Imikeni Amabuyo ya ku Mupashi
1 Mwandi cikaba lishuko ukulumbanya Yehova ku ciyayaya conse! Pa kuti cingatwafwa ukufika pali ubo buyo, kuti twaimika amabuyo ya kutendekelako yamo aya ku mupashi no kubombesha ukufika pali ayo mabuyo. Ici cikatulenga ukubomfya amaka yesu bwino. (1 Kor. 9:26) Mabuyo nshi mwingafikapo pa lwenu?
2 Isambililo lya Baibolo: Bushe mulapekanishisha ukulongana kumo na kumo ukwa pa cilonganino? Ilyo mulepekanya, bushe mulapoosako inshita ya kusokota no kwetetula pa fyo mulebelenga? Ku ca kumwenako, ilyo mulepekanya Isambililo lya Ulupungu lwa kwa Kalinda ilya cila mulungu ne Sambililo lya Citabo ilya pa Cilonganino, bushe mushila fye pa casuko nelyo mulabelenga amalembo yapeelwe no kutontonkanya pa milandu ilengele ukuti ubulondoloshi bupeelwe bube ifyo? Bushe kuti mwaimika ubuyo bwa kulasokota ifishinka cila mulungu ukufuma pa kubelenga kwa Baibolo ukwa cila mulungu mwi Sukulu lya Butumikishi bwa Teokrasi? Ukusokota ifya ku mupashi muli uyo musango kukabila inshita no kubombesha, lelo kulaleta amapaalo ayengi.—Amapi. 2:4, 5.
3 Ukulongana kwa pa Cilonganino: Ubuyo bumbi bwa kusangwa lyonse ku kulongana kwa cilonganino konse kusano. Ukubangilila pa kuti kube ukubishanya na basumina banensu no kwimbako ulwimbo lwa kwiswila no kukutika kwi pepo filaafwa ukukosha umupashi wa cilonganino. Kuti twatukuta no kulayasukapo pa kulongana kumo na kumo no kwesha ukuwamyako amasuko yesu. Nalimo kuti mwalanda pa fyo ilembo babikile mu paragrafu lileumfwana na fintu mulelanshanyapo nelyo kuti mwalandako pa fyo ifyebo fingabomba mu mikalile yesu.—Heb. 10:24, 25.
4 Umulimo wa mwi Bala: Ubutumikishi bwesu bulawaminako nga nshi ilyo twaimika amabuyo. Bushe mwalikwata ubuyo bwenu ubwa maawala mufwaya ukuba mu butumikishi cila mweshi? Bamo basanga ici ukuba ica kwaafwa. Nelyo bushe kuti mwawamyako inshila shimo isho mushimikilamo, pamo nga ukubomfya Baibolo mu mulimo wa ku ng’anda ne ng’anda, ukupanga ifipempu fisuma ifya kubwelelamo, ukubombesha ukutendeka isambililo lya Baibolo, nelyo ukusambilisha bwino amasambililo?
5 Mwe bafyashi, bushe mulekoselesha abana benu ukwimika amabuyo mu mulimo wa kwa Yehova? Bushe balifika pa kuba bakasabankanya? Bafweni ukuumfwikisha ukuti ukuba painiya, ukupita mwi Sukulu lya Kukansha Ilya Butumikishi, nelyo ukuba mu lupwa lwa Bethel ni nshila shisuma isho bengalangilamo ukutasha kwabo ukukalamba kuli Yehova.—Luk. Mil. 12:1.
6 Ilyo tuleceeceeta imibombele yesu, natwimike amabuyo ya ku mupashi, kabili natubombeshe pa kuti tufikepo, tukaipakisha umulimo wesu no kuba intulo ya kukoselesha kuli bambi.—Rom. 1:12.