Ifya Kutucinkulako pa Kulongana kwa Citungu
Inshita ya Kulongana: Tukalatendeka ukwingila pa cifulo ca kulonganinapo ne nshita ya 7:00. Inshiku shonse shitatu, inyimbo shikalatendeka ukulila ulucelo ne nshita ya 8:20. Nga babilisha ukuti inyimbo shalatendeka ukulila, bonse fye tulingile ukuya apo twalaikala pa kuti ukulongana kutendeke mu nshila ya mucinshi. Pali Cisano na pa Cibelushi, ukulongana kukalapwa ne nshita ya 16:00, e lyo pa Mulungu ukulongana kukapwa ne nshita ya 15:00.
‘Mulelumbanya Yehova mu Nyimbo’: Ukutula fye na kale abantu ba kwa Lesa balalumbanya Yehova mu nyimbo, kabili na muno nshiku mwine inyimbo shalicindama mu kupepa kwa cine. (Amalu. 28:7) Iciputulwa ca lucelo ne ca kasuba pa kulongana kwa citungu citendekela ne nyimbo. Ishi inyimbo bashipekanya pa kuti tulesambilila pali Yehova no ku mulumbanya, te sha kuti nga shilelila tatubikileko na mano. Kanshi nga ceyamani abilisha ukuti inyimbo shalatendeka ukulila, tatufwile ukulashimika ilyashi lelo tufwile ukwikala mu fipuna no kukutikisha ku nyimbo ishilelila. Nga tulecita ifi, ninshi tulelanga ukuti tulatasha pa fyo bamunyinefwe babombesha pa kupekanya ishi inyimbo. Imiku ibili mu mwaka aba bamunyinefwe balailipilila ukuya ku Patterson, ku New York, kukulisha ishi nyimbo pa kutila tuleipakisha ilyo tulekutikako. Pa numa ya kukutika kuli ishi nyimbo, bonse tufwile ukulumbanya Yehova ukupitila mu kwimbila capamo inyimbo sha Bufumu.
Ukwa Kwimika Bamotoka: Pa fifulo fyonse apo tukalonganina icitungu, takwakabe ukulipilisha apa kwimika motoka, lelo uwaisa fye bwangu eo bakulapeela apa kwimika. Pa mulandu wa kucepelwa incende iya kwimikapo imyotoka, kuti cawama mwe bakwete imyotoka mwaumfwana ukunina muli motoka imo ukucila cila muntu ukusenda motoka yakwe. Mukwai mukaleumfwila abakalamulanga ukwa kwimika ba motoka ne ncinga.
Ukusungila Bambi Ifipuna: Nga mwafika apa kulonganina cila ulucelo, twapapaata mwikalabutukila ukuya mu kufwaya apa kwikala ica kuti calamoneka kwati mulecimfyanya na bamunyinenwe. Umupashi wa kufwaya ukucitila bambi ifisuma e o abantu bamwenako ukuti tuli Bena Kristu ba cine, kabili cilalenga balacindika Lesa. (Yoh. 13:34,35; 1 Kor. 13:5; 1 Pet. 2:12) Abo mwingasungila fye ifipuna ni balya mwikala nabo ing’anda imo, abo mule-enda nabo mu motoka nelyo abo musambilisha Baibolo. Mulelangulukilako bambi, nga ca kuti muli no mwamfuli nelyo muli na kalitenti umwakwikala mufwile ukusala bwino ukwakubika. Mufwile ukuipusha ukuti: Bushe nga nabika apa, nshakulacinga bambi? Kukaba incende sha kwikalako isho bakapekanishisha abakoloci na balwalilila. Apo iyi ncende ikaba iinono, aba kusunga abakoloci nelyo abalwele, balingile ukuba fye umo nelyo babili.
Ukufwala Ifya Mucinshi: Ilyo tukalalongana, tukalefwala ifya kufwala ifyalinga kabili ifya mucinshi, tatufwile ukufwala nga abantu ba ku calo. (1 Tim. 2:9) Nga tulefwala bwino pa nshita iili yonse, tatwakaleumfwa insoni sha kufwala amabaji ya kulongana no kushimikilako bambi. Ukuba ne mimonekele ne mibele iisuma ilyo tukaba pa kulongana kwa citungu, takwakalenge fye abantu bakafwaye ukusambilila Baibolo iingalenga baisaba no mweo wa muyayaya lelo ikalenga na Yehova ukusekelela.—Sefa. 3:17.
Mulelangulukilako Bambi Ilyo Mulebomfya Ifya Kupangapanga: Tukalanga ukuti tulelangulukilako bambi ilyo tuli pa kulongana nga tulebika foni nelyo ifya kupapangapanga fimbi apa kuti te kuti fipumfyanye bambi. Nga mu kalabomfya kamera, ifya kukopelako vidio, tabuleti, nelyo ifya kupangapanga fimbi mwikalacinga bambi nelyo ukubapumfyanya. Tukalanga ukuti twalikwata imibele iisuma ilyo tuli pa kulongana nga tatuletumina bambi amameseji na pa shilingile.
Ica Kulya ca Kasuba: Twapapaata mukaleisa ne fya kulya ukucila ukulafuma pa cifulo ca kulonganinapo no kulaya mu kushita ifya kulya kumbi. Icipe ico mulesendelamo ifya kulya cifwile ukuba icalinga ica kutila kuti mwacibika apo mwikele nelyo mwi samba lya cipuna. Tamulingile ukuya mu cifulo ca kulonganinamo ne fipe ifya kusendelamo ifya kulya ifingatobeka. Nga mwashapo ifya kulya mufwile ukufisenda ku ng’anda pamo ne fisooso fyonse ifyo mukwete.
Ubupe: Ilyo tuli pa kulongana kwa citungu, kuti twalanga ukuti tulatasha pa mapekanyo ya uku kulongana nga tulesangwilako imisangulo ya kuitemenwa ku mulimo wa mwi sonde lyonse. Nga mwafwaya ukupeela ceke pa kulongana kwa citungu, mulingile ukulemba ukuti mwapeela “Watchtower Society.”
Umuti: Nga mwalikwata umuti uo badokota bamweba ukulabomfya, mukwai mukasende uyo muti pantu takwakabe ukupeela imiti ya musango uyo pa kulongana kwa citungu. Abalwala ubulwele bwa shuga tabalingile ukupoosa inyeleti babomfeshe mu ng’ungulu ishili pa cifulo ca kulonganinapo pantu kuti shacena bambi.
Ifya Kucilikila Amasanso: Mukwai mukabikeko amano ku kucilikila amasanso ayacitika pa mulandu wa kuipununa no kushelela. Cila mwaka kulaba ukuicena pa mulandu wa nsapato isho bamo bafwala, maka maka nga shitali. Kanshi kuti cawama ukufwala insapato ishalinga isha kuti nga mwafwala kuti mule-enda fye bwino. Abafyashi balingile ukusopa abana pa kuti tabaicenene nelyo ukuleta amasanso kuli bambi. E lyo kabili bafwile ukusalapula umwana wabo nga ca kuti umwana atendeka ukupumfyanya bambi.
Amapulemu no Tupuna: Nga mukalonganina pa nse kuti mwasenda pulemu nelyo utupuna twakwikalapo. Lelo nga mukalonganina mu cikuulwa nelyo pa nse kuti mwasenda utupuna twatunya nga ca kutila kuti mwatubika mupepi napo mukekala.
Amafuta ya Kuisansa: Tulingile ukulangulukilako bambi pa kubomfya amafuta ya kuisansa pa mubili pantu ukusansa ifi kuti kwalenga bambi abalwala amalwele pamo nga icifuba balwalilako.—1 Kor. 10:24.
Amaformu ya Mukwai Fwayeni Uyu Muntu (S-43): Formu ya Mukwai Fwayeni Uyu Muntu e yo twingabomfya pa kulemba ifyebo pa bantu abalefwaya ukusambilila abo twashimikiile mu bunte bwa mulyashi pa nshita ya kulongana kwa citungu. Nga mwalembapo pali formu kuti mwatwala ku Muputule wa Fitabo nelyo kuti mwapeela kalemba wa cilonganino cenu ilyo mwabwelela ku cilonganino.
Mu Fikuulwa fya Kuliilamo na pa Matuuka: Nga muli mu fikuulwa fya kuliilamo na pa matuuka mulingile ukuba ne mibele iisuma pa kuti bambi bakacindike ishina lya kwa Yehova. Muleba abatekanya kabili aba mucinshi ilyo muli mu motoka ya cintubwingi, ilyo muleensha motoka nelyo muleenda mu musebo. Mulingile ukufwala ifya kufwala ifyalinga ku Mwina Kristu.
Ulubatisho: Abalekopa ifikope tabafwile ukulalwila ukukopa abalebatishiwa. Kabili abana tabafwile ukulaangalila uko balebatishisha. Abaletamba ulubatisho tabafwile ukupalama sana kucishiba ca lubatisho kabili bafwile ukutamba abalebatishiwa mu mucinshi. Nga ca kuti abana balefwaya ukutambako, abafyashi nelyo abakalamba bambi bafwile ukubasopa.
Umulimo wa Kuitemenwa: Abalefwaya ukubombako kuti baya ku Dipartimenti ya Umulimo wa Kuitemenwa pa cifulo ca kulonganinapo. Abana abashilafika pa myaka 16 balingile ukubomba na bafyashi nelyo ababasunga nangu umukalamba umbi uo abafyashi nelyo abasunga uyo mwana basuminishe.