Inshiku Shitatu Isha Mutebeto wa ku Mupashi
1. Bushe tukanonkelamo shani mu kulongana kwa citungu uno mwaka?
1 Muli cino calo ca kwa Satana icaonaika, Yehova alitwalilila ukuliisha ababomfi bakwe ifya kulya fya ku mupashi. (Esa. 58:11) Icintu cimo ico Yehova abomfya ku kutukosha ku mupashi, kulongana kwa citungu ukubako cila mwaka. Apo ukulongana kwa citungu ukwa uno mwaka kuleya kulepalama, kuti twaipekanya shani ukunonkelamo no kwafwako bambi ukulya ifya kulya fya ku mupashi?—Amapi. 21:5.
2. Finshi tulingile ukupwisha ukupekanya pali ino nshita?
2 Nga ca kuti tamulatendeka ukuipekanya, tendekeni ino ine nshita ukuipekanya e lyo no kulanda na bo mubomba nabo pa kuti mukasangweko inshiku shonse shitatu. Bushe mwalipenda inshita mukalaenda cila bushiku ukufika apa kulonganina ica kuti mwasanga na pa kwikala ilyo programu tailatendeka? Ukwabula no kutwishika te kuti tufwaye ukupuswa icili conse pa fya kulya fya ku mupashi ifya kutukosha ifyo Yehova atupekanishishe! (Esa. 65:13, 14) Bushe mwalipwisha ukupekanya imyendele no ko mukafikila?
3. Finshi fingatwafwa ukuti tukanonkelemo muli programu capamo no lupwa lwesu?
3 Cinshi cikamwafwa ukukanatontonkanya pa fintu fimbi ilyo muli pa kulongana? Nga cingacitika, muli shilya nshiku sha kulongana shonse mulesendama bwangu. Nga muli pa kulongana, mulelolesha uulelanda ilyashi. Nga bapunda ilembo, na imwe isuleni Baibolo no kukonkamo. Lembeni ifishinka ifipi. Abafyashi balingile ukwikala pamo na bana babo pa kutila balebafwa ukukutikisha. (Amapi. 29:15) Napamo cila cungulo kuti mwalanshanya pamo no lupwa ifishinka fikalamba ifyo mwacumfwa ku kulongana. Pa kuti ulupwa lwenu lukatwalilile ukunonkelamo mu fyo mwasambilile pa kulongana kwa citungu, kuti mwashako inshita pa bushiku bwa Mapepo ya Lupwa iya kupituluka mu fishinka fimo fimo ifyo ulupwa lwenu lwingalakonka.
4. Kuti twaafwa shani bambi mu cilonganino cesu ukuipakisha ifya kulya fya ku mupashi?
4 Afweni Bambi Ukuipakisha: Tulefwaya na bambi bakaipakishe ifya kulya fya ku mupashi. Bushe mu cilonganino cenu mwaliba bakasabankanya abakoloci nelyo bambi abalekabila ubwafwilisho pa kuti bakasangwe ku kulongana kwa citungu? Bushe kuti mwabafwa? (1 Yoh. 3:17, 18) Baeluda maka maka bakangalila ba mabumba, balingile ukushininkisha ukuti bakasabankanya ba musango yu babafwa.
5. Bushe tukalashalika shani utupepala twa kwitilapo abantu ku kulongana kwa citungu? (Moneni akabokoshi akali pa muulu.)
5 Nga filya fine tucita lyonse, imilungu itatu ilyo ukulongana kushilatendeka, tukabombako kampeni ya kwita abantu ukwisasangwa ku kulongana kwa citungu. Ifilonganino fifwile ukubombesha ukupeela abantu utupepala pa kuti fikapwishe icifulo ca kushimikilamo conse. Nga ca kuti kampeni yapwa lelo ulupwa lwenu lucili nalukwata utupepala twa kwitilapo abantu, mulingile ukutusenda ku kulongana pa kuti mukalepeela abantu ilyo mukalacita ubunte bwa mu lyashi. Ifyebo na fimbi fikalondololwa bwino muli programu ya pali Cisano. Utupepala uto aba mu ulupwa lwenu beshibe ukuti tabakapwishe ukupeela abantu, balingile ukupeela bakapyunga abo bakasanga pa mwinshi wa cifulo ca kulonganinapo. Mukwai sungeni akapepala kamo pantu mu lyashi lya kulekelesha pa bushiku bwa kusondwelela, kukaba ukulanda pali aka kapela.
6. Kuti twalanga shani ukuti twalikwata imisango iisuma ilyo tuli pa kulongana?
6 Imisango Isuma Yalicindama: Abantu abengi shino nshiku ‘bali-itemwa’ kabili tababika amano ku fyo bambi baleumfwa, kanshi tulomfwa bwino ukuba na Bena Kristu banensu abapampamina pa kuba ne misango isuma! (2 Tim. 3:2) Tulaba ne misango iisuma ilyo tuleingila umwa kulonganina mu mutekatima ukwabula ukusunkana na lintu tulesungila fye abo twikala nabo pa ng’anda ifipuna nelyo abo twendele nabo muli motoka nelyo abo tusambilila nabo Baibolo. Tulomfwila ceyamani nga alanda ukuti twikale mu fipuna no kukutika ku nyimbo ishilangilila ukuti ukulongana kwalatendeka. Tulalanga ukuti twalikwata imisango iisuma nga ca kuti twabika foni ya kwenda nayo nelyo peja mu nshila ya kuti tafilepumfyanya bambi pa kulongana. Kabili tulalanga ukuti twalikwata imisango iisuma nga ca kuti tatulelanda na banensu, ukulembeshanya ifyebo pa foni, ukulya, nelyo ukwendauka ilyo bakalanda balelanda amalyashi.
7. Bushe ifwe e lyo na bamunyinefwe bambi kuti twaipakisha shani ilyo tulelanshanya?
7 Ukulanshanya Ukusuma: Pa kulongana kwa citungu tulakwata amashuko ya kuba pamo no kulanshanya na bamunyinefwe Abena Kristu. (Amalu. 133:1-3) Bushe te kuti muitendekeleko ‘ukukusha ukutemwa kwenu’ no kulanshanya na bamunyinefwe na bankashi abafuma ku filonganino fimbi? (2 Kor. 6:13) Kuti mwapanga ubuyo bwa kwishiba umuntu umo nelyo ulupwa lumo cila bushiku. Ilyo tuletuusha mu nshita ya kasuba, tulakwata ishuko lya kulanshanya na babwananyina. Kanshi mukalesenda ifya kulya ifyayanguka no kuipakisha ukuliila capamo no kulanshanya na bamunyinefwe pa cifulo ca kulonganinapo ukucila ukulafuma pa nse ukuya mu kushita ifya kulya nelyo ukuya ku fikuulwa fya kuliilamo. Ukucita ifi kuti kwalenga mwakwata ifibusa ifipya kabili ifibelelela.
8. Mulandu nshi tufwile ukuipeelesha ukubombako pa kulongana, kabili kuti twacita shani?
8 Ala mwandini caliwama nga nshi ukubombela capamo na bakapepa banensu mu mulimo wa mushilo! Bushe kuti mwaipeelesha ukubomba umulimo wa kuitemenwa nelyo ukubombela capamo ne cilonganino cenu nga capeelwa umulimo wa kuwamya? (Amalu. 110:3) Nga tamukwete umulimo uuli onse, kuti napamo mwaipusha bakangalila ba ku dipatimenti ya Umulimo wa Kuitemenwa pa kulongana kwa citungu. Aba kubomba nga bafula, umulimo ulanguka kabili tulaba ne nsansa.
9. Mulandu nshi tulingile ukubikila sana amano ku mibele ne mimonekele yesu mu nshita ya kulongana kwa citungu?
9 Imibele Yesu Ilasansamusha Abatumona: Te kutila tufwile ukwishibikwa fye ukuti natukwata ukulongana kwa citungu mu nshiku fye shitatu isho tuba apa kulonganina, lelo abatumona ilyo tuli mu musumba umubelele ukulongana balingile ukumona ubupusano bwaba pali ifwe na bashili baNte. (1 Pet. 2:12) Imifwalile ne mimonekele yesu pa kulongana, apo tuleikala, na lintu tuli mu fikuulwa fya kuliilamo ifwile ukucindika Yehova. (1 Tim. 2:9, 10) Nga tulefwala amabaji, abaletumona bakeshiba ukuti tuli Nte sha kwa Yehova. Ici kuti calenga ukuti tukabebeko pa kulongana tukwete no kubashimikila.
10. Finshi fyacitike ifilanga ukuti ukuba ne mibele ya Bwina Kristu kulalenga abantu ukumfwa imbila nsuma?
10 Bushe imibele yesu iisuma pa nshita ya kulongana ilenga bambi ukulatontonkanya finshi pali ifwe? Icipande cimo ica mu nyunshipepala calandile pa fyo umukalamba wa cikuulwa cimo ico babomfeshe ukulonganinapo ukulongana kwa citungu asosele, uwatile: “BaNte balikwata umucinshi. Tulomfwa bwino ukuba nabo cila mwaka.” Umwaka wapwile umuntu uushili Nte alilufishe icikwama ilyo ali pa hotela apali na baishile ku kulongana kwa citungu. Ilyo babweseshe icikwama ku mukalamba wa hotela ninshi na fyonse emo fili, umukalamba wa hotela aebele umwine wa cikwama ukuti: “Naciwama ukuti Inte sha kwa Yehova balelongana ukulongana kwa citungu mupepi, kabili e bafulile sana pali ino hotela. Pantu kwena icikwama cenu nga tamwatalile amucimonapo na kabili.”
11. Bushe aba ku First Aid bakulabombela pa mafya ya musango nshi, kabili finshi abalesangwa ku kulongana balingile ukwishibila libela?
11 First Aid: Dipatimenti ya First Aid isakamana fye ababa mu busanso nelyo ukulwala mu kupumikisha epela. Te kiliniki nelyo ishitolo ukwa kushita imiti iyo. Twapapata ilyo mukesa ku kulongana, mukaisendele imiti ya kucefyako ubukali pamo nga Panado nelyo Asprin e lyo na fimbi ifyo mulekabila pantu takwakabe ukupeela imiti ya musango yu pa kulongana. Abalwala ubulwele bwa kupona, ubulwele bwa shuga, ubwalwele bwa ku mutima, na malwele yambi, balingile ukusenda imiti yabo abene. Balingile ukuba pamo na lupwa wabo nelyo uo balongana nankwe uwaishiba bwino ubulwele balwala ica kutila kuti acitapo fimo bwangu bwangu nga ca kutila balwala. Inshita shimo kulaba amafya pa kulongana kwa citungu nga ca kuti abalwala amalwele yashipola bashala fye beka ukwabula uwa kubatangata. Abakwata amafya ya musango yu nga ca kutila tabakwete balupwa aba kubafwa, balekabila ukwishibisha baeluda pa kuti bapekanya ifya kucita ku kubafwilisha. Pa kulongana kwa citungu te kuti pabe ukupekanya imiputule yaibela umwa kwikala balya aba kutila balalwala nga bapeema fimo nelyo abalwala pa mulandu wa fintu fye fimbi.
12. Ilyo ukulongana kulepalamina, buyo nshi tufwile ukukwata, kabili mulandu nshi?
12 Ukulongana kwa citungu ukwa uno mwaka nakupalama. Bamunyinefwe kale kale balibombesha ukupekanya programu ne fifulo fya kulonganinapo pa kuti tukaipakishe ukulongana. Bombesheni ukuti mukasangweko inshiku shonse shitatu, kabili ipekanyeni ukukutika ku fyo Yehova amupekanishishe ukupitila mu kuteyanya kwakwe. Pa kuti mukalenge bambi ukuipakisha ukulongana, pampamineni pa kuba ne misango iisuma, ukulanshanya na bambi mu nsansa, no kuba ne mibele isuma. Lyena imwe na bambi kuti mwaumfwa nge fyaumfwile umwanakashi umo uwasangilwe ku kulongana umwaka wapwile uwalembele ati, “Uku kulongana kwaliweme icine cine, kabili nshakakulabe!”
[Amashiwi pe bula 3]
Nga filya fine tucita lyonse, imilungu itatu ilyo ukulongana kushilatendeka, tukabombako kampeni ya kwita abantu ukwisasangwa ku kulongana kwa citungu
[Amashiwi pe bula 5]
Imifwalile ne mimonekele yesu pa kulongana, apo tuleikala, na lintu tuli mu fikuulwa fya kuliilamo ifwile ukucindika Yehova
[Amashiwi pe bula 6]
Pa kuti mukalenge bambi ukuipakisha ukulongana, pampamineni pa kuba ne misango iisuma, ukulanshanya na bambi mu nsansa, no kuba ne mibele isuma
[Akabokoshi pa mabula 3-6]
Ifya Kutucinkulako pa Kulongana kwa Citungu Ukwa mu 2011
◼ Inshita ya Kulongana: Ukulongana kukalatendeka ne nshita ya 8:20 ulucelo inshiku shonse shitatu. Ifiibi pa ncende sha kulonganinapo, fyakulaisuka 7:00. Nga ca kuti babilisha inyimbo sha kulangilila ukuti ukulongana kwalatendeka, bonse fye tulingile ukwikala mu fipuna fyesu pa kuti programu itendeke mu nshila ya mucinshi. Pa bushiku bwa kubalilapo ukulongana kukapwa ne nshita ya 15:55, kabili pa bushiku bwalenga bubili kukapwa ne nshita ya 16:15, e lyo pa bushiku bwalenga shitatu kukapwa ne nshita ya 15:10.
◼ Ukwa Kwimika Bamotoka: Pa mulandu wa kucepelwa incende ukwa kwimika bamotoka pa Fikuulwa Fikalamba Ifya Kulonganinapo, kuti cawama mwe bakwete bamotoka mwaumfwana ukusenda fye motoka imo ukucila cila muntu ukusenda motoka yakwe.
◼ Ukusungila Bambi Ifipuna: Kuti mwasungila fye ifipuna abo muleenda na bo mu motoka nelyo abo mwikala na bo ing’anda imo, ukubikako fye na bo musambilisha Baibolo.—1 Kor. 13:5.
◼ Ica Kulya ca Kasuba: Mukwai kuti cawama nga ca kutila mwaisa ne fya kulya ukucila ukulafuma pa cifulo ca kulonganinapo no kuya mu kufwaya ifya kulya kumbi. Icipe icinono icitalalika ifya kunwa ico mwingabika na mu nshi ya cipuna e co mwingabomfya. Tamulingile ukuya mu cifulo ca kulonganinamo ne fipe ifikalamba ifya kutalalikilamo ifya kunwa, nelyo ukusenda ifipe ifingatobeka
◼ Ubupe: Kuti twalanga ukuti tulatasha pa mapekanyo ya kulongana kwa citungu nga tulesangwilako imisangulo ya kuitemenwa ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Nga mwafwaya ukupeela ceke pa kulongana kwa citungu, mulingile ukulemba ukuti mwapeela “Watch Tower Society.”
◼ Amasanso ne Ficitika Ukwabula Ukwenekela: Nga kwaba umuntu uwalwalisha ukwabula ukwenekela pa kulongana, mukwai ebeni kapyunga, na o akeba dipartimenti ya First Aid pa kuti abaishiba ukundapa abalipo pa kulongana bese bamone umulwele no kumwafwa.
◼ Umuti: Nga mwalikwata umuti uo badokota bamweba ukubomfya, mukwai mukaisendele pantu takwakabe ukupeela imiti ya musango uyo pa kulongana kwa citungu.
◼ Amafuta ya Kuisansa pa Mubili: Kuti twalangulukilako bambi nga tatubomfeshe sana amafuta ya kuisansa pa mubili pantu bambi abalwala amalwele pamo nga icifuba, kuti yakoselako.—1 Kor. 10:24.
◼ Amaformu ya Kulondwelapo Abantu: Formu ya Mukwai Fwayeni Uyu Muntu (S- 43) e yo twingabomfya pa kulemba ifyebo pa bantu abalefwaya ukusambilila. Aba bantu kuti baba ni balya twashimikile ilyo twalelanda ilyashi fye mu nshita ya kulongana kwa citungu. Ilyo bakasabankanya baleisa ku kulongana, bafwile ukukwata formu imo nelyo yabili aya kulondwelapo abantu abalefwaya ukusambilila. Nga mwalembapo pali formu kuti mwatwala ku Muputule wa Fitabo pa kuti baitume nelyo kuti mwapeela kalemba wa cilonganino cenu ilyo mwabwelela ku cilonganino.—Moneni Ubutumikishi Bwesu Ubwa Bufumu ubwa November 2009 ibula 4.
◼ Ulubatisho: Pa Fikuulwa fya Kulonganinapo Ukulongana Kukalamba palaba ifishiba fya kubatishishamo. E ico abali mwi bumba bafwile ukukonka ifyo balebeba ukuti baleikalako pa nshi ilyo kuli ulubatisho. Ulubatisho nga lulebela kumbi pamo nga ku mumana, mu damu nangu mu mulonga, abana tabafwile ukubutuka no kucilila abaleya mu kubatishiwa, lelo bafwile ukwenda fye mu mulongo ilyo balekonka bakapyunga pa numa. Pa myaka iingi twasanga ukuti abakalamba abengi tabatambako ilyo abantu balebatishiwa. Nangu fye bafyashi abo abana babo balebatishiwa tabaya mu kumonako ilyo ici cintu cacindama cilecitika. Tulekoselesha abafyashi na bakalamba bambi ukulasangwako ilyo abantu balebatishiwa pa kuti tulelanga ukuti ulubatisho lwalicindama.
◼ Icilangililo: Takuli nangu umo uufwile ukuya pa cisebele nelyo ukufika mupepi pa kuti akope ifikope mu nshita ya cilangililo, nangu uwa kupumfyanya bambi. Mukwai mwilacinga bambi. Abana bafwile ukwikala na bafyashi babo. Bakapyunga balikwata insambu sha kutamfya abana ababungene pamo no kubabwesesha ku bafyashi babo nangu fye ukubatamfisha ku nse ya cipaka pa kuti belapumfyanya bambi.
◼ Ukupoosa Ifisooso: Tulefwaya apo tukalalonganina pakabe apa busaka sana. Nga tulelangulukilako bambi no kulapoosa ifya kulya fisheleko, amapepala ne fipe fimbi umwa kupoosa ifisooso nelyo mu mikanda iili pa cifulo ca kulonganinapo, ninshi tulelanga ukuti tulafwaisha ukulakonka ifyo Lesa atweba. Pa kulongana kwa citungu ukuleisa, ifwe bonse tukasunge icifulo cesu ica kupepelapo ica busaka pa kuti ‘muli fyonse tukayemfye isambilisho lya kwa Lesa, Umupusushi wesu.’—Tito 2:10.
◼ Ifimbusu: Abafyashi nelyo umuntu umbi umukalamba e bafwile ukushindika abana abanono ku mipompi nelyo ku cimbusu. Ilyo tuli pa kulongana limo limo nga papita fye amaawala ayanono abana balatendwa ukwikala. E ico abana nga balefwaya ukulaleendauka pa kulongana, ifyo bacita ilingi line balabepa imiku iingi ukuti balefwaya ukuya ku cimbusu. Icibipako fye ca kuti abantu bambi abalekutika kuli programu balapumfyanishiwa. Kanshi ico abafyashi bengalacita kulatwalila limo abana ku cimbusu ilyo tatulatendeka ukulongana. Nga balecite fi te kuti kube ukulapumfyanya bambi lintu ukulongana kwatendeka fye. Ukushindika abana abanono ku cimbusu na ku mipompi, kulacingilila abana na ku masanso.
◼ Umulimo wa Kuitemenwa: Insansa isho tukwata nga tulesangwa ku kulongana kwa citungu shikacilapo nga tulebombako ne milimo yacindama pa kulongana. (Imil. 20:35) Abalefwaya ukubombako kuti baya kuli Dipartimenti ya Umulimo wa Kuitemenwa pa cifulo ca kulonganinapo. Abana abashilafika pa myaka 16 nabo kuti babombako cikulu fye abafyashi nelyo ababasunga nelyo abakalamba bambi babasuminisha ukubomba.
[Akabokoshi pe bula 4]
Tukalashalika Shani Utupepala?
Pa kuti tukashimikile mu cifulo cesu conse, tufwile ukulanda ifyebo ifinono fye. Napamo kuti twatila: “Muli shani? Tulepeela abantu utu tupepala mu calo fye conse. Na imwe kuti mwasendako kamo. Mwalamona ifyebo na fimbi ifili pali aka kapepala.” Ifyaba pa ntanshi ya kapepala kuti fyalenga umuntu ukufwaya sana ukubelenga, kanshi peleni umwine wa ng’anda mu nshila ya kuti amone ifili pa ntanshi. Mulecincimuka pa kulanda. Ilyo muleshalika utupepala pa mpela ya mulungu, kuti mwashalika na magazini nga calinga.