Balenge Ukuyumfwa Abapokelelwa ku Cibukisho
1 Mu myaka inono iyapitapo, ni umo fye pa bantu basano abalesangwa ku Cibukisho e wali kasabankanya wa mbila nsuma. Mu kupalishako e fyo cikaba na uno mwaka. Bamo kuti basangwako pa mulandu wa kukoselesha kwa kwa lupwa wabo nelyo uo baishibana nankwe uwikala mu musumba umbi, ilintu bambi kuti pambi balaalikwe na bakasabankanya mu ncende bekala. Nalyo line bambi abasangwako, nangula ca kuti balibatishiwa, tababa na kabili abacincila mu butumikishi. Mu kufumaluka tulesengela bonse abo abalangisha umucinshi kwi kambisho lya kwa Yesu ilya kuti: “Citeni ici ku kunjibukisha.”—1 Kor. 11:24; Rom. 15:7.
2 Abapeelwe umulimo nga bakapyunga balingile ukuba abaswatuka ukusengela uuli onse, maka maka umupya, ilyo alefika mu Ŋanda ya Bufumu. Nangu cibe fyo, ifwe bonse kuti twayakanamo mu kukonka inshila ya cileela pa Cibukisho. (Rom. 12:13) Shani?
3 Pali cilya cungulo bushiku bakasabankanya bamo bakaba abapamfiwa ukupayanishisha abalesekelela imyendele. Bambi kuti pambi baba na maka ya kufika mu kubangilila pa kuti bengabapo ku kuposha abatandashi abaleishila abene. Lintu umweni aingila, muposhe mu kukaba, kabili tendeka ukulanshanya na wene. Mwipushe nga ca kuti alishibamo uuli onse mu cilonganino cenu. Nga ca kuti alishibamo umo, musakamane ukufikila uyo muntu baishibana nankwe afika. (Linganyako Luka 10:35.) Nga ca kuti taishibamo uuli onse, mulandu nshi te kumulaalika ukwikala nobe mu kati ka kulongana? Mulondolwele ifyo waini no mukate fyalabomfiwa mu kati ka programu. Kuti pambi akabila ukwaafwa kobe mu kufwaya amalembo yaleambulwa kuli kalanda.
4 Pa kusondwelela kwa kusefya kwa Cibukisho, muleke eshibe ukuti nutemwa ukuti aciisa. Kuti pambi aba ne fipusho pa lwa mulimo wesu ifyo pambi wingasuka. Ubuseko bwa pa lobe limbi kuti bwatungulula ku kulanshanya pa mutwe umo uwa mu Baibolo, atemwa pa Ŋanda ya Bufumu nelyo ukuli konse kumbi. Amasambililo yamo ayawamisha yalitendekwa kuli bamunyina abaswatuka ababuula uku kuitendekelako kwatashiwa. Ilyo ashilafuma pa Ŋanda ya Bufumu, mulondolole kuli bambi, kabili mu kukaba mulaalike ukubwela.
5 Mwandi buseko ukupokelela bamunyinefwe batemwikwa ne nkashi abashisangwa ku kulongana lyonse nelyo abaleko kubomba mu butumikishi pa nshita yalepako! Ukucila ukulabepusha ifipusho pa lwa mulandu bashisangilwa ku kulongana, lumbulula fye ubuseko bobe ubwa kubamona ukwisa. Napamo icintu cimo ico balaumfwa mu lyashi lya Cibukisho cikabakunta ukupimununa cipya cipya ukwampana kwabo ukwaipeela na Yehova. Ukubapokelela kwakaba no kwangwako kwine kwine uko ulangisha kuti fyayambukila imitima yabo. Baleke beshibe ukuti ulelolesha ku ntanshi ku kubamona na kabili.—Rom. 1:11, 12.
6 Ilyashi lya cintubwingi ilyaibela ilikwete umutwe wa kuti “Ubutotelo bwa Cine Bulekusha Ukukabila kwa Sosaite wa Buntunse” likapeelwa mu filonganino ifingi pa April 10. Shininkisheni ukuti bonse abasangwa ku kusefya kwa Cibukisho nabalaalikwa no kwafwiwa ukusangwako. Cili lisubilo lyesu ukuti abo abalesangwa kuli uku kulongana kwaibela kubili bakayumfwa abapokelelwa kabili bakakumanya umupashi wakaba uwa kubishanya pa kati ka bantu ba kwa Yehova.—Amalu. 133:1.