Yehova Aletukansha Ukubomba Umulimo Wakwe
1. Yehova nga apeela abantu umulimo, cinshi na cimbi ico acita?
1 Yehova nga apeela abantu umulimo, alabafwa pa kuti babombe uyo mulimo. Ku ca kumwenako, ilyo Yehova aebele Noa ukukuula icibwato, umulimo uo Noa ashabalile abombapo, Yehova alimwebele ne fya ku-ubomba. (Ukute. 6:14-16) Ilyo Mose uwali kacema wafuuka, bamwebele ukuyamonana na bakalamba ba mu Israele e lyo na Farao, Yehova amwebele ukuti: “Ine nkaba na iwe kabili nkakusambilisha ifyo ufwile ukusosa.” (Ukufu. 4:12) Na ifwe, Yehova alitupeela umulimo wa kushimikila imbila nsuma kabili alitweba ne fya ku-ubomba. Alatusambilisha ifya kubomba uyu mulimo ukupitila mwi Sukulu lya Butumikishi Ilya Bulesa na mu Kulongana kwa Mulimo. Kuti twacita shani pa kuti twinganonkelamo?
2. Kuti tulenonkelamo shani mu kulongana kwe Sukulu lya Butumikishi Ilya Bulesa?
2 Isukulu lya Butumikishi Ilya Bulesa: Mufwile ukupekanya bwino bwino amalyashi yali mu kulongana ilyo mushilaya ku kulongana. Lyena ilyo mukalakutika ifyo abana be sukulu bakalalanda amalyashi yabo mwi sukulu, mukalaishibilako ifya kusambilisha bwino. (Amapi. 27:17) Mulesenda icitabo ca Nonkelenimo ilyo mulelongana pa kuti mulecibomfya pali uku kulongana. Kangalila we sukulu nga alabelenga ifyebo muli ici citabo ilyo umwana we sukulu apwisha ilyashi, mufwile muleshila pa fishinka ifyo mwingatemwa ukubomfya, kabili mulelemba ne fyebo mwatemwa mu mbali. Lelo, icingamwafwa sana ukunonkelamo muli ili sukulu, kulalandako amalyashi. Bushe mwalilembesha? Nga mwapeelwa ilyashi mwi sukulu, mufwile ukupekanya bwino no kubomfya ifyo mwafundwa. Ilyo muleshimikila bomfyeni ifyo mwasambilile mu kulongana kwe sukulu.
3. Finshi tufwile ukulacita pa kuti tulenonkelamo mu Kulongana kwa Mulimo?
3 Ukulongana kwa Mulimo: Nga tulepituluka mu fyebo tuleya mu kusambilila no kupekanya ukuya-asukapo twakulaibukisha bwino ifyo tulesambilila muli uku kulongana. Nga tuleipifya ifyasuko fyesu, ninshi abengi bakula-asukapo pali uku kulongana. Mulebikako amano ilyo aba mu cilonganino balecita ifilangililo, kabili mulebomfya inshila isho mwamona ukutila kuti shamwafwa ukulashimikila bwino sana. Mulesunga Ubutumikishi Bwesu Ubwa Bufumu umuli ifipande ifingamwafwa sana inshita imbi mu mulimo wa kushimikila.
4. Cinshi cacindamina ukulabomfya bwino ifyo Lesa aletusambilisha?
4 Nga filya fine imilimo Noa na Mose bapeelwe yali iyakosa, e fyo no mulimo wa kushimikila imbila nsuma ku bantu bonse aba pe sonde wakosa. (Mat. 24:14) Kuti twaubomba bwino nga twacetekela Yehova, Kasambilisha wesu Uwapulamo, no kulabomfya fyonse ifyo aletusambilisha.—Esa. 30:20.