Mulelunduluka mu Kushimikila
1 Shifwe wa ku muulu alatemwa nga nshi ukumona ababomfi bakwe balelunduluka mu kwishiba icine. Pa kuti mulunduluke, mufwile ukukosoka no kuba abakampuka mu kushimikila imbila nsuma. Paulo akoseleshe kangalila Timote ukutwalilila ukuibikilishako ku kubelenga no kusambilisha pa kuti abantu bamone ukulunduluka kwakwe. (1 Tim. 4:13-15) Bonse tufwile ukwesha na maka ukuwamyako ubutumikishi bwesu nangu fye twalishiba sana ukushimikila.
2 Pangeni Ifyo Mulefwaya Ukucita: Pa kuti tulunduluke mu kushimikila kano twapanga ifyo tulefwaya ukucita. Finshi twingapanga ukucita? Limo kuti twafwaya ukwishiba ifya kubomfya bwino Baibolo iyaba ulupanga lwa ku mupashi. (Efes. 6:17) Nalimo kuti kwaba inshila imo iya kushimikililamo iyo twingafwaya ukuwamyako, kuti yaba kushimikila mu misebo, ukushimikila pa lamya, nelyo ukushimikila mu fifulo ifya makwebo. Limbi kuti twafwaya ukubombela pa kucita bwino sana ifipempu fya kubwelelamo. Cimbi na co ico twingapanga ukucita, kuwamyako ifya kutendeka ne fya kutungulula amasambililo ya Baibolo.
3 Ifingamwafwa Ukuwamyako Ukushimikila: Ukulongana kwa cilonganino kwabelako ku kutwafwa ukuwamyako ubutumikishi bwesu, sana sana ukulongana kwe Sukulu lya Butumikishi ilya Bulesa no Kulongana kwa Mulimo. Tulanonkelamo sana muli uku kulongana nga ca kutila tulebikako sana amano ku kupekanya no kusangwako e lyo no kubomfya ifyo tulesambililamo.—2 Kor. 9:6.
4 Na kabili tufwile ukulaafwana, pa kuti bonse tulelunduluka. (Amapi. 27:17) Ukubikako amano ku fyo abo tuli nabo baleshimikila kuti kwatwafwa ukuwamyako ukushimikila. Na kabili, katungulula we sambililo lya citabo kuti apekanya aba kutwafwa. Ala lishuko nga nshi ukukwata painiya wakampuka nelyo kasabankanya umbi ukutwafwa ukulunduluka mu butumikishi bwesu kabili no kutwafwa ukusange nsansa shine shine mu mulimo wesu uwa kushimikila! Bushe mu cifulo cesu ice sambililo lya citabo muli kasabankanya umupya? Nalimo kuti twamweba ukuti tukabombe nankwe.
5 Umulimo wacindama sana uulebombwa, wa kushimikila imbila nsuma. Ilyo tulepeela Yehova “ilambo lya kumulumbanya,” tufwile ukumupeela ilambo line line, ilisuma nga nshi. (Heb. 13:15) Nga twaibikilishako ukuwamyako ukushimikila, lyena tukaba ababomfi ‘abashingaba na ca kukwatilapo insoni, abalungika bwino icebo ca cine.’—2 Tim. 2:15.