Bushe Namuipekanya Ukusangwa ku Mutebeto wa fya Kulya fya ku Mupashi?
1. Mapekanyo ya musango nshi ayabako pa kuti kube umutebeto?
1 Pa kupekanya umutebeto palaba incito. Mufwile ukufwaya ifya kulya, ukufiipika bwino, e lyo no kufibika bwino apo abantu baleisa mu kuliila. Mufwile ukubika ifya kulya bwino bwino mu fipe no kufitantika bwino pe tebulo. Kabili mulingile no kuwamya sana icifulo umwa kuliila. Abetilwe ku mutebeto na bo bafwile ukuipekanya, maka maka nga ca kutila bakafuma ukutali. Nangu ca kutila palaba sana incito pa kupekanya ifya kulya ifisuma, ukuliila capamo ifya kulya ifisuma na banensu na balupwa lwesu kulalenga twalaba na ku ncito iibako pa kupekanya. Nomba line Inte sha kwa Yehova isonde fye lyonse balatendeka ukulongana capamo ku kuipakisha umutebeto wa fya kulya fya ku mupashi uo balolela pa nshita ntali, uyu mutebeto Kulongana kwa Citungu ukuleti “Mulelola!” Kale kale kwaliba ukubombesha ukupekanya amalyashi e lyo ne fintu fimbi ifikabilwa. Bonse tuleitwa. Pa kuti tukasangweko no kunonkelamo nga nshi, na ifwe bene umo umo tufwile ukuipekanya.–Amapi. 21:5.
2. Finshi tufwile ukucita pa kuti tukasangwe ku kulongana kwa citungu konse?
2 Nonkelenimo Nga Nshi: Bushe mwalipekanya bwino fyonse pa kuti mukasangweko kuli uku kulongana konse? Nga mulingile ukupoka ulusa ku bamwingisha incito, landeni na bo no kubeba ukuti mukalasangwa ku kulongana konse ukubikako fye no bushiku bwa kubalilapo. Bushe mwalipekanya imyendele no kwa kuyaikala? Baeluda bafwile ukushininkisha ukuti abakote na balwalilila e lyo na bambi fye abengakabila ubwafwilisho nabasakamanwa bwino bwino.—Yer. 23:4; Gal. 6:10.
3. Mulandu nshi tushilingile ukuyila ku kulongana kwa bafumine ku fyalo ifingi nga ca kuti tatwaitwa?
3 Mu ncende shimo shimo abakasangwa ku kulongana kwa citungu bakafuma mu fyalo ifingi. Muleibukisha ukuti kuli abasalwa ukuyasangwa kuli uku kulongana. Pa kupekanya uku kulongana ukuteyanya kwalipendele bwino bwino impendwa ya bafwile ukwitwa, ne fyo bengasakamanwa bwino bwino. Nga ca kutila bakasabankanya abo bashaita bayasangwa ku kulongana kwa citungu ukwa bafumine mu fyalo ifingi, kuti calenga kwaba icimfulumfulu pa mulandu wa kufulisha kwa bantu.
4. Fintu nshi fimo fimo ifingatwafwa ukuipekanya bwino bwino ilyo ukulongana kushilatampa cila bushiku?
4 Pekanyeni ukuti mukalefika bwangu pa kulongana pa kuti mwasanga apa kwikala ilyo ukulongana kushilatampa. Nga kwashala amamineti yanono ilyo ukulongana takulatendeka, pitulukeni mu malyashi yali pali programu ubo bushiku. Ici cikamwafwa ukuteyanya umutima wenu pa kuti mukomfwikishe ifyebo fikalalandwa. (Esra 7:10) Ceyamani nga atila tukutike ku nyimbo, mukaleipakisha ukukutika kuli ishi nyimbo e lyo pa numa ukwimbako ulwimbo lwa kwiswila ne pepo.
5. Finshi aba mu ng’anda yesu bafwile ukucita pa kuti bakanonkelemo sana mu kulongana?
5 Nga ca kutila ulupwa lwaikala pamo pa nshita ya kulongana, cikalenga abafyashi ukushininkisha ukuti abana babo balekutika amalyashi. (Amala. 31:12) Bonse mukalekonkamo ilyo amalembo yakalabelengwa. Nga mulelembako ifyebo fimo fimo kuti camwafwa ukulakutikisha. Pa numa, kuti mwabomfya ifyo fyebo nga mulefwaya ukwibukisha ifishinka fikalamba ifyali mu malyashi. Mwikalatepeleshanya na bambi mu nshita ya kulongana nangu ukulaendauka. Nga mwalikwata foni ya kwenda na yo, mwikaleka ukuti ikalemupumfyanya nangu ukupumfyanya bambi mu nshita ya kulongana. Cila bushiku ukulongana nga kwapwa, kuti cawama nga mulelanshanyako na bambi ifyo mwacitemwamo mu malyashi.
6. Cinshi icacindama sana ico tuipakisha pa kulongana kwa citungu, kabili finshi twingacita pa kuti tuipakisha sana?
6 Pa kulongana kwa citungu, tulaipakisha ukutemwana ukwa ba bwananyina, ukutemwana ukwaibela ukushisangwa muli cino calo. (Amalu. 133:1-3; Marko 10:29, 30) Kuti cawama ukulailondolola ku bo mwikele na bo mupepi no kulanshanya na bo pa nshita ya kutuusha. E busuma bumo ubwa kwishila ne fya kulya ifyayanguka pa kuti muliile pa cifulo ca kulonganinapo ukucila ukuya mu kuliila kumbi uko bashitisha ifya kulya nelyo ukulila ku ng’anda. Te kwesha ukupaanya ili shuko lishaiwamina ilya kukoseleshanya.—Rom. 1:11, 12.
7. Fya kufwala nshi tufwile ukupekanya ukufwala?
7 Imifwalile: Yehova aebele abena Israele ukuicitila insenkebele ku fisempe fya fya kufwala fyabo, no kubiika umwando wa bluu pa muulu wa nsenkebele. (Impe. 15:37-41) Ici calebebukishako ukuti baali bantu abo bapaatwileko ku bantu bambi pa kuti balepepa Yehova. Muno nshiku, ifya kufwala fya mucinshi kabili ifyalinga ifyo tufwala ilyo tulelongana ukulongana kwa citungu filatulenga ukuba abapaatukako ku calo. Ifi fya kufwala filashimikila sana ku baletumona na lintu tuya mu kuliila uko bashitisha ifya kulya pa numa ya kulongana. Kanshi mulebikako sana amano ku fya kufwala mufwala.
8. Kuti twashimikila shani kuli bambi ilyo tulesangwa ku kulongana kwa citungu?
8 Mukaleshimikila: Nga twapekanya bwino, kuti twalashimikila abantu ilyo tulesangwa ku kulongana kwa citungu. Munyinefwe umo uwaile uko bashitisha ifya kulya no mwina mwakwe pa numa ya kulongana asontele kuli baji iyo afwele no kwipusha uwalebapekanishisha ifya kulya ati: “Bushe namumona ukuti abantu abengi nabafwala aya mabaji?” Uwalepekanya ifya kulya alisumine ukuti alibamwene kabili taishibe icalecitika. Ici calengele ukuti batampe ukulanshanya kabili munyinefwe aebele uwalepekanya ifya kulya ukuti akasangweko kuli uku kulongana kwa citungu.
9. Kuti twalanga shani ukuti tuletasha Yehova pa kutwitako ku mutebeto?
9 Nangu ca kutila bamunyinefwe e bakalalanda amalyashi yonse ukubikako na malyashi umukaba ukwipusha, ne filangililo, Shifwe wa ku muulu Yehova uwa tutemwa e upekanya uyu mutebeto wa fya kulya fya ku mupashi cila mwaka. (Esa. 65:13, 14) Tulanga ukuti natutasha kuli Yehova uutwitile kuli uyu mutebeto pa kusangwako inshiku shonse no kulyako ifya kulya fyonse ifyo tulepokelela. Bushe mwalipekanya fyonse bwino bwino pa kuti mukasangweko?
[Akabokoshi pe bula 5]
Ifya Kutucinkulako pa Kulongana kwa Citungu
◼ Inshita ya Kulongana: Ukulongana kukalatendeka pa 8:20 hrs inshiku shonse shitatu. (Ku Assembly Hall, bakalaisula ifiibi ne nshita ya 7:00 hrs.) Ilyo batila inyimbo ishiletangilila ukulongana shalatendeka ukulila, ifwe bonse tufwile ukwikala pa kuti ukulongana kuletendeka bwino. Pa bushiku bwa kubalilapo, ukulongana kukapwa ne nshita ya 15:55 hrs, pa bushiku bwalenga shibili kukapwa pa 16:05 hrs, e lyo pa bushiku bwalenga shitatu kukapwa pa 15:30 hrs.
◼ Ukwa Kwimika Bamotoka: Pa mulandu wa kucepelwa incende ukwa kwimika bamotoka pa Fikuulwa Fikalamba Ifya Kulonganinapo, kuti cawama mwe bakwete bamotoka mwaumfwana ukusenda fye motoka imo ukucila cila muntu ukusenda motoka yakwe.
◼ Amashiwi ya Kusoka: Te mulandu na kuntu mwaimika motoka, lyonse mufwile ukukoma kabili te kwesha ukusha icili conse mu kati ica kuti cilemoneka ku balepita. Nalimo kuti mwaisalila ifipe fyenu ku numa ya motoka pa kuti tafilemoneka. Kabili cenjeleni ku bapuupu na basompola ifintu, abesa ku kwiba ukulongene abantu abengi. Ilyo muli pa kulongana kwa citungu mwilasha ifili fyonse ifyacindama pa fipuna ukwabula umuntu uwa kufisakamana. Bamo balyesha fye no kusembeleka abana banono pa kuti babafyushe ukubafumya pa ncende ya kulonganinapo. Mukwai lyonse mulesakamana abana.
◼ Ukusungila Bambi Ifipuna: Kuti mwasungila fye ifipuna abo muleenda na bo mu motoka nelyo abo mwikala na bo pa ng’anda.
◼ Ica Kulya ca Kasuba: Mukwai kuti cawama nga ca kutila mwaisa ne fya kulya ukucila ukulafuma pa cifulo ca kulonganinapo no kuya mu kufwaya ifya kulya kumbi. Icipe icinono icitalalika ifya kunwa ico mwingabika na mu nshi ya cipuna e co mwingabomfya. Tamulingile ukuya mu cifulo ca kulonganinamo ne fipe ifikalamba ifya kutalalikilamo ifya kunwa, nelyo ukusenda ifipe ifingatobeka.
◼ Ubupe: Kuti twalanga ukuti tulatasha pa mapekanyo ya kulongana kwa citungu nga tulesangwilako imisangulo ya kuitemenwa ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Nga mwafwaya ukupeela ceke pa kulongana kwa citungu, mulingile ukulemba ukuti mwapeela “Watch Tower Society.”
◼ Amasanso ne Ficitika Ukwabula Ukwenekela: Nga ca kuti kwaba umuntu uwalwalisha ukwabula ukwenekela pa kulongana, mukwai ebeni kapyunga, na o akeba dipartimenti ya First Aid pa kuti abaishiba ukundapa abalipo pa kulongana bese bamone umulwele no kumwafwa.
◼ Ifya Kukopelako: Tamufwile ukusuntinkanya intambo sha fya kukopelako ku malaiti nangu ku fisoselo fya pa kulongana kabili pa kukopa mwipumfyanya bambi.
◼ Amafuta ya Kuisansa pa Mubili: Kuti twalangulukilako bambi nga tatubomfeshe sana amafuta ya kuisansa pa mubili pantu bambi abalwala amalwele pamo nga icifuba, kuti yakoselako.—1 Kor. 10:24.
◼ Amaformu ya Kulondwelapo Abantu: Formu wa Mukwai Fwayeni Uyu Muntu (S-43) e o twingabomfya pa kulemba ifyebo pa bantu abalefwaya ukusambilila. Aba bantu kuti baba ni balya twashimikile ilyo twalelanda ilyashi fye mu nshita ya kulongana kwa citungu. Ilyo bakasabankanya baleisa ku kulongana, bafwile ukukwata formu imo nelyo yabili aya kulondwelapo abantu abalefwaya ukusambilila. Nga mwalembapo pali formu kuti mwatwala ku Muputule wa Fitabo pa kuti baitume nelyo kuti mwapeela kalemba wa cilonganino cenu ilyo mwabwelela ku cilonganino.—Moneni Ubutumikishi Bwesu Ubwa Bufumu ubwa February 2005 ibu. 7.
◼ Icilangililo: Takuli nangu umo uufwile ukuya pa cisebele nelyo ukufika mupepi pa kuti akope ifikope mu nshita ya cilangililo, nangu uwa kupumfyanya bambi. Mukwai mwilacinga bambi. Abana bafwile ukwikala na bafyashi babo. Bakapyunga balikwata insambu sha kutamfya abana ababungene pamo no kubabwesesha ku bafyashi babo nangu fye ukubatamfisha ku nse ya cipaka pa kuti belapumfyanya bambi.
◼ Ulubatisho: Pa Fikuulwa fya Kulonganinapo Ukulongana Kukalamba apaba ifishiba fya kubatishishamo, ibumba lifwile ukukonka ifyo balebeba ukuti baleikalako pa nshita ya lubatisho. Ulubatisho nga lulebela kumbi pamo nga ku mumana, mu damu nangu mu mulonga, abana tabafwile ukubutuka no kucilila abaleya mukubatishiwa, lelo bafwile ukwenda fye mu mulongo ilyo balekonka bakapyunga. Pa myaka iingi twasanga ukuti banono fye abakalamba abatambako ilyo abantu balebatishiwa. Nangu fye bafyashi abo abana babo balebatishiwa tabaya mu kumonako ilyo ici cintu cacindama cilecitika. Tulekoselesha abafyashi na bakalamba bambi ukulasangwako ilyo abantu balebatishiwa pa kuti tulelanga ukuti ulubatisho lwalicindama.
◼ Ukupoosa Ifisooso: Tulefwaya apo tukalalonganina pakabe apa busaka sana. Nga tulelangulukilako bambi no kulapoosa ifya kulya fisheleko, amapepala ne fipe fimbi umwa kupoosa ifisooso nelyo mu mikanda iili pa cifulo ca kulonganinapo, ninshi tulelanga ukuti tulafwaisha ukulakonka ifyo Lesa atweba. Pa kulongana kwa citungu ukuleisa, ifwe bonse tukasunge icifulo cesu ica kupepelapo ica busaka pa kuti ‘muli fyonse tukayemfye isambilisho lya kwa Lesa, Umupusushi wesu.’—Tito 2:10.
◼ Ifimbusu: Abafyashi nelyo umuntu umbi umukalamba e bafwile ukushindika abana abanono ku mipompi nelyo ku cimbusu. Ilyo tuli pa kulongana limo limo nga papita fye amaawala ayanono abana balatendwa ukwikala. Kanshi ifyo abana bacita pa kulongana pa kutila baleendauka, ilingi line balabepekesha ukuya ku cimbusu imiku iingi. Icibipako fye ca kuti abantu bambi abalekutika kuli programu balapumfyanishiwa. Kanshi ico abafyashi bengalacita kulatwalila limo abana ku cimbusu ilyo tatulatendeka ukulongana. Nga balecite fi te kuti kube ukulapumfyanya bambi lintu ukulongana kwatendeka fye. Ukushindika abana abanono ku cimbusu na ku mipompi, kulacingilila abana na ku masanso.