Konkeni Kristu pa Kuba no Mucinshi

1. Ni shani fintu umutwe wa kulongana kwa citungu ukwa uno mwaka ukumine inshila tulangilamo umucinshi?

¹ Baibolo ilondolola Yehova ukuti ni Mfumu ya Bubumbo bonse, uwaba kwati nafwala ifya kufwala fya mucinshi. (Amalu. 104:1) Fyonse ifyo Yesu alelanda ne fyo lyonse alecita, alecindika Wishi no kutantika kwa kwa Wishi. (Yoh. 17:4) Ilyo tukalalongana Ukulongana kwa Citungu ukuleti, “Konkeni Kristu!” tukakwata inshita iisuma iya kupashanya Yesu no kucindika Yehova.

2. Bushe kuti twacindika shani Yehova ilyo tulepekanishisha iciputulwa cimo cimo ica kulongana?

² Ukulanga Umucinshi Ilyo Tuli pa Kulongana: Nga twatantika ukuti tukasangweko ku mutebeto wa ku mupashi uo batupekanishishe, tukacindika Yehova. Bushe mwalipokela limo ulusa kubo mubombako incito, kabili bushe mwalitantika bwino ifintu pa kutila mukasangweko inshiku shonse shitatu? Bushe mukalafika pa kulongana ilyo kucili nshita pa kuti mwafwaila limo apa kwikala no kwimbako ulwimbo lwa kwiswila no kumfwako ipepo lya kubalilapo? Bushe mukalasenda ifya kulya ukufuma ku ng’anda pa kutila mukalelila pa cifulo ca kulonganinapo ilyo muli pamo na bamunyinenwe? Pa kutendeka kwa ciputulwa cimo cimo ica kulongana, lintu ceyamani atweba ukwikala pa fipuna ilyo inyimbo tashilatendeka, tufwile bwangu bwangu ukuleka ukwisha na banensu no kwikala ilyo programu tailatendeka.

3. Bushe ukukutika ilyo tulelongana kulanga shani ukutila twalicindika ukupepa?

³ Ukukutika ilyo tuli pa kulongana na ko kulacindika Shifwe wa mu muulu. Umwaume umo uulemba amalyashi pa numa ya kumona ifyo ukulongana kwa citungu kwali mu cifulo ekala, alembele ukuti umuntu uulemonako uko balelongana kuti aumfwa bwino nga amona “imibele iisuma ya balelongana, uku ninshi bali tondolo balekutika, ukulangilila fye ukuti balipoosa amano ku fya mapepo.” Uyu mwaume na kabili alandile na pa “bana abengi . . . , bonse bali-icindike kabili bali fye abapamfiwa ukukupukula Baibolo wa mushilo balekonkamo ilyo kalanda alebelenga.” Kanshi pa kulongana te nshita ya kulapanga icongo, ukutumishanya amashiwi pa foni, ukulya, nelyo ukwendauka. Abana imisepela bafwile ukwikala pamo na bafyashi babo pa kutila babafwe ukunonkelamo muli programu. (Amala. 31:12; Amapi. 29:15) Ukucita ifyo kulanga ukutila twalicindika abantu bambi kabili tulatasha pa ca kulya ca ku mupashi.

4. Mulandu nshi tulingile ukumonekela bwino lintu tuli pa kulongana?

⁴ Ukufwala Ukwa Mucinshi: Abengi balitashishe sana pa fyo batucinkwileko pa kulongana kwa citungu ukwa uyu mwaka wapwile mu lyashi lyaletila “Lyonse Mulelanga Ukuti Muli Bena Kristu mu fyo Mucita.” Ili lyashi lyakomaile pa fyo ababomfi ba kwa Lesa balingile ukubombesha ukulanga umucinshi mu mifwalile ne fyo baipempenkanya. Na uno wine mwaka tufwile ukubikako amano ku mimonekele yesu. Imimonekele yesu ilanga ifyo twatemwa Yehova ne fyo twatemwa pa kuba Inte shakwe. Lyonse tufwile ukufwala nga bantu “abatila tutiina Lesa.”—1 Tim. 2:9, 10.

5. Lintu tuletuusha fye tatuli pa kulongana, kuti twalanga shani umucinshi mu mimonekele yesu?

⁵ Bushe tulingile ukufwala fye bwino ilyo tuli pa kulongana? Ico mufwile ukwibukisha ca kutila abantu bambi mu musumba tukalalonganina bakalatumona ninshi na tufwala na mabaji. Abantu bambi bafwile ukumona ukuti imifwalile yesu yalipusanako ne yabo. Kanshi nangu fye ni pa nshita ilyo tatuli ku kulongana, tutile lintu twaya ku kulya pa numa ya kulongana, tufwile ukufwala ifyo ababomfi ba kwa Lesa abalelongana kuli ico cifulo bafwile ukufwala. Tatulingile ukufwala amajini, utuputula, nelyo amashikipa. Ala nga twafwala bwino, tukacitila ubunte ku bantu abaletumona! Yehova alatemwa nga ca kutila tulemwininako bwino nga babomfi bakwe mu fyo tuipempenkanya.

6. Fisuma nshi ifikafumamo nga tuleba no mucinshi uo Abena Kristu balingile ukuba na o?

⁶ Ifisuma Ifingafumamo: Nga tuli aba mucinshi pa kulongana kwa citungu kuti kwalenga twacitila ubunte bwa mu lyashi kabili kuti twaishibikwa bwino ku bantu abaletumona. Lintu ukulongana kumo ukwa citungu kwapwile, umulashi umo uwa buteko atile: “Tatwatala atumonapo abantu abaicindika nga aba. Ifi mwaba e fyo Lesa afwaya ifwe fwe bantu ukuba.” Ukupeela bambi umucinshi kulanga ukuti twalicindikana kabili twalitemwana kabili ninshi tulecindika na Yehova. (1 Pet. 2:12) Ukupeela bambi umucinshi kulanga ukuti tulatiina Lesa kabili tulatasha pa fyo Shifwe atusambilisha. (Heb. 12:28) Kanshi ilyo tulelolela Ukulongana kwa Citungu ukuleti, “Konkeni Kristu” natubombeshe ukuba no mucinshi.

[Akabokoshi pe bula 5]

Ifya Kutucinkulako pa Kulongana kwa Citungu

◼ Inshita ya Kulongana: Ukulongana kukalatendeka pa 8:20 a.m. inshiku shonse shitatu. (Ku Assembly Hall, ifibi bakalaisulwa ne nshita ya 7:00 a.m.) Ilyo inyimbo sha Bufumu ishikalatangilila ukulongana shatendeka ukulila, ifwe bonse tufwile ukwikala pa kuti ukulongana kukaletendeka bwino. Pa bushiku bwa Kubalilapo e lyo no bwa Cibili ukulongana kukalapwa ne nshita ya 16:25 e lyo pa bushiku bwa Citatu ni 15:45.

◼ Ukusungila Bambi Ifipuna: Kuti mwasungila fye ifipuna abo muleenda na bo mu motoka nelyo abo mwikala na bo ing’anda imo.

◼ Ica Kulya ca Kasuba: Mukwai kuti cawama nga ca kutila mwaisa ne fya kulya ukucila ukulafuma pa cifulo ca kulonganinapo no kuyaliila kumbi. Icipe icinono icitalalika ifya kunwa ico mwingabika na munshi ya cipuna e co mwingabomfya. Tamulingile ukuya mu cifulo ca kulonganinamo ne fipe ifikalamba ifyakutalalikilamo ifya kunwa, amakontena ya mabotolo, no bwalwa.

◼ Ubupe: Pa kupekanya ukulongana kwa citungu indalama ishingi shilafwaikwa. Kuti twalanga ukuti tulatasha nga tulesangwilako imisangulo ya kuitemenwa ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Pa kulongana kwa citungu nga mwafwaya ukupeela ceke, ninshi mulingile ukulemba ukuti mwapeela “Watch Tower Society.”

◼ Amasanso ne Ficitika Ukwabulo Kwenekela: Nga ca kutila kwaba umuntu uwalwalisha ukwabula ukwenekela pa kulongana, mukwai ebeni kapyunga uuli mupepi, na o akeba dipartimenti ya First Aid pa kuti abaishiba ukundapa abalipo pa kulongana bese bamone ifyo ubulwele buli no kumwafwa.

◼ Ukukopa: Umusango fye onse uwa ca kukopelako ifyebo taufwile ukukulikilwa ku fisoselo nelyo ku malaita ya pa kulongana kabili ifi fipe fifwile ukubomfiwa mu musango wa kuti tafipumfyenye abantu bambi.

◼ Amafuta ya Kuisansa pa Mubili: Kuti twalangulukilako bambi nga tatubomfeshe sana amafuta ya kuisansa pa mubili pantu bambi abalwala kale amalwele pamo nga icifuba, kuti cakoselako.−1 Kor. 10:24

◼ Amaformu ya Kulondwelapo Abantu: Formu wa Twapaapaata Fwayeni Uyu Muntu (S-43) e o twingabomfya pa kulemba ifyebo pa bantu abalefwaya ukusambilila. Aba bantu kuti baba ni balya twashimikile mu lyashi fye mu nshita ya kulongana kwa citungu. Bakasabankanya bafwile ukukwata formu imo nelyo yabili aya kulondwelapo abantu abalefwaya ukusambilila ilyo baleisa ku kulongana. Nga mwalembapo pali formu kuti mwatwala ku Muputule wa Fitabo pa kuti baitume nelyo kuti mwapeela kalemba wa cilonganino cenu ilyo mwabwelela ku cilonganino ku mwenu.−Moneni Ubutumikishi Bwesu Ubwa Bufumu ubwa February 2005, ibu. 7.

◼ Ukupoosa Ifisoso: Tulefwaya apo tukalalonganina pakabe apa busaka. Tulalanga ifyo tufwaisha ukulakonka ifyo Lesa atweba ukupitila mu kulangulukilako bambi lintu twasenda fyonse ifya kulya ifishelepo, amapepala ne fipe fimbi ku mayanda yesu ukucila ukufisha pa cifulo ca kulonganinapo. Pa kulongana kwa citungu ukuleisa, ifwe bonse tukasunge icifulo cesu ica kupepelapo ica busaka pa kuti ‘muli fyonse tukayemfye isambilisho lya kwa Lesa.’—Tito 2:10.

◼ Ifimbusu: Abafyashi nelyo umuntu umbi umukalamba e bafwile ukushindika abana abanono ku mipompi nelyo ku cimbusu. Ilyo tuli pa kulongana limo limo abana balatendwa ukwikala, limbi pa numa fye ya maawala ayanono. Kanshi ifyo abana bacita pa kulongana pa kutila baleendauka, ilingi line balabepekesha ukuya ku cimbusu imiku iingi. Icibipako fye ca kuti abantu bambi abalekutika kuli programu balapumfyanishiwa. Kanshi ifyo abafyashi bengalacita kulatwalila limo abana ku cimbusu ilyo tatulatendeka ukulongana. Nga balecita ifi te kuti kube ukulapumfyanya bambi lintu ukulongana kwatendeka fye. Ukushindika abana abanono ku cimbusu na ku mipompi, kulacingilila abana ku masanso