumikishi Bwesu Ubwa Bufumu. Nga ca kuti umulungu wa kupitulukamo e mulungu wa kulongana kwa muputule nelyo e mulungu wa kutandala kwa kwa kangalila wa muputule, lyene amalyashi ya mulungu ukonkelepo e yali no kuletwa muli uyo mulungu e lyo ukusunkila ukupitulukamo mu mulungu uli no kukonkapo.

¹² Amakalasi Yalundwako: Mu filonganino umo abalembesha mwi sukulu bacila pali 50, baeluda kuti balanguluka pa kukwata amakalasi yalundwako. “Uku kupekanya kuti kwabomba ku malyashi yonse aya basambi nelyo ku ya kulekelesha fye yabili.” (Isukulu lya Butumikishi, ibu. 285) Iyi mitubululo yalekeleshako kuti yalangulukwapo mu filonganino umwafula bankashi lelo umo bamunyina ba kulanda amalyashi ya kubelenga bacepa. Baeluda balingile ukusala bamunyina bafikapo ukutungulula aya makalasi.

¹³ Kafundisha wa Cibili: Nga fintu cilangililwe mu kutantika kwe Sukulu lya Butumikishi Ilya Bulesa, kafundisha wa cibili alingile ukusalwa ne bumba lya baeluda ku kufunda pa mbali baeluda na babomfi batumikila abalanda ilyashi lya fishinka fikalamba ifya mu Baibolo ne lyashi lya kufunda. Munyina wapeelwa uyu mulimo alingile ukuba uwabelesha, untu ukufunda kwakwe kuli no kucindikwa kuli baeluda bambi. Ukufunda kwakwe kufwile ukuba ukwa kwafwa, ukutasha imilandile ne misambilishishe isuma no kweba kalanda pali cimo nelyo fibili ifyo alekabila ukubombelapo. Tacilekabilwa ukuti lyonse ilyo munyina uulanda amalyashi libili libili alande lyashi mpaka fye afundwe. Lelo uyo kafundisha wa cibili alingile ukuba uwa mucetekanya no kwishiba ukuti nangu fye ni bamunyina balanda amalyashi ya ku cintubwingi kuti bayafwiwa ukulunduluka.—1 Tim. 4:15.

¹⁴ Ifya Kwangwako: Cinshi cingafwa kafundisha pa kulingulula ilyashi? Akabokoshi ka butatu mu fipandwa 53 ifingi ifikwete amanambala mu citabo ca Isukulu lya Butumikishi kalimo ukusupula kwa fya kwangwako. Kangalila we sukulu alingile no kwangwa ku fya kucinkulako fimbi nelyo imitubululo mu citabo iikamwafwa ukupimununa bwangu bwangu ifyo ilyashi lyacilundululwa busaka busaka ne fyo lyacikuma bakoomfwa. Ku ca kumwenako, moneni amepusho yakonkana pa muulu we bula 55 ne fyebo fili muli paragrafu wa kulekelesha pe bula 163.

¹⁵ Lembenimo: Ukulunda pa ncende shikalamba mu mbali, icitabo ca Isukulu lya Butumikishi nacikwata incende ishingi umwa kulembe fyebo mwi sambililo lya pa lwenu na lintu mulesangwa kwi Sukulu lya Butumikishi Ilya Bulesa. (Moneni amabula 77, 92, 165, 243, 246, na 250.) Cila mulungu mulesenda icitabo cenu. Mulekonkamo mu lyashi lya kwiswila. Lekeni icitabo cenu cibe icakupukulwa inshita yonse isukulu liletungululwa. Umfweni imitubululo ya kwa kangalila we sukulu. Angweni ku misambilishishe ya bakalanda, amepusho, ifya kumwenako, imilandile ya mampalanya, ifilangililo, ifya kulangililako, no kucilanya balecilanya ifintu. Nga mulelemba ifyebo fisuma, mukalafibukisha no kubomfya ifishinka fyawamisha ifyo mukasambilila mwi sukulu.

¹⁶ Yesu Kristu alishibe ukuti ukushimikila imbila nsuma ya Bufumu bwa kwa Lesa e shuko lyakulisha ilyo umuntunse engakwata. Wali e mulimo wakwe uukalamba. (Marko 1:38) Atile: “Ndi no kubile mbila nsuma ya bufumu bwa kwa Lesa na mu mishi imbi, pa kuti e co natuminwa.” (Luka 4:43) Fwe bapokelela ubwite bwa kumukonka, na ifwe bene twalyobelwa no kushimikila imbila nsuma, kabili lyonse tuleesha ukuwamyako umusango we “lambo lya malumbo.” (Heb. 13:15) Pa kuti cibe fyo, shi natupampamine pa kuisanshamo lyonse mwi Sukulu lya Butumikishi Ilya Bulesa, isukulu ilili no kutukanshisha ku kucite fyacindamisha.