Umukululo wa Mepusho

◼ Bushe imifwalile yesu ilingile ukuba shani ilyo twaya mu kutandala ku fifulo apabombelwa umulimo wa kwa Yehova?

Mu calo fye conse, Amayanda ya Bufumu, Ifikuulwa fya Kulonganinamo Ukulongana Kukalamba, amayanda ya Bethel, na maofeshi ya Nte sha kwa Yehova fifulo ifyashila pantu fibomfiwa fye ku mulimo wa kwa Yehova epela. Ifi fikuulwa fyaba fye ifyalinga, ifya busaka, kabili filasungwa bwino, kanshi fimoneka fye ifyacindama. Fyalipusana apakalamba ne fikuulwa ifyo tumona ilingi line mu calo ca kwa Satana. Kanshi abaletandalila ififulo ifibomfiwa ku mulimo wa kwa Yehova na bo balingile ukumoneka ukuti babomfi ba kwa Yehova kabili balacita no kufwaya kwakwe.

Apo tuli Bena Kristu, ‘tulaishininkisha fwe bene nga bakapyunga wa kwa Lesa’ muli fyonse fye, ukubikako ne mifwalile yesu iisuma kabili iya mucinshi, e lyo ne fyo tuipempenkanya. (2 Kor. 6:3, 4) Na kabili tulingile ukuba ne mibele isuma. Inshita yonse fye, ifyo tufwala ne fyo tuipempenkanya filingile ukuba ifyalinga kabili fya mucinshi, ifilangilila ukuti tuli babomfi ba kwa Yehova. Tulingile ukulaibukisha ici cishinka maka maka ilyo tuletandalila amaofeshi yakalamba mu New York e lyo na maofeshi yambi ayanono ayaba mu calo conse.

Icitabo ca kuti Abaiteyanya Ukucita Ukufwaya kwa kwa Yehova calilanda pa mulandu cacindamina kuipempenkanya bwino no kufwala ifya kufwala fya mucinshi ilyotulebomba umulimo wa mwi bala na lintu tulesangwa ku kulongana kwa Bwina Kristu. Lyena, pe bula 138, paragrafu 3, citila: “Ibukisheni ukutila ishina ilya kuti Bethel ni ‘Ng’anda ya kwa Lesa.’ E ico, imifwalile, imisakwile, ne mibele yesu fifwile ukuba nga filya ciba pa kuya ku kupepa ku kulongana ku Ng’anda ya Bufumu.” Ici cishinte e co bonse bakasabankanya ba Bufumu abaletandalila Bethel, nampo nga bekala mupepi nangu nga bafumine ukutali, balingile ukulakonka. Nga balecita ifi, bakalangilila ukuti balatasha kabili ninshi balicindika ifi fifulo.—Ilu. 29:2.

Imifwalile yesu ilingile ukulangilila ukuti tuli bantu ‘abatila tutiina Lesa.’ (1 Tim. 2:10) Imifwalile nga ili iya mucinshi no kuipempenkanya nga natuipempenkanya bwino kuti fyalenga abantu ukucindika ukupepa kwa cine ukwa kwa Yehova. Lelo, bamunyinefwe na bankashi yesu bamo nga baletandalila ifikuulwa ifibomfiwa ku mulimo wa kwa Yehova, bafwala ifya kufwala ifyo bangalilamo, ifya busanku, nangu ifyabebauka. Abena Kristu tabalingile ukulafwala ifya kufwala fya musango yu inshita fye iili yonse. Mu mifwalile yesu, nga filya fine caba na muli fyonse ifyo Umwina Kristu acita, tufwaya ukulakonka ifishinte fisuma ifilenga abantu ukwishiba ukuti tuli bantu ba kwa Lesa abashaba nga bantu bambi aba muno calo. Ifwe tufwaya ukulacita ifintu fyonse ku kucindika Lesa.—Rom. 12:2; 1 Kor. 10:31.

E ico ilyo muletandalila amaofeshi yakalamba mu New York e lyo na maofeshi yanono ayaba muli ici cine citungu nangu ilyo muletandalila amaofeshi yanono yambi aya ku cifulo cimbi, nampo nga kale mwapanga ukutandala nangu mwile fye mu kutandalila ififulo fimbi fye e lyo mwasala no kupita kuli ifi fikuulwa, mulingile ukuipusha mwe bene amuti: ‘Bushe imifwalile yandi ne fyo njipempenkenye fili fye bwino, ifya busaka kabili ifya mucinshi ukulingana ne cifulo ndi no kutandalila? Bushe ifya kufwala fyandi kuti fyacindika Lesa mpepa? Bushe abantu bambi kuti bapumbulwa nangu bushe kuti bafulwa pa mulandu ne fyo ndemoneka?’ Lyonse mu mifwalile yesu ne fyo tuipempenkanya, shi “[natulepuulamika] isambilisho lya kwa Lesa, Umupusushi wesu, muli fyonse”!—Tito 2:10.