Twalilileni Ukulawamyako Ifyo Mushimikila
1. Fya kumwenako nshi ifyaba mu malembo ifilanga ukutila tulingile ukutwalilila ukulawamyako ifyo tushimikila?
1 Abena Kristu balingile ukulayabaleishibilako ifya kubomba umulimo wa kushimikila. E mulandu wine Yesu talekeele ukulasambilisha abasambi bakwe ifya kushimikila. (Luka 9:1-5; 10:1-11) E calengele na Akula na Prisila ukusenda Apolo “no kumulondolwela bwino bwino amafunde ya kwa Lesa.” (Imil. 18:24-26) Kabili e calengele na Paulo ukukoselesha Timote uwalebomba bwino umulimo wa kushimikila ukulabika amano ku fyo alesambilisha pa kuti “bonse balemona ukulunduluka” kwakwe. (1 Tim. 4:13-15) Kanshi nampo nga e lyo tutendeke fye nelyo nga kale twatendeka ukubomba umulimo wa kwa Shikulu, tulingile ukutwalilila ukuwamyako ifyo tushimikila.
2. Bushe kuti twasambilila shani kuli bambi?
2 Mulesambililako Kuli Bambi: Cimo icingatwafwa ukulawamyako ifyo tushimikila kulasambililako kuli bambi. (Amapi. 27:17) Kanshi nga muli mu mulimo, mulebikako sana amano ilyo uo mulebomba nankwe alelanshanya no muntu. (Amapi. 1:5) Bushe cilamukosela ukucita icipempu, ukutendeka isambililo lya Baibolo, nelyo ukubomfyako inshila shimbi pa kushimikila? Kuti mwaipusha kangalila we bumba lyenu nelyo kasabankanya umbi uwaishiba ukushimikila bwino ukumwafwa. Na kabili, muleibukisha ukuti umupashi wa mushilo kuti watwafwa, kanshi lyonse mulelomba umupashi wa mushilo.—Luka 11:13.
3. Bushe tulingile ukucita shani nga ca kuti umo nangu ca kuti tatumwipwishe atwebako apo tulingile ukuwamyako?
3 Mwilafulwa nga ca kuti bamwebako apo mufwile uku bombela nangu ca kutila tamwacilomba ukuti bamwafwe. (Luk. Mil. 7:9) Lelo mulingile ukuicefya nga filya fyacitile Apolo no kusumina ifyo bamufunda. Nga twasumina ifyo batufunda, ninshi tuli ba mano.—Amapi. 12:15.
4. Finshi Yesu atile e fingatwafwa ukulunduluka mu mulimo wa bukabila?
4 Lesa Alacindikwa nga Tulelunduluka: Yesu alebomfya ifilangililo pa kwafwa abasambi bakwe ukulunduluka mu mulimo wa bukabila. Yesu ailingenye ku mwangashi e lyo abasambi bakwe abasubwa abalingenye ku misambo. Atile umusambo onse uutwala ifisabo Wishi alautungwila bwino bwino, “pa kuti utwalishe.” (Yoh. 15:2) Nga filya umwine wa myangashi afwaisha ukuti iletwala sana, Yehova na o afwaya ukuti tuleishibilako ifya kubomfya “icisabo ca milomo” yesu. (Heb. 13:15) Fisuma nshi ifingafumamo nga ca kuti tulelunduluka mu mulimo wa bukabila? Yesu atile: “Muli ici e mo Tata acindamikilwa, nga muletwalisha.”—Yoh. 15:8.