IFYO FWE BENA KRISTU TULINGILE UKULAIKALA
Mulekonka Amafunde ya kwa Yehova Ayalanda pa Kuba ne Mibele Iisuma
Yehova Lesa alibikako amafunde ayo bantu bafwile ukukonka pa kuba ne mibele iisuma. Ku ca kumwenako, alibikako ifunde ilitila umwaume no mwanakashi nga baupana tabafwile ukulekana. (Mat. 19:4-6, 9) Tasuminisha umusango onse uwa bulalelale. (1 Kor. 6:9, 10) Alibikako na mashiwi yakwe ayatutungulula pa fyo tulingile ukufwala no kuiyemfya ayalenga fwe bantu bakwe twapusanako na bantu ba muli ici calo.—Amala. 22:5; 1 Tim. 2:9, 10.
Abantu abengi mu calo tabakonka amafunde ya kwa Yehova. (Rom. 1:18-32) Bafwaya fye ukukonkelela ifyo abantu abengi bafwala no kuiyemfya e lyo ne fyo bacita. Abengi balailanga ilyo balecita ifyabipa kabili balasuusha abakonka amafunde ya kwa Lesa.—1 Pet. 4:3, 4.
Apo tuli Nte sha kwa Yehova, tufwile ukuba abashipa ilyo tulekonka amafunde ya kwa Lesa ayalanda pa kuba ne mibele iisuma. (Rom. 12:9) Kuti twacita shani ifi? Tulingile ukuba abacenjela ilyo tuleebako bambi pa fyo Lesa afwaya. Na kabili tufwile ukutwalilila ukuba ne mibele iisuma. Ku ca kumwenako, ilyo tulesala ifya kufwala na ilyo tuleipempenkanya tulingile ukuyipusha atuti: ‘Bushe ifyo nalamoneka ne fyo nalafwala fyalalanga ukuti ndakonka amafunde ya kwa Yehova nelyo nkonkelela aba muli ici calo? Bushe ifyo mfwala ne fyo moneka filanga ukuti ndi Mwina Kristu uutiina Lesa?’ Kabili ilyo tulesala ifya kutamba, kuti twayipusha atuti: ‘Bushe Yehova kuti afitemwa? Mibele nshi ilimo? Bushe kuti fyalenga nafilwa ukuilama? (Amalu. 101:3) Bushe kuti fyalenga napunwisha balupwa lwandi nelyo abantu bambi?’—1 Kor. 10:31-33.
Mulandu nshi ukukonka amafunde ya kwa Lesa ayalanda pa kuba ne mibele iisuma kwacindamina? Nomba line Kristu Yesu ali no konaula bonse abacita ifyabipa. (Esek. 9:4-7) Abacita ukufwaya kwa kwa Lesa e bakapusuka fye. (1 Yoh. 2:15-17) Kanshi natutwalilile ukuba ne mibele iisuma pa kuti abantu balecindika Lesa.—1 Pet. 2:11, 12.
Bushe ifya kufwala nsala ne fyo mfwaya ukumoneka filanga ukuti mibele nshi nakwata?
TAMBENI VIDIO ITILA BENI CIBUSA WA KWA YEHOVA—UMWAUME UMO NO MWANAKASHI UMO, KABILI LANSHANYENI IFI FIPUSHO:
Mulandu nshi ukukonkela amafunde ya kwa Yehova kwawamina?
Mulandu nshi abafyashi balingile ukusambilishisha abana babo amafunde ya kwa Yehova ayalanda pa kuba ne mibele iisuma ilyo bacili abaice?
Bushe abacaice na bakalamba kuti bayafwa shani abantu ukunonkelamo mu busuma bwa kwa Lesa?