Umukululo wa Fipusho

◼ Tufwile ukufwala shani no kusakula ilyo tuletandala pa mayanda ya Bethel ne ncende ya maofesi ya misambo?

Ilyo tuletandala ku Bethel, nampo nga kuyamona fye icifulo nelyo kuyatandalila ababa mu lupwa lwa Bethel, “ukufwala kwesu, ubusaka ne myendele fifwile ukupala ku cilecetekelwa ulwa ifwe lintu tulesangwa ku kulongana kwa kupepa ku Ng’anda ya Bufumu.” (om-CW 131) Na lyo line, calimonwa ukuti lintu baletandalila amaofesi ya musambo, bamo bamunyina na bankashi bafwala ifishabamo umucinshi sana. Ifyo tafifwaikwa ilyo muletandalila ishi ncende. Imimonekele yesu ifwile ukuba iisuma sana, iyalinga kabili iyapempenkana ukulanga ukuyana no mucinshi ifyalinga abantu ba kwa Yehova Lesa. Ilyo bamo batandala ku Bethel, balacilamo ukufwala umo balefwaila, nalimo ukwabula ukwingisha ishati, ukufwala bashikipa balembwapo amashiwi yamo nelyo ifya kufwala fya pa kwangala. Bushe kuti caba bwino ukutandala ne fya kufwala fya fiko? Iyo. E ico, tufwaya ukutwalilila ne fipimo fipaatula abantu ba kwa Lesa ku calo. (Rom. 12:2; 1 Kor. 10:31) Tatufwile ukwangusha ubucindami bwa kusambisha no kucapa ifya kufwala fyesu. Ukumoneka ne fiko nelyo ukununka ubwema bwabipa filanga ukukanatemwa abanensu. Apo bumushilo no busaka fyalumbulwa pamo mu Baibolo, tufwile ukupoosako amano ku busaka bwesu ilyo tushilatandala.—Ukufu. 30:17-20; 1 Tim. 2:9, 10.

Ici calicilapo ukucindama maka maka ilyo tuletandala pa mayanda ya Bethel ne ncende ya maofesi ya musambo pantu abatandashi balamonwa ku bengi abashili baNte. Abamonako kuti balatunganya pa lwa bantu ba kwa Lesa no kuteyanya kwakwe ukulingana na fintu bamona. Kuti cawama ukulanda na basambi ba Baibolo na bambi abengatandala ukubacinkulako ulwa bucindami bwa kusakamana imifwalile yalinga ne misakwile. Ulupwa lwa Bethel lukatasha nga nshi nga mwacita ifyo.

Apo tuli bakapyunga ba Bwina Kristu, tufwile ukwangwako pa kuti imimonekele yesu taipunwishishe bambi. (2 Kor. 6:3, 4) Lelo, shi imimonekele yesu iisuma, lyonse ‘nailepulamika isambilisho lya kwa Lesa Umupusushi wesu muli fyonse.’—Tito 2:10.