Ukunonkelamo mu Kukumanina Ukufuma mwi Sukulu lya Butumikishi bwa Teokratiki
1 Isukulu lya Butumikishi bwa Teokratiki lyaliba cibombelo ku kutukansha “mu kusambilisha” pa kuti twingapisha icine ca Baibolo kuli bambi mu nshila ya kufumamo cimo. (2 Tim. 4:2) Tulapokelela ukushilimuka kwabamo mutengo mu kulekanalekana kwa fyebo fya Baibolo umulungu umo na umo. Ni shani fintu twingashininkisho kuti tulepoka ukumwenamo kwakumanina ukufuma kuli uku kusambilisha kwakatama kuntu ili sukulu lipeela?
2 Peelako kusakamana ku kulandapo kwa kwiswila ukwa kwa kangalila we sukulu lintu aleebekesha fimo ifya fishinka fya kusekesha ifyo mwalasambilila mu kati ka kulongana. Tontonkanya pa lwa fipusho fyonse ifyo pambi engemya na fintu wingabomfya ifyasuko mu butumikishi bobe.
3 Ilyashi lya kufunda taliba fye kupitulukamo kwa fyebo fyalembwa. Lisanikila pa bucindami bubomba ubwa fyebo na fintu fingakunonsha pa lobe. Ukupekanya mu kubangilila kukakwaafwa ukutontomesha mu kuwaminako pa fishinka fikalamba no kwakana mu kupitulukamo kwa pa kanwa ukukonkapo.
4 Ukwendela pamo no kubelenga kwa Baibolo ukwa cila mulungu kuti kwalenga ukutesekesha kobe ukwa Cebo ca kwa Lesa ukushika. Ukusapika kwalundwapo kuti kwasokolola ilongo lya fyebo fya kulonsha ifipya kabili ifya kusekesha ifyo fikatwala pa ntanshi ukumfwikisha kobe ukwa cine. Imipeelele ya fishinka fikalamba ifya Baibolo yalicila pa kuba fye kubwekeshapo kwa bulondoloshi bwalembwa ubwa Baibolo. Pa numa ya kupitulukamo kwipi ukwa mu cinkumbawile, kalanda akebekesha ifishinka fipulilemo mu lubali lupeelwe no kulanga fintu fyampene ku bumi bwesu no kupepa. Peelako kusakamana pa kuti wingasambilila ifya kubomfya mu kuwaminako ukufunda kwa Baibolo.—Amalu. 119:105.
5 Nga ca kuti wapeelwa ilyashi lya musambi, ishiba icishinka ca kufunda ico ulebombelapo pali nomba. Pituluka mu mitubululo iyapeelwa mu Citabo ca Kutungulule Sukulu icibomba ne yo mibele ya milandile, kabili esha ukubomfya yene. Lintu ulesala ifyebo fya mu lyashi lyobe, esha ukwebekesha ifishinka ifingabomba mwi bala.—sg-CW amabu. 98-101.
6 Nga ca kuti uli nkashi uupeelwe ulubali lwa kupeela Ilyashi No. 3 nelyo Ilyashi No. 4, esha ukupeela ifyebo mu mitantikile ya cine cine. Mwine ŋanda kuti asumina nelyo te kuti pambi asumine ne cili conse ico wasosa; esha ukulanga fintu wingafwilisha umuntu ukupelulula pa fyaba ku numa ya fishinte fya Baibolo. (sg-CW amabu. 154-8) Ici cilafwilisha ibumba ukumona ifya kubomba no kukaanya kwapalako ukukumanishiwa mu mulimo wa mwi bala. Pekanya bwino mu kubangilila, kabili tantika ukupitulukamo kwa mu kubangilila mu kuba na mwine ŋanda obe. Tacilingile ukuba icafwaikwa ukupitulukamo pa numa ukulongana nakutendeka.
7 Abasambi abalepeela amalyashi bakoseleshiwa ukwikalila mupepi na ku ntanshi. Ici cilapusushako inshita kabili cisuminisha kangalila we sukulu ukupeela ukulandapo kwakwe mu nshila yacilapo kulungatika ku muntu. Bonse kuti banonkelamo ukufuma ku mitubululo ya cikuuku, iya kulungatika intu apeela ukushimpwa pa Citabo ca Kutungulule Sukulu. Te kuti pambi akonke ifishinka fya milandile mu mutande wapeelwa pali slipi wa Kufunda kwa Milandile; akasalapo icishinka ca kufunda ukushimpwa pa cintu ulekabila pali nomba pa kuti wingacita ukulunduluka kwawamisha.
8 Iyi yonse ili milandu isuma kuli ifwe ukupekanishisha no kusangwa kwi Sukulu lya Butumikishi bwa Teokratiki cila mulungu. Ukufunda tupokelela kuti kwatwaafwa ukuba aba mano na balamuka mu butumikishi bwesu.—Amapi. 1:5.