Tukabapokelele Bwino!
1. Ni nshita nshi tukwata sana ishuko lya kushimikila, kabili mulandu nshi?
1 Takwaba inshita imbi mu mwaka ilyo tukwata sana ishuko lya kushimikila abantu abengi nge nshita ya Cibukisho. Ku ca kumwenako, uno mwaka tuleenekela ukuti abantu ukucila pali 10 milioni bakesa ku Cibukisho no kumfwa inshila shibili umo Lesa ala-angile ukuti alitutemwa pali ifi atupeela icilubula. (Yoh. 3:16; 15:13) Abakesa ku Cibukisho bakasambilila na pa mapaalo ayo bengaipakisha pa mulandu wa bupe Yehova atupeela. (Esa. 65:21-23) Na lyo line kalanda te ukalashimikila fye eka pali ubu bushiku. Bonse fwe bakasangwako tukakwata ishuko lya kubashimikila ukupitila mu kubapokelela bwino sana.—Rom. 15:7.
2. Kuti twapokelela shani bwino abeni abakesa ku Cibukisho?
2 Mu nshita ya kufika fye no kwikala, twalalolela ukuti ukulongana kutendeke, kuti cawama twaitendekelako ukuilondolola kubo twikele nabo mupepi. Limo abeni kuti limbi baba no mwenso, kabili te kuti beshibe ne fyo tusefya Icibukisho. Kanshi nga twabaposha ne nsansa bakomfwa ukuti na tubapokelela. Pa kwishiba nga ca kuti abeshile ku Cibukisho babalaliike fye, kuti mwabepusha nga balisangwapo ku kulongana kwa Nte sha kwa Yehova nelyo nga balishibako uuli onse mu cilonganino. Napamo, kuti mwaikala nabo pamo pa kuti mulebomfya bonse Baibolo no lwimbo. Kabili nga ca kuti mukalonganina mu Ng’anda ya Bufumu, kuti mwa batandashako na pa Ng’anda ya Bufumu ilyo ukulongana takulatendeka. Pa numa ya kulongana, bepusheni nga ca kuti nabakwatapo amepusho ayali yonse. Nga ca kuti mwalafumamo bwangu mu Ng’anda ya Bufumu pa mulandu wa kuti kuli icilonganino cimbi icalakonkapo, kuti mwatila: “Ndefwaya ukumfwa ifyo muletontonkanya pa fyo twacisefya Icibukisho. Kuti namusanga kwi?” Lyena, pekanyeni ukuya bamona ilyo tapalapita inshita iitali. Baeluda maka maka balingile ukubika amano ku baleka ukulongana abakesa ku Cibukisho no kubakoselesha.
3. Mulandu nshi cicindamine ukuti tukapokelele bwino abeni abakesa ku Cibukisho?
3 Ku beni abengi abakesa, uyu ukaba e muku wa kubalilapo ukumona insansa, umutende, e lyo no kwikatana uko tuipakisha muli paradaise ya ku mupashi iyo twabamo. (Amalu. 29:11; Esa. 11:6-9; 65:13, 14) Kanshi ifyo tukabapokelela e fyo bakalaibukisha sana Icibukisho nga capwa.