Tooteleni Yehova mu Lukuta Ulukalamba
1, 2. Lishuko nshi ukulongana kwa citungu kutupeela, kabili cinshi twingacita pa kuti ico cicitike?
1 Ukulongana kwa citungu ukubako cila mwaka kulatupeela inshita ya kucindika Yehova. Tumfwa nga filya Davidi aumfwile ilyo aimbile ukuti: “Nkamutootela mu lukuta lukalamba; nkamutashisha mu bantu abengi.” (Amalu. 35:18) Pa Kulongana kwa Citungu tukakwata ukuleti “Icumfwila ca Bukapepa,” cinshi bonse capamo tufwile ukucita pa kuti abantu bakalumbanye Yehova?
2 Cimo ico twingacita kuba ne myendele isuma. Abalashi ba cifulo cimo icabomfiwe pa kulongana kwa citungu batile: “Twalyeba amacalici yambi abalefwaya ukwashima cino cifulo ukumona ifyo Inte sha kwa Yehova bateyanya bwino ukulongana kwabo pa kuti na bo e fyo balecita nga bayashima.” Imimonekele yesu, icumfwila, e lyo ne myendele yesu kuti fyalenga abantu ukulumbanya Lesa wesu, uwawaminwa ilyo ilumbo.—1 Pet. 2:12.
3, 4. Bushe ukufuuka kukatwaafwa shani ukufwala ifyayana ku Bena Kristu, ilyo tuli pa kulongana na pa numa ya kulongana?
3 Imimonekele Yesu: Pa kuti imifwalile yesu ne misakwile filete ilumbo kuli Yehova tukabila ukuba abafuuka. (1 Tim. 2:9) Icitabo ca Nonkelenimo pe bula 132 citila: “Umuntu wafuuka alasakamana sana ukukanakalifya bambi na pashilingile, no kukanalenga bambi ukupoosesha amano kuli wene.” Mu fyalo ifingi, ukukanafwala bwino nakuseeka nga nshi. Lelo Yehova alatemwa sana pa fyo intumi shakwe shifwala bwino. (Imil. 15:14) Pa cifulo conse apabela ukulongana kukalamba, balya abalongana pamo pa nshiku shitatu baba “ulukuta lukalamba.” E ico ilyo tulongene pa ntanshi ya kwa Yehova, tufwile ukufwala ifya mucinshi pantu twisa pa menso ya Wapulamo.—1 Imila. 29:11.
4 Tufwile no kumoneka bwino pa mpela ya kulongana cila bushiku. Nangu twingafwaya ukufwala ifya kufwala fimbi ifyo twingatemwa ilyo twile ku kulya mu fifulo umuliila icinabwingi, lyonse tufwile ukwibukisha ukutila calicindama ukufwala ifya kufwala fyalinga ku bantu “abatila tutiina Lesa.” (1 Tim. 2:10) Ifya kufwala fisuma te filya aba ku calo bafwalako iyo. (1 Yoh. 2:16, 17) Mu mpapulo shesu isha Bwina Kristu mwaba ifikope fya bantu abafwala bwino ilyo balecita ifyalekanalekana. Ukufwala amabaji yesu ilyo tuli mu musumba umubelele ukulongana kukalatucinkulako ukuti tuli Bena Kristu inshita yonse.—2 Kor. 6:3, 4.
5, 6. Kuti twalanga shani umucinshi kwi tebulo lya kwa Yehova?
5 Cindikeni Itebulo lya kwa Yehova: Shikulu Mulopwe uwapulamo nateyanya umutebeto. (Esa. 25:6; 1 Kor. 10:21) Nga ca kutila twalicindika sana icifulo twapeelwa pe tebulo lya kwa Yehova ilya ku mupashi, tufwile ukusangwako ku kulongana inshiku shonse shitatu. Bushe mwalipekanya ukwa kwikala, ifyo mukenda, kabili bushe mwalipoka ulusa ku ncito? Bushe mukalaipekanya bwangu no kwima bwangu pa kuti mukalefika bwangu apa kulonganina no kufwaya apa kwikala, ukulanda na bamunyinenwe, no kulumbanishisha Yehova pamo na bo mu lwimbo lwa kwiswila ne pepo? —Amalu.147:1.
6 Ukucindika itebulo lya kwa Yehova kukatwafwa ukupoosa amano ku kulongana no kukanalalanda na bambi na pashilingile, atemwa ukulya nelyo ukwendauka. Yehova aletupeela ica kulya ca ku muapshi ico tulekabila pali ino nshita, ukupitila mu musha wa cishinka kabili uwashilimuka. (Mat. 24:45) Teti ciwame ukupuswa kuli ci ca kulya. Abafyashi bafwile ukwikala na bana babo no kubaafwa ukukutika pa kulongana. —Amala. 31:12.
7. Bushe batwebele ukucita cinshi pa fya kulya tukalya pa nshita ya kutuusha, kabili mulandu nshi?
7 Mukwai bonse tukeese ne fya kulya fyesu pa kuti twikafuma pa cifulo ca kulonganinapo ku kufwayafwaya ifya kulya pa nshita ya kutuusha. Umwaka wapwile caliweme, pantu abengi balishile ne fya kulya fyabo ku kulongana. Kuti cawama nga nshi nga ca kuti na uno mwaka bonse twaisa ne fya kulya fyesu! (Heb. 13:17) Nga twacite fi kuti twakwata inshita ya kulanda na bamunyinefwe kabili kuti twaba abaikatana no kuba pa mutende na bo, ne ci kuti caleta umucinshi kuli Yehova.—Amalu. 133:1.
8, 9. Bushe twakwata amashuko nshi na yambi aya kulumbanishishamo Yehova ilyo kwabo kulongana kwa citungu?
8 Ukushimikila Abantu mu Lyashi Fye: Ilyo tuleya ku kulongana na pa kubwela, tukalaba na mashuko ayengi aya kulumbanya Yehova ku milomo yesu. (Heb. 13:15) Nampo nga tuleliila apo icinabwingi baliila ifya kulya, tuli pa lwendo nelyo tuleshita ifya kushitashita, tuleesha ukushimikako ubunte. Imintontonkanya yesu ne mitima ikesulamo ifya ku mupashi ifyo tukasambilila ku kulongana. Natwebeko na bantu bambi ifi fintu fisuma ilyo tulelanda na bo ilyashi.—1 Pet. 3:15.
9 Tulefwaisha ukulumbanya Yehova “mu nkuta.” (Amalu. 26:12) Shi natukalumbanye Yehova capamo pa Kulongana kwa Citungu ukuleti “Icumfwila ca Bukapepa.”
[Akabokoshi pe bula 6]
Ifyo Tufwile Ukwibukisha pa Kulongana kwa Citungu
◼ Inshita ya Kulongana: Ukulongana kukalatendeka ne nshita ya 8:45 hrs inshiku shonse shitatu. Ilyo kwashala panono ukuti ukulongana kutendeke, ceyamani akekala pa cisebele ilyo inyimbo sha kutendekelako shilelila. Bonse tufwile ukwikala ilyo ishi nyimbo shilelila pa kuti ukulongana kukatendeke mu mucinshi. Ukulongana kukapwa ne nshita ya 16:05 hrs pa bushiku bwa kubalilapo na pa bushiku bwa bubili, kumfwa pa bushiku bwa butatu ukulongana kukapwa ne nshita ya 15:30 hrs.
◼ Ukusungila Bambi Ifipuna: Ifipuna kuti fyasungilwa fye abo mwendele na bo muli motoka nelyo abo mwikala na bo ing’anda imo.
◼ Imisangulo: Indalama shipooswa pa kupekanya ukulongana kwa citungu shingi. Umwingamonekela ukutasha kwesu ni mu kusangwilako ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Nga ca kutila mwasangwilako Cheque pa kulongana mufwile ukulembapo ukuti ipeelwe ku “Watch Tower.”
◼ Ica Kulya ca Kasuba: Mukwai mukese ne fya kulya fyenu pa kuti mwikalafuma pa cifulo ca kulonganinapo ku kufwaya ifya kulya pa nshita ya kutuusha. Kuti mwasendela ifya kulya mu cipe cinono icingekala mwi samba lya cipuna. Te kwesha ukwisa ne fipe fya kubikamo ifya kulya ifikalamba sana, nangu kwisa ne fipe fya makalashi, nangu kwisa no bwalwa apo tukalonganina.
◼ Ifya Kukopelako: Ifya kukopelako, nampo nga fya mashiwi nelyo ifikope, tafifwile ukusomekwa ku malaiti yalebomfiwa pa cifulo ca kulonganinapo kabili mufwile ukubomfya ifi fintu ukwabulo kupumfyanya bambi.
◼ Ukukopa Ifikope: Nga mulekopa, mwikabyasha ilaiti lya kuli kamera ilyo amalyashi yalelandwa.
◼ Amafoni ya Kwenda na yo: Mukwai mwikaleka ifi fibombelo ukupumfyanya abantu pa kulongana.
◼ Amasanso na Malwele ya Kupumikisha fye: Nga kwapona amalwele yabulo kwenekela pa cifulo ca kulonganinapo, landeni na kapyunga ali mupepi na imwe uukeshibisha Dipartimenti ya First Aid pa kuti abasambilila ifya kuundapa beshibe ica kucita pali ubo bwafya.
◼ Icishibisho: Pa numa ya mweshi umo nelyo ibili nga mwalongana Ukulongana kwa Citungu ukuleti “Icumfwila ca Bukapepa,” mufwile ukushako amaminiti 15 ukufika ku 20 mu Kulongana kwa Mulimo (nakalimo kuti mwabomfya amaminiti ya lyashi lya kukabila kwa pa mwenu) pa kuti mukapituluke mu fyo mwasambilile pa kulongana ifileafwa bakasabankanya ukubomba bwino umulimo wa kubila. Uku kulanshanya kwaibela ukukaba mu Ukulongana kwa Mulimo kukatupeela inshita ya kulanda ifyo tulebomfya ifishinka twasambilile pa kulongana kwa citungu ne fyo filetwafwa ukubomba bwino umulimo wa kubila.