Ifyo Isukulu lya Butumikishi Ilya Bulesa Litunonsha

¹ Abantu ba kwa Yehova balikwata ishuko lyaibela ilya kusambilishiwa na wene. (Esa. 54:13; Yoh. 6:45) Lelo, ukunonkelamo kwesu kwashintilila pa kubombesha kwesu. Bushe mulemona ifyo Isukulu lya Butumikishi Ilya Bulesa lilenonsha bumupashi bwenu?

² Amashiwi ya Kutasha: Bakangalila ba masukulu abengi nabasango kuti ukubikako amaka na mano ku kusambilila ukufunda kwa milandile nakuwamyako imibombele ya filonganino iya mulimo wa mwi bala. Na kabili, kangalila we sukulu umo atile pa mulandu wa kuti nomba ibumba lilelandapo mu lyashi lya fishinka fikalamba ifya mu Baibolo, abengi balekonka sana ukutantika kwa kubelenga Baibolo. Ukukuma ku lyashi Na. 2 mu sukulu, aba bwananyina abengi balitasha pa bunonshi bwaba mu kupoosa inshita ku kupituluka mu fyebo filebelengwa ukwabula ukupekanya intendekelo ne nsondwelelo. Abapeelwa ili lyashi nomba balepoosa sana amano ku kuwamya imibelengele yabo.—1 Tim. 4:13.

³ Bonse Kuti Banonkelamo: Ukwasukapo pa kulongana kulomfwika bwino. (Amapi. 15:23) Ukukwatila libela ifipusho fya kupitulukamo kutulenga ukupekanishisha libela no kuipekanya ukulandapo. Kabili, ukutendeka no Ulupungu lwa kwa Kalinda ulwa January 1, 2004, ifishinka fikalamba ifya mu mabuuku ya mu Baibolo filafuma ifyampana ne mbali shesu isha kubelenga mwi Sukulu lya Butumikishi Ilya Bulesa. Ifi fipande nafyafwa abengi ukwasuka ifyasuko fya kukuulilila mu lyashi lya fishinka fikalamba ifya mu Baibolo.

⁴ Onse uwalembesha mwi sukulu alikwata ishuko lyaibela ilya kupekanya no kulanda malyashi. Ifwe bonse kuti twanonkelamo mu kulandapo kwa kwa kangalila we sukulu pa cisebele. Umusambi umo umo alanonkelamo na kabili mu kufunda kwa pa mbali na kangalila we sukulu, ilyo ukulongana kwapwa. Pa mpela ya cipandwa cimo na cimo mu citabo ca Nonkelenimo mu Masambililo ya Isukulu lya Butumikishi Ilya Bulesa paliba ulubali ulutila ifya kucita ififuma mu kufunda kwa milandile na fyo fine filaba ifya kwafwa.

⁵ Ilyo mulesambilila imbali ishisuma kabili isha mu Malembo mwi sukulu na pa numa ya kulongana, lembeni ifyo fishinka mu citabo cenu ica Nonkelenimo. Etetuleni pa fyo musambilile, kabili tontonkanyeni pa fyo ulu lubali ulwa masambililo ya bulesa lulenonsha bumupashi bwenu.