Na Imwe Bene Kuti Mwaba Bakasambilisha!
1. Lishuko nshi Kasabankanya onse uwa Bufumu akwata?
1 Icintu cimo icituletela sana insansa mu mulimo wa kushimikila, kusambilisha umuntu icine. Ala lishuko nga nshi ukwafwa umuntu ukupalama kuli Kateka Wapulamo, e lyo no kumona uko uyo muntu aletemwa ifyo alesambilila. (Yako. 4:8) Kasabankanya onse uwa Bufumu afwile ukupanga ukuti, akasambilisha umuntu uuli ne cilaka ca kumfwa icine, no kumona uko uyo muntu aletendeka ukwalula imibele ne misango yakwe e lyo no kumona uko alealuka mu fyo atontonkanya pa fintu.—Mat. 28:19, 20.
2. Cinshi cingalenga bamo ukutiina ukutungulula amasambililo ya Baibolo, kabili cinshi cingabafwa ukupwisha ubu bwafya?
2 Shintilileni Pali Yehova: Ababomfi ba kwa Lesa aba kale baletwishika nga kuti babomba umulimo Yehova abapeele. Ukushintilila pali Yehova Lesa kwalengele Mose, Yeremia, Amose na bantu bambi ukukanatwishika ukuti kuti babomba umulimo wacindama uo Yehova abatumine ukubomba. (Ukufu. 4:10-12; Yer. 1:6, 7; Amose 7:14, 15) Umutumwa Paulo na o ‘alishipile,’ nelyo kuti twatila “alilandile ukwabula ukumfwa umwenso.” Cinshi calengele ukuti ashipe? Atile cali ni ‘pa mulandu wa kwa Lesa wesu.’ (1 Tes. 2:2) Ca cine ifwe bonse tufwile ukucetekela ukuti Yehova akatwafwa, kabili akatupeela amano na maka pa kuti tukaletungulula amasambililo ya Baibolo ayalunduluka.—Esa. 41:10; 1 Kor. 1:26, 27; 1 Pet. 4:11.
3, 4. Maprogramu nshi ayatusambilisha ifya kusambilisha abantu Icebo ca kwa Lesa?
3 Mulesambilila: Yehova Lesa, Kasambilisha wesu Uwapulamo, alatusambilisha ukupitila mu maprogramu ayalanda pali Baibolo pa kuti tube bakasambilisha abafikapo. (Esa. 54:13; 2 Tim. 3:16, 17) Mulebikako sana amano kuli aya maprogramu pa kuti muleishibilako ifyo Amalembo yalepilibula, kabili mulelunduluka mu kusambilisha icine icaba mu Baibolo. Nangu ca kutila mwi Sukulu lya Butumikishi Ilya Bulesa no Kulongana kwa Mulimo e mo tusambilila sana ifya kusambilisha abantu ifyaba mu Cebo ca kwa Lesa, ukulongana kumbi na ko kwine kulatwafwa.
4 Esheni ukusambilila inshila shayanguka isha kusambilishishamo ifya ku mupashi ifyayafya ukulondolola. Icitabo ca Nonkelenimo, pe bula 227, cilondolola ukutila: “Mwe bene mufwile ukumfwikisha ifyebo muli no kulandapo nga mulefwaya bambi bafyumfwikishe.” Ukwasukapo pa kulongana kulatwafwa ukubika ifyebo ifyacindama mu muntontonkanya wesu pa kuti tukafibomfye ku ntanshi. E mulandu wine kanshi mulingile ukupekanya bwino sana, nga mulecite fi mukalaicetekela pa kusambilisha.
5. Ni kuli bani bambi mu cilonganino uko twingasambilila pa kuti tube bakasambilisha basuma?
5 Nangu fye ni ku kale Abena Kristu ba kubalilapo balesambilila kuli umo no munankwe ilyo balebombela pamo mu mulimo wa kupanga abasambi. (Luka 10:1) Nga cingacitika mulebombela pamo mu kutungulula amasambililo ya Baibolo na bakasabankanya abaishiba sana ukusambilisha, bapainiya, baeluda, e lyo na bakangalila benda. Mulemona ifyo babomfya ifilangililo ifyayanguka ukumfwa, ifikope ne fintu fimbi ifisangwa mu fitabo tusambilishamo abantu ifyafwa ukulondolola icine icaba mu Malembo. Bepusheni ifyo mwingacita pa kuti mulesambilisha bwino. (Amapi. 1:5; 27:17) Muletasha pali ifi fyonse ifyo bamunyina na bankashi balemusambilisha pantu na kuba ni Lesa e ulemusambilisha.—2 Kor. 3:5.
6. Cinshi icacindama sana ico mufwile ukucita pa kuti mulesambilisha Icebo ca kwa Lesa?
6 Shintilileni pali Yehova, kabili nonkelenimo mu masambililo atusambilisha. Lyonse fye mulepepa ukuti mulunduluke. (Amalu. 25:4, 5) Ala na imwe bene, kuti mwaumfwa insansa ishisa ilyo mwa-afwa umo ukuba nga imwe, ukuba kasambilisha wa Cebo ca kwa Lesa!