Pashanyeni Icitetekelo Cabo
1. Citabo nshi tukalasambilila pa Isambililo lya Baibolo Ilya pa Cilonganino ukutendeka mu mulungu wa October 19?
1 Mu mulungu wa October 19, 2015, tukatendeka ukusambilila icitabo ca Pashanyeni Icitetekelo Cabo pe Sambililo lya Baibolo Ilya pa Cilonganino. Ici citabo calanda pa baume na banakashi 14, abaali ne citetekelo abo Baibolo yalandapo. Ifyo ici citabo calanda pali aba bantu abaali ne citetekelo filenga twatendeka ukulaelenganya ifyo baali, na mafya balepitamo ilyo balebombela Yehova. Na kabili, icitabo ciletwafwa no kusambililako kuli aba bantu ifingatwafwa ukulapingulapo bwino ifya kucita muno nshiku.—Heb. 6:12.
2. Landeni pali fimo ifyaba mu citabo ca Pashanyeni Icitetekelo Cabo.
2 Ifyaba Muli ici Citabo: Mu citabo mwaba amacharti na mamapu aya kutwafwa ukwishiba inshita aba bantu baliko ne fifulo baleikalako. Na kabili, cila cipandwa calikwata apo balemba ukuti “Amepusho ya kutontonkanyapo . . . ,” aya mepusho yakalatwafwa ukutontonkanya pali aba bantu bacitetekelo no kumona ifyo twingabomfya ifyo tukalasambililako. Na kabili mu citabo mwaliba ifikope ifisuma, ifyo bapekanya bwino sana pa kuti filetwafwa ukulaelenganya bwino abo Baibolo yalandapo.
3. Finshi tufwile ukulacita pa kuti tulenonkelamo pa kusambilila ici citabo?
3 Ifyo Mwinganonkelamo: Muli kalata ukufuma kwi Bumba Litungulula batukoselesha ukuti: “Muletontonkanyapo no kwelenganya ifyo mulebelenga. Esheni ukumfwa ifyo abalandwapo muli ici citabo baleumfwa no kwesha ukumona ifyo balemona. Mulelinganya ifyo bacitile pa fintu fimo ku fyo mwingacita nga ni mwe.” Kwena, pa kuti tuleelenganya bwino tufwile ukulatontonkanya pa bantu abo amalembo yalandapo no kulamona ifyo ifwe twali no kucita nga twalikwete amafya ayo balekwata no kwesha ukulaumfwa ifyo baleumfwa. Pa kucita ifi, tufwile ukukwata inshita iikalamba iya kubelenga no kwelenganyapo. (Nehe. 8:8) Nga muletendekela ukusambilila mu kati ka cipandwa apo mwashiliile, uuletungulula isambililo afwile abalilapo ukupituluka mu fyo mwasambilile umulungu wapwile mu masekondi 30 ukufika kuli mineti umo. Nga ca kuti mu mulungu mulesambilila ici citabo tamulepituluka mu “Amepusho ya Kutontonkanyapo . . .” ninshi pa kusondwelela isambililo, uuletungulula kuti aipushako icipusho nelyo ifipusho fibili ifya kupitulukamo.
4. Cinshi tufwile ukusambililila icitabo ca Pashanyeni Icitetekelo Cabo?
4 Twikala mu calo umucitika cila bushiku ifintu ifingonaula nelyo ukunasha icitetekelo cesu. Cino citabo e lyo ne fipande ifiba mu Ulupungu lwa kwa Kalinda ifilanda pa bantu abo Baibolo yalandapo abaali ne citetekelo, bupe ukufuma kuli Yehova ku kutwafwa ukukosha icitetekelo cesu. (Yako. 1:17) Kanshi natukalesangwa lyonse ku kulongana kwa Isambililo lya Baibolo Ilya pa Cilonganino no kulayasukapo ilyo tukalasambilila ici citabo!