Tukashimikila Sana
1. Ukulunda pa lyashi, cinshi cimbi icingafika pa mitima ya beshile ku Cibukisho? Londololeni.
1 Lilali? Pa bushiku bwa Cibukisho. Tulebombesha ukwita abantu ukwisasangwa ku Cibukisho. Kwena, icifika abantu pa mutima, te lyashi fye lya Cibukisho ilyo bomfwa. Umwanakashi umo uwasangilwe ku Cibukisho alandile na pa fyo amwene, e kutila, ifyo abantu bali ne nsansa kabili aba busaka, ne fyo icikuulwa cali ica busaka ico baikuulile abene kabili ico basunga bwino. E co te kalanda fye eka ashimikila, lelo ifwe bonse tulabombako umulimo wa kushimikila pali iyi nshita yacindamisha mu mwaka.—Efes. 4:16.
2. Bushe ifwe umo umo kuti twashimikila shani ku beni abeshile ku Cibukisho?
2 Posheni Abeshile ku Cibukisho ne Nsansa: Ukuposha abeni ne nsansa no kumwentula ni nshila imo iya kubashimikila. (Yoh. 13:35) Nangu ca kutila teti mulande na bonse abeshile, kuti mwailondolola ne nsansa kubo mupalamine nabo. (Heb. 13:1, 2) Bikeni amano ku beni abalemoneka ukuti tabeshibepo nangu umo. Kuti pambi bapokelele fye akapepala ka kubetilapo ku Cibukisho. Kuti mwabepusha ukuti, “Bushe e muku wa kubalilapo mwaisako kuno?” Ikaleni nabo no kubeba ukuti nga balefwaya ukwipusha icili conse, kuti baipusha. Nga ca kuti icilonganino cenu e cibalilepo ukulongana, nga mwafuma kuti mwatila: “Bushe ilyashi lyaciba shani? Kuti namusanga kwi nga ndefwaya ukumumona?”
3. Bushe kuti twapokelela shani abanaka?
3 Pokeleleni Abanaka: Ukwabula no kutwishika, bakasabankanya abanaka na balya abesa fye ku kulongana limo pa mwaka ku Cibukisho, nabo bakabako. Bapokeleleni, kabili lekeni beshibe ukuti muli ne nsansa sana pa kubamona. (Rom. 15:7) Baeluda balingile ukuyatandalila aba musango yu ku mayanda yabo pa numa fye ya Cibukisho ku kubakoselesha ukutwalilila ukulongana. Tulepepelela fye ukuti abengi abakasangwako bakakoseleshiwe ukucindika Lesa te pa mulandu fye wa kumfwa ifyebo lelo na pa mulandu wa ‘kumona imilimo yesu iisuma.’—1 Pet. 2:12.