Bakangalila Abatungulula—Kangalila we Isukulu lya Butumikishi bwa Teokrasi

¹ Kangalila we Isukulu lya Butumikishi bwa Teokrasi aba ni munyina uwakosoka lwa ku mupashi uubombesha mu kulanda no kusambilisha kabili tulingile ukumucindika no kubombela pamo nankwe. (1 Tim. 5:17) Milimo nshi abomba?

² E usakamana laibrare we Isukulu lya Butumikishi bwa Teokrasi pa Ng’anda ya Bufumu. Afwaisha ukukoselesha bonse abengalinga ukulembesha mwi sukulu. E ushininkisho kuti icalembwa ca balembesha mwi sukulu cilesungwa bwino pa kuti amalyashi yalepeelwa ku basambi nangu fye imilungu itatu mu kubangilila. Akabila ukwishiba icilonganino bwino, ukwishiba umusambi umo na umo e fyo engacita. Nangu cingati kuti kwabako munyina umbi uwa kumwafwa ukupekanya ukutantika kwe sukulu, kangalila we sukulu e waba no mulimo wa kutantika abakaba mwi sukulu.

³ Pa kuti alefunda bwino isukulu, cila mulungu kangalila afwile ukupekanya bwino sana, no kubelengesha amalyashi ayakalandwa. Ici cilenga ukuti alecincimusha icilonganino pa fyalasambilishiwa mwi sukulu, ukulingulula nga ca kuti ilyashi nalilandwa bwino, no kukomaila pa fishinka fyacindama ifikaba mu kupitulukamo kwa kulemba.

⁴ Ukukonka ilyashi limo na limo ilya musambi, kangalila akatasha umusambi no kulondolola umulandu imilandile yakwe yacibela bwino nelyo umulandu alekabila ukuwamyako. Nga kuli uulekabila ukufundwa ifyalundwako pa lwa kupekanya amalyashi ya mwi sukulu, kangalila we sukulu nelyo umbi uo asonta kuti amwafwako.

⁵ Pa kuti twingamwenamo sana mu kubombesha kwa kwa kangalila we Isukulu lya Butumikishi bwa Teokrasi no kwa bonse abamwaafwa mu kufunda, tulingile ukusangwa lyonse kwi sukulu. Na kabili tufwile ukulalanda amalyashi yonse tupeelwa kabili tulebomfya ukufunda tupokelela ukusanshako na kulya ukupeelwa ku basambi bambi. Muli iyi nshila, tukalawamyako ifya kushimikila ubukombe bwa Bufumu pa cintubwingi na ku ng’anda ne ng’anda.—Imil. 20:20; 1 Tim. 4:13, 15.