Ifyo Lesa Atupaala nga Tuleafwilisha Abantu

Abantu abengi mwi sonde lyonse tabakwata ifya kulya no mwa kwikala. Bambi nabo bakabila fye aba kubafwa ukwishiba ukuti ifintu fikawama ku ntanshi. Bushe Lesa atupaala shani nga tuleafwilisha abantu?

IFYO AMALEMBO YA MUSHILO YALANDA

“Uulepeela umupiina ninshi aleashimisha Yehova, e ukamubwesesha pa luse lwakwe.”—AMAPINDA 19:17.

IFYO CIPILIBULA UKWAFWA ABALEKABILA UBWAFWILISHO

Bushiku bumo Yesu alilandile umulumbe. Muli uyu mulumbe alandile pa mwaume uo ifipondo fyasanshile no kupumina imfwila. (Luka 10:29-37) Umwaume umo uwa luse alisakamene uo bapumine. Alimwafwile nangu ca kuti bafumine mu mitundu iyapusana.

Uyu mwaume tapelele fye pa kuwamya ifilonda fya o bapumine no kumulipilila ku bali no kutendeka ukumusakamana, lelo alemusansamusha no kumwafwa mpaka apola.

Finshi tusambilila kuli uyu mulumbe? Yesu aletulanga ukuti tufwile ukulaesha na maka ukwafwilisha abalekabila ubwafwilisho. (Amapinda 14:31) Amalembo ya Mushilo yasambilisha ukuti nomba line fye Lesa akafumyapo ubupiina na macushi. Nomba kuti twaipusha ukuti, bushe ni lilali Lesa akafumyapo fyonse ifi kabili akafifumyapo shani? Mu cipande cikonkelepo twalalanda pa mapaalo ayo Kabumba wesu uwatutemwa akatupeela.