Bushe Kuti Twa-afwa Shani Abakasangwa ku Cibukisho?
1. Bunte nshi ubwa maka ubukapeelwa pa March 22, 2008?
1 Pa March 22, 2008, abantu abengi mu calo conse bakapokelela ubunte bwa maka. Abakasangwa ku Cibukisho bakomfwa pa lwa kutemwa ukukalamba ukwa kwa Yehova uko alanga pa kuteyanya icilubula ca bantunse. (Yoh. 3:16) Bakasambilila pa Bufumu ne fyo Yehova akabubomfya ku kupwishishisha ukufwaya kwakwe pe sonde. (Mat. 6:9, 10) Bakaimwena abene ifyo abantu ba kwa Lesa batemwana ne fyo baikatana kabili bakatemwa nga nshi ifyo tukabapokelela.—Amalu. 133:1.
2. Bushe kuti twakoselesha shani abasambi ba Baibolo abakasangwa ku Cibukisho?
2 Abasambi ba Baibolo: Bamo abakasangwako bakaba ni balya aba kuti e lyo tutendeke ukusambilila nabo Baibolo. Lekeni bamunyinefwe na bankashi yesu babeshibe. Bebeniko pa lwa kulongana kwa cila mulungu, kabili batandasheniko panono pa Ing’anda ya Bufumu. Kalanda we lyashi lya Cibukisho akakoselesha aba musango yu ukutwalilila ukusambilila pali Yehova. Pa kukoselesha abasambi benu, kuti na imwe mwalandako amashiwi ayo akalanda pa kukoselesha abekesa ku cibukisho.
3. Finshi twingacita pa kukoselesha bakasabankanya abaleka ukubomba abakasangwa ku Cibukisho?
3 Bakasabankanya Abaleka Ukubomba: Bamo abakasangwako ni bakasabankanya abaleka ukubomba. Mulingile ukubalilapo ukuyabaposha ne nsansa. Mwikalabepusha amepusho aya kuti kwati mulefwailisha fimo pali bena nangu ukulanda fimo ifingalenga baumfwa insoni. Nga papita fye inshiku shinono nangu imilungu inono, baeluda balingile ukuyatandalila abaleka ukubomba abasangilweko, ku kubatasha pa fyo babombeshe ukusangwako, kabili bakabeta na ku kulongana kwa cilonganino ukukonkelepo.
4. Bushe ifwe bonse kuti twayafwa shani abeni?
4 Abeni: Bamo abakasangwako limbi bakaba fibusa fyesu nangu balupwa wesu abo fwe bene twaita. Bambi nabo kuti limbi balipokeleko akapepala ka kubetilapo ku Cibukisho ilyo kwali kampeni yaibela. Nga mwamona abantu abo mushishibe, balilenipo ukuilondolola kuli bena no kubapokelela. Bambi limbi ukaba e muku wa kubalilapo uo bakasangwa ku kulongana kwesu. Ilyo mukalalanda na bo, kuti mwaipusha ne fyo mwingamonana nabo na kabili. Nga mwabatandalila nelyo nga mwabatuminako foni nga papita fye inshiku ishinono pa numa ya Cibukisho, kuti mwabakoselesha ukusambilila na fimbi no kubeba pa lwe sambililo lya Baibolo.
5. Finshi nalimo twingalanda pa kutendeka isambililo lya Baibolo?
5 Ilyo mulecita icipempu ca kubwelelamo, kuti mwalandako ifyebo fyali mu lyashi lya Cibukisho pa kubapeela icitabo citila Ico Baibolo Isambilisha. Ica kumwenako, kalanda we lyashi lya Cibukisho akabelenga Esaya 65:21-23. Nga mwabwelela mukuyamona umuntu uwaishile ku cibukisho, kuti mwayalanda pa lyashi no kusosa amuti, “Lekeni mulange amapaalo na yambi ayo icilubula cikaleta.” Lyena landeni nabo ifyebo fyaba pa mabula 4 na 5 mu citabo citila Ico Baibolo Isambilisha. Nangu limbi kuti mwasosa amuti, “Abantu abengi tabaishiba bwino ilyo ubusesemo bwa kwa Esaya bukafikilishiwa.” Lyena lanshanyeni na bo amaparagrafu 1 ukushinta ku 3 mu cipandwa 9. Inshila na imbi iyo mwingabomfya pa kutampa isambililo lya Baibolo kulanda fimo fimo ifyo kalanda we lyashi lya Cibukisho alandile, e lyo mwabalanga icitabo citila Ico Baibolo Isambilisha, no kubalangilila ifyo isambililo liba.
6. Lishuko nshi ifwe bonse tukwete ilyo tulekonka ifunde lya kwa Yesu ilya kulaibukisha imfwa yakwe?
6 Shi lekeni ifwe bonse umo umo tukashukile ishuko lya kwafwa abasambi ba Baibolo, bakasabankanya abaleka ukubomba, na beni abakasangwa ku Cibukisho. (Luka 22:19) Ukwabula no kutwishika Yehova akatupaala nga twabombesha mu mulimo wesu uwa Bufumu.