Imibele Iilenga Abantu Bacindika Lesa
1. Mulandu nshi Inte sha kwa Yehova beshibikilwa bwangu nga kuli ukulongana kwa citungu?
1 Ilyo tuli pa kulongana kwa citungu, abantu baleshiba ukuti tulelongana. Mu ncende ishingi nga tulelongana, balalanda na pa milabasa na mu manyunshipepala ukuti ba Nte balelongana. Mu mahotela na mu fifulo fya kulilamo mulaba ba Nte abengi ica kuti na bekala mushi baleshiba ukuti mu mushi namwisa ba Nte pantu balamona abantu abengi abafwele amabaji ya kulongana. Kanshi ifi fishinka twalalandapo fyalatwibukishako imibele tulingile ukukwata iikalenga abantu ba ku ncende tukalalonganina bakacindike Lesa.—1 Pet. 2:12.
2. Bushe imifwalile yesu iya mucinshi ilyo tuli ukwa kulonganina kuti yalenga shani bambi ukucindika Lesa?
2 Ukufwala Ifya Mucinshi: Ilyo tulelongana tulingile ukufwala ifya mucinshi. Na lyo line, te pa kulongana fye tulingile kufwala ifya mucinshi, nangu fye ni lintu tuli pa hotela, mu ncende sha kuliilamo ifya kulya e lyo na lintu tuleshita ifintu, tulingile ukufwala bwino pa kuti abantu tabatusuulile. Kwena te lyonse tulingile ukufwala kwati tuli pa kulongana, lelo imifwalile yesu ilingile ukuba iya mucinshi, te kufwala kwati ba ku calo. Abaletumona balingile ukumona ukuti twalipusana na bantu abashipepa. (Rom. 12:2) E lyo tulingile no kulafwala baji, pantu cikalenga abantu ukwishiba ukuti tulelongana, e lyo tukakwata apa kutendekela ukushimikila kabili na bamunyinefwe bakalatwishiba.
3. Kuti twalanga shani ukuti twalitekanya kabili tatucita fye ifingatuwamina?
3 Ukutekanya no Kucita Ifisuma: Muno nshiku, abantu abengi bali-itemwa kabili tabatasha. Kanshi nga tuli abatekanya kabili tulecitila na bantu ifisuma abo tulesanga mu fifulo fya kuliilamo na mu mahotela, bakalatemwa sana. (2 Tim. 3:1-5) Ilyo tulesungila bambi ifipuna na lintu tulepoka impapulo ishipya, tulingile ukulanga ukuti tatufwaya fye ifingatuwamina. (1 Kor. 10:23, 24) Umwaume umo uwasangilwe ku kulongana kwa citungu pa muku wa kubalilapo atile: “Nshibukisha amalyashi ayalandilwe pa kulongana, lelo nshakalabe imibele ya ba Nte iisuma iyo namwene.”
4. Mulandu nshi tulingile ukubombelako umulimo wa kuitemenwa pa kulongana kwa Citungu nga tukakwata amaka ya kubomba?
4 Bakabomba Bakuitemenwa: Cimo ico twishibilako Abena Kristu ba cine kuipeelesha ukubomba imilimo. (Amalu. 110:3) Bushe te kuti mubombeko pa kulongana kwa citungu? Pa kulongana kwa citungu kumo, bamunyinefwe na bankashi 600 bali-ipeeleshe ukuwamya icifulo ilyo ukulongana kushilatendeka. Abene ba cifulo batile: “Tatwatala atumonapo icintu ca musango yu! Natupapa ukusanga ukuti abantu bafule fi bonse baleitemenwa fye abene ukubomba.” Tulefwaisha ukusangwa ku kulongana kwa citungu ukwa mu 2013 pa kuti tukasambilile no kukutika kuli Lesa. Kabili tulefwaisha no kuti tukacindike Lesa.