Ukulongana kwa Citungu Bunte bwa Maka ku Cine

1. Finshi ifyo abena Israele bali no kulatontonkanyapo no kulanshanyapo pa nshita sha mitebeto?

¹ Abena Israele balelongana imiku itatu mu mwaka pa nshita sha mitebeto. Nangu ca kuti baume fye e balingile ukusangwako, ilingi indupwa fye shonse shaleya ku Yerusalemu ku kuipakisha uku kulongana ukwa nsansa. (Amala. 16:15, 16) Iyi yaleba ni nshita iisuma iya kutontonkanya no kulanshanya pa fya kwa Lesa. Finshi fimo ifyo balelanshanya? Cimo ca kuti, Yehova ni kapekape. (Amala. 15:4, 5) Cimbi ca kuti, kuti twamucetekela ukutila kuti atutungulula no kutucingilila. (Amala. 32:9, 10) Abena Israele bali no kulatontonkanya pa cishinka ca kuti apo balinikweko ishina lya kwa Yehova, bali no kulanga ubulungami bwakwe mu mikalile yabo. (Amala. 7:6, 11) Na ifwe ifi fine e fyo ukulongana kwa citungu kutunonsha.

2. Bushe ukulongana kwa citungu kukatwafwa shani ukumfwikisha cine?

² Ukulongana Kulalenga Twaumfwikisha Icine: Pa kulongana kwesu ukwa citungu, tulomfwa bwino ukukutika ku malyashi, ifilangililo, na malyashi ya kwipusha. Ifi fyonse filalenga twaumfwikisha icine ca mu Baibolo no kubomfya ifyo tulesambilila. (Yoh. 17:17) Kale kale, amapekanyo ya kulongana kwa citungu ukwa uno mwaka yalitendeka. Ukuteyanya kwa kwa Yehova kulepekanya ukulongana ukukalanda pa filecitika ilelo ne fyo twingekala mu calo. (Mat. 24:45-47) Bushe tamulefwaisha ukwisamona no kumfwa ifyo tukalasambilila?

3. Finshi tufwile ukucita pa kuti tukanonkelemo mu kulongana?

³ Nomba pa kuti tunonkelemo, tufwile ukubako ku kulongana no kubikako sana amano kuli programu inshiku shonse shitatu. Nga tamulapoka ulusa ku ncito, ino ine e nshita ya kulomba ulusa. Mukalesendama bwangu pa kuti mwikalashipula pa kulongana. Abengi ifyo bacita pa kuti baleumfwikisha, balalolesha kalanda e lyo no kulemba ifyebo ifinono. Mwikaleka foni nangu peja ukumupumfyanya nelyo ukupumfyanya bambi. Tamulingile ukulalanda amalyashi, nelyo ukutumina abanenu amameseji ya pa foni, nelyo ukulalya ilyo amalyashi yalelandwa.

4. Bushe abafyashi kuti baafwa shani abana babo ukunonkelamo mu kulongana?

⁴ Mu myaka ye Sabata, ilyo indupwa sha bena Israele shalelongana ku kukutika ku Mafunde pa Mutebeto wa Nsakwe, na bana “abanono” balebapo “pa kutila bakutike kabili basambilile.” (Amala. 31:12) Ala cilawama ukumona uko indupwa shikele pamo pa kulongana kwa citungu na bana babo abaice nababika sana amano kuli programu ukwabula no kushipula! Mu cungulo nga mwainuka, kuti cawama nga mwamona mu fyebo mwacilemba no kulanshanya pa fyebo mwacitemwa. Baibolo itila, ‘Ubuwelewele bwakakatila ku mutima wa mwaice,’ e co kanshi pa nshita ya kutuusha akasuba, abafyashi tabafwile ‘ukulekelesha’ abana babo abanono ne misepela ukwabula ukubasopa.—Amapi. 22:15; 29:15.

5. (a) Bushe imibele yesu iisuma kuti yayemfya shani icine? (b) Bushe imifwalile yesu ilyo tuli mu musumba tulelonganina kuti yayemfya shani icine?

⁵ Imibele Yesu Isuma Ilayemfya Icine: Imibele yesu iisuma ilyo tuli mu musumba tulelonganina ilayemfya icine. (Tito 2:10) Abaleya mu kulongana nga balenkonka amafunde e lyo balelanga ne mibele ya Bwina Kristu iisuma no kutekanya, abantu bambi balamona. (Kol. 4:6) Amabaji tufwala tayeshibisha fye abantu ukuti tulelongana ukulongana kwa citungu no kutwishibisha ku basangilweko, lelo yalalenga twashimikilako bambi. Abantu ba mu musumba tulelonganina bakamona ukuti abafwele amabaji nabafwala bwino kabili ifya kufwala bafwele nafilinga, tafili nge mifwalile iisekele mu calo iya busanku kabili iya kubimbula bambi. (1 Tim. 2:9, 10) Kanshi, tufwile ukubikako amano ku mifwalile na ku mimonekele yesu ilyo tuli pa kulongana. Ifya kufwala fyesu fifwile ukuba ifya mucinshi nangu tatulelonganina mu cikuulwa. Nga twasalapo ukufwala ifya kufwala fimbi pa numa ya kulongana, tufwile ukwibukisha ukuti tucili tulelongana kabili tatufwile ukufwala kwati tuleya mu kwangala.

6. Cinshi twingacita pa kuti tuipakishe ukuba na bena Kristu banensu pa kulongana?

⁶ Pa mitebeto yalebako kale, abena Israele baletemwa ukwangalila pamo na bakapepa banabo abalefuma ku fitungu fimbi ifya Israele na ku fyalo fimbi, kabili calelenga baba abaikatana. (Imil. 2:1, 5) Pa kulongana kwa citungu e pamonekela sana ubwananyina bwesu ubwa Bwina Kristu. Abamonako balatemwa sana ifyo tumfwana muli paradaise yesu iya ku mupashi. (Amalu. 133:1) Kanshi, ukucila ukufuma pa cifulo ca kulonganinapo no kuya mu kufwaya ifya kulya pa nshita ya kutuusha, kuti cawama nga twaisa ne fya kulya fyesu pa kuti twingekala pamo na bamunyinefwe ne nkashi no kulalanshanya!

7. Nga ca kuti natulinga ukubombako umulimo wa kuitemenwa, cinshi cingawamina ukubombako?

⁷ Abantu bambi balatemwa ukumona ifyo ukulongana kuteyanishiwa bwino ne fyo kuba ukwa muyano, maka maka nga baumfwa ukuti ababomba imilimo yonse baitemenwa fye. Bushe na imwe kuti ‘mwaipeela mwe bene mu kuitemenwa’ ukubombako imilimo pa kulongana? (Amalu. 110:3) Indupwa shimo shilaitemenwa ukubombela pamo pa kuti bengasambilisha abana ukulaipeela ukubombako imilimo pa kulongana. Nga ca kuti muli ba nsoni, ukubombako pa kulongana kukamwafwa ukwishiba abantu na bambi. Nkashi umo atile: “Ine kale nshaishibe abantu abengi kano fye balupwa bandi ne fibusa ifinono. Nomba ilyo nabombeleko umulimo wa kuwamya, nalishibene na ba bwananyina abengi. Ala caliweme nga nshi!” Ukubombako pa kulongana kukalenga tukakwate ifibusa na fimbi kabili tukaba ne nsansa sana. (2 Kor. 6:12, 13) Nga ca kuti tamwatala amubombapo umulimo wa kuitemenwa, kuti mwaipusha baeluda ifyo mwingacita pa kuti na imwe mukabombeko.

8. Tukalacita shani pa kwita abantu ukwisa mu kulongana?

⁸ Iteniko na Bambi Ukwisaumfwako Icine: Na uno mwaka nga kwashala imilungu itatu ukuya mu kulongana kwa citungu, tuli no kubombako kampeni ya kwita abantu ukusangwa ku kulongana. Kuti cawama nga ca kuti ifilonganino fyabombela sana mu cifulo babombelamo pa kuti bengeta abantu ukubomfya utupepala twa kwitilapo abantu. Utupepala nga twashalapo, mufwile ukwisa na to ku kulongana. Abalesangwa ku kulongana kuti babomfya utu tupepala ukucitila ubunte bwa mu lyashi mu musumba umubelele ukulongana.

9. Shimikeni ifyacitike ifilelangilila ukuti mulafuma ifisuma muli kampeni yesu iibako cila mwaka.

⁹ Bushe abantu balesa ku kulongana kwa citungu nga twabashila utupepala twa kubetilapo? Pa kulongana kumo, kapyunga afwaiile umwaume umo no mwina mwakwe apa kwikala. Baebele kapyunga ukuti balibapeele akapepala ka kubeta ku kulongana kabili balitemenwe ifyali pa kapepala. Baendele na motoka yabo amakilomita 320 ukwisa mu kulongana! Ifyacitike na fimbi fya kuti, nkashi aleshimikila ku ng’anda ne ng’anda kabili apeele umwaume umo akapepala uwalemoneka kwati alefwaisha ukwishiba fimo pa kulongana kwa citungu. E ico nkashi alilanshenye nankwe ifyali pa kapepala. Pa numa ya nshiku ishinono, nkashi amwene fye ulya mwaume no munankwe bali pa kulongana, nabakwata no lupapulo lumo ulwafumine!

10. Mulandu nshi cacindamina ukusangwa ku kulongana kwa citungu cila mwaka?

¹⁰ Imitebeto iyalebako pa mwaka, iyo Yehova atantiike ukuti abena Israele balekwata, yalebafwa “ukumubombela mu cishinka na mu cine.” (Yosh. 24:14) Na ifwe nga tulesangwa ku kulongana kwa citungu ukubako cila mwaka kuti ‘tule-enda mu cine,’ na kuba uku kulongana nako, kwalicindama sana mu kupepa kwesu. (3 Yoh. 3) Shi Yehova napaale imwe bonse mwe batemwa icine pa kuti mukasangwe ku kulongana no kunonkelamo nga nshi!