Imimonekele Isuma Kabili Iya Mucinshi
1. Ilyo tuleipekanya ukusangwa ku kulongana, cinshi tulingile ukutontonkanishisha pa fyo tukalamoneka?
1 Umubomfi ubombela pa hotela alandile pali bamunyinefwe ne nkashi abasangilwe ku kulongana kwa citungu uyu mwaka wapwile ati: “Inte sha kwa Yehova bantu abasuma! Abantu benu ba cikuuku, balafwala bwino, kabili ba mucinshi icine cine.” Pa kulongana na kumbi, uubombela pa hotela atile: “Cishinka ukuti ifyo mufwala filatemuna Lesa.” Ca cine, abantu bambi balamona ifyo abasangilwe ku kulongana kwa citungu balemoneka. E ico ukufwala kwesu kufwile ‘ukuwamine mbila nsuma,’ kabili ici e cilenga bambi ukututasha no kutumona ukuti cine cine twatumwa na Lesa. (Fil. 1:27) Ilyo tuleipekanya ukusangwa ku kulongana kwa citungu, tulingile ukutontonkanya pa fyo imimonekele yesu ikaba.
2. Cinshi cayafisha ukufwala bwino?
2 Umusambi Yakobo alembele ati: “Amano ayafuma mu muulu pa kubala ya musangwela.” (Yako. 3:17) Ukuba abamusangwela mu mimonekele yesu kuti kwa-afya. Icalo cabipa ica kwa Satana cilenga abantu ukufwala ifya kufwala fishalinga kabili ifibimbula. (1 Yoh. 2:15-17) Kanshi, ilyo tuletontonkanya pa fyo twalafwala e lyo ne mimonekele yesu, tulekabila ukumfwila ukufunda kwa mu Baibolo ukutila “tukaane ukubulapepa ne fya lunkumbwa fya pano calo no kwikala aba mano ayatuntulu . . . muli buno bwikashi bwa ndakai.” (Tito 2:12) Tatufwaya ukupumfyanya bambi ku fyo tufwele, nampo nga ni bamunyinefwe nelyo bantu bambi abatumona.—1 Kor. 10:32, 33.
3. Mepusho nshi yakatwafwa ukubebeta imimonekele yesu?
3 Ukufwala Ukusuma Kabili Ukwayana: Ilyo muleipekanya ukusangwa ku kulongana kwa citungu ipusheni amuti: ‘Bushe ifyo mfwele fili bwino, nelyo bushe kuti fyalenga abantu ukubika amano kuli ine? Bushe fya kufwala fya mucinshi ifishingalenga bambi ukupunushiwa? Bushe ica kufwala candi ica ku muulu cipi nelyo cilasha icifuba pa mbilibili? Bushe amalaya yandi yalabimbula nelyo yalipapatila? Bushe ifya kufwala fyandi fya busaka kabili tafikwete icena cabipa? Ilyo ndetuusha pa numa ya kulongana, bushe nkalamoneka uwa busaka kabili uwapempenkana ngo mubomfi wa kwa Lesa, nelyo bushe nkalamoneka uwailekelesha, ne mifwalile iyabipa, iyacishamo kabili iishalinga ukufwala uufwele baji ya pa kulongana kwa citungu? Bushe ifyo mfwala ilyo ndelesha icitendwe kuti fyanenga ukukanashimika ubunte bwa mu lyashi?’—Rom. 15:2, 3; 1 Tim. 2:9.
4. Bushe bambi kuti batwafwa shani ukumoneka abasanguluka?
4 Ifyo Abena Kristu bakosoka bengalandapo kuti fyatunonsha. Abakashi bafwile ukwipusha abalume babo ifyo bambi bengamona ifyo bafwele. Abafyashi abapepa kuti bayafwa abana babo abapungwe. Na kabili, bankashi abakalamba abatiina Lesa kuti ‘bacinkulako abakashana . . . ukuba na mano ayatuntulu, aba musangwela’ mu mimonekele pa “kuti icebo ca kwa Lesa ciipontelwa.” (Tito 2:3-5) Mu mpapulo shesu mwaba ifikope ifisuma ifilanga ukufwala ukusuma kabili ukwayana.
5. Bushe ifwe bonse kuti twalumbanya shani Yehova ilyo tulelongana ukulongana kwa citungu?
5 Natulumbanye Yehova: Ifwe bonse tulakwata ishuko lishaiwamina ilya kulumbanya Yehova pa kulongana kwa citungu, te balya fye balanda amalyashi beka. Kwena imisango yesu iya Bwina Kristu ne fyo tukalalanda fikacindika Lesa. Lelo ico abantu balolekesha sana kuli ifwe, mimonekele yesu. Shi ifwe bonse natulumbanye Yehova pa kuba ne mimonekele isuma kabili iya mucinshi.—Amalu. 148:12, 13.
[Akabokoshi pe bula 6]
Ifya Kumwafwa Ukuba ne Mimonekele Isuma
◼ Icebo ca kwa Lesa
◼ Ukuibebeta
◼ Ifyo bambi bengalandapo
◼ Impapulo sha Bwina Kristu