“Mube ne Myendele Iisuma mu Bena Fyalo”

1. Cinshi cicindamine ukuti tukakwate imibele isuma ilyo tukaba ku kulongana kwa citungu?

¹ Cila mwaka nga tulelongana, abantu abengi baleshiba ukuti Inte sha kwa Yehova balelongana. Kanshi calicindama ukuti tuleba ne mibele isuma iilangilila ifyo Lesa tupepa aba. (Lebi 20:26) Nga tuleba ne mibele iisuma e lyo no kulafwala ifya mucinshi, abantu bakeshiba ukuti tuli basambi ba kwa Kristu aba cine. Tukalanga shani ukuti twaliba ne “myendele iisuma mu bena fyalo” ilyo tukalalongana ukulongana kwa citungu no kulongana kwa bantu abakafuma ku fyalo fimbi pa kuti abantu bakacindike Shifwe wa mu muulu?—1 Pet. 2:12.

2. Finshi twingacita pa kulanga imibele ya Bwina Kristu ilyo tuli pa kulongana kwa citungu?

² Beni ne Mibele ya Bwina Kristu: Ifyo twatemwana ne fyo tucita “ku ba ku nse” fyalipusana sana ne ficita abantu abengi aba muli cino calo. (Kol. 3:10; 4:5; 2 Tim. 3:1-5) Kanshi tufwile ukuba ne cikuuku e lyo no kulanga ukutekanya mu fyo tulecita ku babombela pa mahotela na mu fifulo fyakuliilamo. Na kabili tukalanga ukuti twaliba ne mibele isuma nga twabapeelako akandalama akanono ku kubatasha pa milimo batubombela.

3. Bushe abafyashi balebacinkulako pali finshi kabili mulandu nshi?

³ Abafyashi bafwile ukusopa abana babo ilyo bali pa kulongana, mu ncende sha kuliilamo, na mu mahotela. (Amapi. 29:15) Umukalamba wa ncito pe hotela limo ilyakwata ne cifulo ca kuliilamo aebele munyinefwe umo no mwina mwakwe ati: “Twalimutemwa imwe mwe bantu. Indupwa shenu e lyo na bana benu baliba ne mibele iisuma e lyo ba mucinshi icine cine. Ababomfi bonse balelanda fye pa mibele yenu. Kuti twatemwa sana nga ca kuti cila mulungu muleisa mu kwikala pano.”

4. Mulandu nshi tulingile ukubikila amano ku fyo tukalafwala ilyo tukaba pa kulongana?

⁴ Ukufwala Ifya Mucinshi: Ilyo tukalalongana, tukalefwala ifya kufwala ifyalinga kabili ifya mucinshi, tatufwile ukufwala nga abantu ba ku calo. (1 Tim. 2:9) Te pa kulongana fye apo tufwile ukufwala ifya mucinshi iyo, lelo na ku mahotela uko tukalaikala e lyo na pa nshita ya kutuusha pene tulingile ukufwala bwino. Nga tatulefwala bwino pa nshita iili yonse, cikatwafya ukufwala amabaji ya kulongana. Lelo nga tulefwala bwino cikatwangukila ukushimikila nga twakwata ishuko lya kucita ifyo. Imimonekele yesu iisuma ilyo tukakwata ukulongana kwa citungu ukwa mu 2014 ikalenga abantu bakafwaye ukusambilila Baibolo no kwisakwata umweo wa muyayaya kabili ikasekesha Yehova.—Sefa. 3:17.

Ifya Kutucinkulako pa Kulongana kwa Citungu Ukwa mu 2014

◼ Inshita ya Kulongana: Apo mulonganina nga balakoma ifiibi, ninshi bakalaisula ifiibi ne nshita ya 07:00. Inshiku shonse shitatu, inyimbo shikalatendeka ukulila ulucelo ne nshita ya 08:20. Inyimbo nga shatendeka ukulila, bonse fye tulingile ukwikala mu fipuna fyesu pa kuti ukulongana kutendeke mu nshila ya mucinshi. Pa bushiku bwa kubalilapo no bwa cibili, ulwimbo lwa kulekeleshako ne pepo fikaba pa 15:55, e lyo pa bushiku bwalenga shitatu ukulongana kukapwa ne nshita ya 15:10.

◼ Ukulongana kwa Bakafuma mu Fyalo Ifingi: Ku ncende shimo kukaba ukulongana kwa bakafuma mu fyalo ifingi. Mukwai ishibeni ukuti pa kwita abakasangwa kuli uku kulongana, baitile fye abantu ukulingana ne mpendwa ya fipuna ifikaba pa cifulo ca kulonganinapo, e lyo ne mpendwa ya miputule umwa kufikila. E ico nga ca kutila bamunyinefwe abo ta baita ku kulongana kwa bakafuma mu fyalo ifingi nabo basangwako, kuti calenga abantu bafula sana ukucila ifyo iofeshi lya musambo lyapekenye. Kanshi nangu mwafilwa ukuyasangwa ku kulongana kwa citungu uko icilonganino cenu cilingile ukulongana, tamulingile ukuya ku kulongana kwa bakafuma mu fyalo ifingi.

◼ Ukwa Kwimika Bamotoka: Pa fifulo fyonse apo tukalonganina icitungu, takwakabe ukulipilisha apa kwimika imyotoka, lelo uwaisa fye bwangu ewa kupeela incende. Apo incende ya kwimikako imyotoka ikaba iinono, kuti cawama mwe bakwete imyotoka mwaumfwana ukunina muli motoka imo ukucila cila muntu asenda motoka yakwe. Mukwai mukalekonka ifyo bakalamweba ku bakalamusontelela ukwa kwimika imyotoka.

◼ Ukusungila Bambi Ifipuna: Nga baisula ifiibi ulucelo, twapapaata mwikalabutukila ukuya mu kufwaya apa kwikala ica kuti calamoneka kwati mulecimfyanya na bamunyinenwe. Umupashi wa kufwaya ukucitila bambi ifisuma e o abantu bamwenako ukuti tuli Bena Kristu ba cine, kabili ici cilenga balacindika Lesa. (Yoh. 13:34, 35; 1 Kor. 13:4, 5; 1 Pet. 2:12) Abo mwingasungila fye ifipuna ni balya mwikala nabo ing’anda imo, abo mule-enda nabo mu motoka nelyo abo musambilisha Baibolo. Kukaba incende sha kwikalako isho bakapekanishisha abakoloci na balwalilila. Apo iyi ncende ikaba iinono, aba kusunga abakoloci nelyo abalwele, balingile ukuba fye umo nelyo babili.

◼ Ica Kulya ca Kasuba: Twapapaata mukaleisa ne fya kulya ukucila ukulafuma pa cifulo ca kulonganinapo no kulaya mu kushita ifya kulya kumbi. Icipe ico mulesendelamo ifya kulya cifwile ukuba icalinga ica kutila kuti mwacibika na mwisamba lya cipuna. Tamulingile ukuya mu cifulo ca kulonganinamo ne fipe ifikalamba ifya kusendelamo ifya kulya nelyo ifipe ifingatobeka.

◼ Ubupe: Kuti twalanga ukuti tulatasha pa mapekanyo ya kulongana kwa citungu nga tulesangwilako imisangulo ya kuitemenwa ku mulimo wa mwi sonde lyonse ilyo tuli pa kulongana kwa citungu. Nga mwafwaya ukupeela ceke pa kulongana kwa citungu, mulingile ukulembapo ukuti mwapeela “Watch Tower Society.”

◼ Umuti: Nga mwalikwata umuti uo badokota bamweba ukulabomfya, mukwai mukasende uyo muti pantu takwakabe ukupeela imiti ya musango uyo pa kulongana kwa citungu. Abalwala ubulwele bwa shuga tabalingile ukupoosa inyeleti babomfeshe mu ng’ungulu pa cifulo ca kulonganinapo pantu kuti shacena bambi. Kanshi mulingile ukushisunga bwino no kuyapoosa ku ng’anda ku mwenu.

◼ Ifya Kucilikila Amasanso: Mukwai mukabikeko amano ku kucilikila amasanso ayacitika pa mulandu wa kuipununa no kushelela. Cila mwaka kulaba ukuicena pa mulandu wa nsapato isho bamo bafwala, maka maka nga shitali. Kanshi kuti cawama ukufwala insapato ishalinga isha kuti nga mwafwala kuti mule-enda fye bwino.

◼ Amafuta ya Kuisansa: Tulingile ukulangulukilako bambi pa kubomfya amafuta ya kuisansa pa mubili pantu ukusansa ifi kuti kwalenga bambi abalwala amalwele pamo nga icifuba balwalilako.—1 Kor. 10:24.

◼ Amaformu ya Kulondwelapo Abantu: Formu ya Mukwai Fwayeni Uyu Muntu (S-43) e yo twingabomfya pa kulemba ifyebo pa bantu abalefwaya ukusambilila abo twashimikiile ilyo kwali ukulongana kwa citungu. Nga mwalembapo pali formu kuti mwatwala ku Muputule wa Fitabo pa kuti ba itume nelyo kuti mwapeela kalemba wa cilonganino cenu ilyo mwabwelela ku cilonganino.

◼ Umulimo wa Kuitemenwa: Abalefwaya ukubombako kuti baya ku Dipartimenti ya Umulimo wa Kuitemenwa pa cifulo ca kulonganinapo. Abana abashilafika pa myaka 16 balingile ukubomba na bafyashi nelyo ababasunga nangu umukalamba umbi uo abafyashi nelyo abasunga uyo mwana basuminishe.