Ukufwala Ukuyene Kulanga Akatiina Kuli Lesa
1. Kuti twacita shani pa kutasha pa kulongana kuleisa ukwa citungu?
1 Nomba line fye tukakaba ne shuko lya kuba abeni ba kwa Yehova pe Bungano lya Citungu ilileti “Peeleni Lesa Ubukata” ilya 2003. Tuletasha Yehova pa kutulaalika ku mutebeto wa ku mupashi ngo yu! Kuti twalanga akatiina kuli wene no kumutasha pa kupekanya ifya ku mupashi, mu mifwalile ne misakwile yesu.—Amalu. 116:12, 17.
2. Mulandu nshi cacindamina kuli ifwe ukubela no busaka kabili abapempenkana?
2 Aba Busaka Kabili Aba muyano: Imimonekele yesu ifwile ukulanga ififwaya Lesa wesu uwa busaka kabili uwa muyano. (1 Kor. 14:33; 2 Kor. 7:1) Fwe bene, umushishi, ne ngala, fifwile ukumoneka bwino, kabili tufwile ukuba abapempenkana. Ubusanku mu mimonekele nabuseeka shino nshiku. Lelo pa mulandu fye wa kuti abalumbuka mu mafilimu nelyo mu mangalo balemoneka aba busanku uyu tauli mulandu wa kumonekala no busanku. Nga tulekonkelela amafashoni fye yonse, abantu kuti bafilwa ukumona ubupusano pa babombela Lesa wa cine na bashimubombela.—Mal. 3:18.
3. Bushe kuti twashininkisha shani ukuti imimonekele yesu ileumfwana no kufunda kusangwa pali 1 Timote 2:9, 10?
3 Ukufwala Kuyene Abatumikishi ba Bwina Kristu: Ilyo umutumwa Paulo alembeele kangalila wa Bwina Kristu Timote, akoseleshe abanakashi ati: “Abanakashi ukufwala bafwale ukuyene, pamo no bufuuke na mano ayatuntulu, . . . mu nshila iyayana abanakashi abatila tutiina Lesa, ukupitila mu milimo isuma.” (1 Tim. 2:9, 10) Pa kuti ukufwala kuyane, icikabilwa kutontonkanya bwino sana. Ifya kufwala fifwile ukuba ifyapempenkana, ifya busaka, kabili ifya bufuuke—te fya mataki nelyo ifibimbula insuna.—1 Pet. 3:3.
4, 5. Kusoka nshi Abena Kristu abaume na banakashi bafwile ukumfwila?
4 Paulo asokele pa kukanacishamo mu “[kuipuulamikila] imishishi iyalukwa, na golde nangu ni bamargariti nelyo ica kufwala ca mutengo sana.” (1 Tim. 2:9) Ukukanacishamo mu kubomfya ifibekobeko, ifya kusubasuba, ne fintu fimbi ifya kuipuulamikilako, e nshila ya mano ku banakashi ba Bwina Kristu ukukonka.—Amapi. 11:2.
5 Ifishinte fyaba mu kufunda kwa kwa Paulo uko alungatike ku Bena Kristu abanakashi filabomba na ku Bena Kristu abaume. Bamunyina tabafwile ukupala aba ku calo mu fyo bamoneka. (1 Yoh. 2:16) Ku ca kumwenako, mu fyalo fimo, ifimatoloshi ifikulu icine cine ifya kuti filesensela no kusensela fyaliseeka, lelo imifwalile yabe fi tayalinga ku babomfi ba kwa Lesa.
6. Mulandu nshi tufwile ukumonekela bwino sana mu mifwalile ne misakwile ilyo tuleya kwi bungano na lintu tulebwela, ilyo tuli pe bungano, na pa numa ye bungano cila bushiku?
6 Ilyo Mulelesha Icitendwe: Ilyo bamunyina ne nkashi abengi bali pe bungano, balemika ica kumwenako cisuma sana mu mifwalile ne misakwile. Lelo, calishimikwa ukuti bamo balaba no busanku pa kuya na pa kufuma ku mabungano nelyo ilyo balelesha icitendwe pa numa ye bungano. Lelo ukulanda fye cine, ifyo tumoneka—pe bungano nelyo pa nshita shimbi—kulalenga abantu bambi ukusuula abantu ba kwa Lesa nelyo ukubatasha. Apo tulafwala baji ye bungano, lyonse tufwile ukufwala ifya kufwala ifilingile abatumikishi ba Bwina Kristu. Ici ilingi line cilenga bambi ukututasha no kulenga tushimikile.—1 Kor. 10:31-33.
7. Cinshi cingafuma mu kufwala kwayana ne misakwile isuma?
7 Filya fine ukumwentula kulenga icinso ukumoneka bwino, e fyo no kufwala kwayana kucindamika ubukombe tubilisha no kuteyanya twimininako. Bamo abakatumona pa nshita ye Bungano lya Citungu ilileti “Peeleni Lesa Ubukata” uno mwaka limbi kuti baipusha umulandu twapusaninako na mu kuya kwa nshita napamo kuti batila: “Tuleya na imwe, pantu natuumfwo kuti muli na Lesa.” (Seka. 8:23) Shi ifwe bonse natube na katiina kuli Yehova mu mifwalile ne misakwile.
[Akabokoshi pe bula 5]
Monekeni Aba Mucinshi
▪ Ilyo muli pa lwendo
▪ Ilyo muli pe bungano
▪ Ilyo muleleshe citendwe