Mwilamona Kwati te Kuti Mubombe—Ifyo Mwingacita nga Mumona Kwati Tamwafikapo
1. Cinshi cilenga bamo ukufilwa ukutendeka amasambililo ya Baibolo?
1 Bushe mulafilwa ukutendeka isambililo pantu mumona kwati te kuti musambilishe bwino? Na babomfi ba kwa Lesa aba ku kale pamo nga Mose na Yeremia inshita shimo, baleyumfwa ukuti tabafikilepo ukubomba imilimo Lesa abapeele. (Ukufu. 3:10, 11; 4:10; Yer. 1:4-6) Kanshi te imwe mweka mumfwa ifyo, abantu abengi balaisuula sana. Kuti mwacita shani pa kuti mupwishe ubu bwafya?
2. Mulandu nshi tushilingile ukulashimikila fye ku ng’anda ne ng’anda no kushiila bambi umulimo wa kutungulula masambililo?
2 Tulingile ukulaibukisha ukuti Yehova tatweba ukucita ifyo tushingacita. (Amalu. 103:14) Kanshi kuti twabomba umulimo Yehova atupeela uwa kulenga abantu “ukuba abasambi” no ‘kulabasambilisha.’ (Mat. 28:19, 20) Yehova tapeela fye uyu mulimo ku baishiba sana ukusambilisha nelyo ku bacenjela mu fintu fimo. (1 Kor. 1:26, 27) Kanshi bonse tufwile ukulatungululako amasambililo, tatulingile ukulashimikila fye ku ng’anda ne ng’anda no kushiila bambi umulimo wa kutungulula amasambililo.
3. Bushe Yehova atwafwa shani pa kuti tufikepo ukubomba umulimo wa kutungulula amasambililo ya Baibolo?
3 Yehova E Ulenga Ukuti Tufikepo: Uulenga ukuti tufikepo ukubomba umulimo wa kulenga abantu ukuba abasambi ni Yehova. (2 Kor. 3:5) Yehova alibomfya ukuteyanya kwakwe ku kutusambilisha icine ca mu Baibolo. Twalisambilila ifintu ifingi ica kuti nangu fye ni balya abasambilila sana muno calo, tabaishiba ifyo ifwe twaishiba. (1 Kor. 2:7, 8) Yehova alilenga ukuti ifyalembwa ifilanda pa fyo Yesu, Kasambilisha Mukamba alesambilisha fisungwe pa kuti tulesambililako, e lyo kabili alatukansha ukupitila na mu cilonganino. Na kabili, Yehova alitupeela impapulo ishingi isha kusambililamo na bantu pali Baibolo. Alitupeela impapulo pamo nga icitabo ca Ico Baibolo Isambilisha icitwafwa ukusambilisha abantu icine mu nshila iya-anguka. Kanshi calyanguka sana ukutungulula isambililo.
4. Mulandu nshi twingacetekela ukuti Yehova akatwafwa?
4 Yehova alyafwile Mose na Yeremia ukubomba imilimo iyo abapeele. (Ukufu. 4:11, 12; Yer. 1:7, 8) Na ifwe, kuti twalomba Yehova ukuti atwafwe. Na kuba, Lesa kuti atwafwa pantu nga tuletungulula isambililo, ninshi tulesambilisha umuntu icine pali Yehova kabili Lesa alatemwa sana nga tulecita ifi. (1 Yoh. 3:22) Kanshi kuti cawama sana nga mwaibikilishako pa kuti muletungululako amasambililo ya Baibolo. Nga mwabombako uyu mulimo mukaba ne nsansa sana kabili Lesa akamupaala.