Mulepembela Yehova

1. Bushe umutwe wa kulongana kwa citungu uleti shani, kabili mulandu nshi uyu mutwe ubelele uwalinga?

¹ Esaya alembele ukuti: “Yehova ni Lesa wa bupingushi; balishuka bonse abamupembela.” (Esa. 30:18b) Kwaba amalyashi ayengi ayalembwa mu Baibolo ayalanda pa fyo Lesa apingwile abalwani bakwe no kulubula ababomfi bakwe aba cishinka. Cinshi amalyashi ya musango yo yafunda abapepa Yehova pali lelo? Finshi twingacita ino nshita pa kuti tuipekanye ku “bushiku bwa kwa Yehova, ubukulu kabili ubwa kutiinya”? (Yoele 2:31, 32) Ukulongana kwa Citungu ukukwete umutwe wa kuti “Ukulubuka Nakupalama!” kukalenga tukatontonkanye sana pali ifi fipusho no kuiceeceeta fwe bene. Kukatwafwa ukulapembela Yehova.

2. Bushe kuti twalanga shani ukuti tulatasha pa kutupekanishisha ukulongana kwa citungu?

² Bushe mwalipekanya ukusangwa ku kulongana inshiku shonse shitatu? Ku ca kumwenako, bushe mwalilanda na bamwingisha incito ukuti mulefwaya ukuba pa cuti pa kuti mukayesangwa ku kulongana? Mwilaenekela ukuti bakamusuminisha nga tamukoselepo. Pepeni. Nga mwapepa, kuti mwayaipusha. (Nehe. 2:4, 5) Kabili, tatufwile ukulashingilisha ukupekanya imyendele, ukufwaya ukwa kwikala, e lyo ne fintu fimbi ififwaikwa pa kulongana. Ukuiteyanya bwino nge fyo, kulangilila ukuti tulatasha Yehova pa kupekanya apekanya ukutuliisha ifya kulya fya ku mupashi. Baeluda bafwile ukubikako amano ku bengakabila ubwafwilisho pa kusangwa ku kulongana kwa citungu, no kucilisha abakalamba ababa mu cilonganino.—Gal. 6:10.

3. Mibele nshi iyo abantu ba kwa Yehova bafwile ukulangisha mu musumba balelonganina icitungu?

³ Imisango Isuma Ilacindika Lesa: Nga twalongana pamo abengi pa kulongana kwa citungu, imisango yesu iisuma ilashimiko bunte kuli bambi. Cinshi tufwile ukucita nga tulefwaya tushimiko bunte? Ilyo tuli pa cifulo tulelonganina, abantu tuleampana na bo bafwile ukumfwa bwino pa mulandu wa kuti tulelanga imibele ya Bwina Kristu, pamo nga ukushishimisha, icikuuku, ukuilama no mutembo. (Gal. 5:22, 23; Fil. 4:5) Ifwe bonse tufwile ukuba no kutemwa ‘ukushicita cishiyene, ukushiyifwaila ifya kuko, ukushikalifiwa.’ Nangu kwaimo ubwafya ubukalamba shani, tukafwaya ‘ukucita fyonse ku kucindika Lesa.’—1 Kor. 10:31; 13:5.

4. Bushe abafyashi kuti baafwa shani abana babo ukuba ne misango isuma iingaleta ilumbo kuli Yehova?

⁴ Ilyo ukulongana kwa citungu kumo kwapwile, umukalamba we hotela limo ashele aletontonkanya pa misango isuma ne mimonekele ya musepela, na pali ico atile kuti atemwa “Inte sha kwa Yehova ukulaikala lyonse pe hotela lyakwe.” Ala mukwai ico cintu caliweme! Icalengele ukuti ciwame fi ni co abafyashi balifundile abana kabili balebangalila. Te kuti ciwame abafyashi nga tabaleangalila abana babo pa cifulo bafikilile. Abana bafwile ukwangalilwa bwino lyonse. (Amapi. 29:15) Imisango yabo iisuma kuti yaleta ilumbo kuli Yehova no kulenga umutima wakwe ukusekelela!—Amapi. 27:11.

5. Kuti twacindika shani Yehova mu fyo tufwala ne fyo tuipempenkanya?

⁵ Ukufwala Ifya Mucinshi no Kuipempenkanya Bwino: Ifwe bonse kuti twalenga abantu balalanda ifisuma pa kulongana kwa citungu nga tulefwala ifya kufwala ifyalinga, nga tuleipempenkanya mu kulinga, nelyo nga tuli aba mucinshi, e lyo kabili tatufwile ukumoneka nga baleya mu kwangala. Tufwile ukufwala bwino ilyo tuleya ku musumba uo tulelonganinako icitungu na lintu tulebweluluka, ilyo twile ku kubomba pa cifulo ca kulonganinapo, na lintu tulelongana. Apo tuli babomfi ba kwa Lesa, ica ntanshi ico tufwile ukucindamika sana, lishina lya kwa Yehova, tatufwile ukubika sana amano ku fintu fya pa lwesu nelyo ifyo tutemenwe. Imitwe ya ndupwa balikwata umulimo wa kushininkisha ukuti ifyo aba mu ng’anda yabo balemoneka, filelangisha umucinshi na mano ayatuntulu inshita fye yonse.—1 Tim. 2:9.

6. Mulandu nshi tufwile ukulamonekela aba mucinshi nangu tatuli pa kulongana?

⁶ Nangu ni lintu tushili pa kulongana tuleisha fye, atemwa twile ku mashitolo, nelyo ku kuliila ifya kulya kwi tuuka bashitishisha ifya kulya, tufwile ukumoneka aba mucinshi. Nga ca kutila tuleya ku kuliila kumbi pa numa ya kulongana, kuti cawama ukufwala ifyo twacifwala pa kulongana. Nga natufwala baji iya citungu kuti twashimiko ubunte bwa mu lyashi.—2 Kor. 6:3, 4.

7. Bushe kuti twacita shani nga tulefwaya ukuti pa kulongana kwa citungu pabe umuyano ne nsansa? (Moneni “Ifya Kutucinkulako pa Kulongana kwa Citungu.”)

⁷ Esaya asobele ukuti: “Yehova akatwalilila ukulolela ukumupaala, kabili akema ku kumubelela uluse.” (Esa. 30:18a, NW) Nga tulatasha Yehova pa luse lwakwe ne cikuuku cakwe ica bupe fye tukalamucindika ku mibele yesu ne mimonekele yesu ilyo tukalongana pa kulongana kwa citungu. Shi lekeni Ukulongana kwa Citungu ukukwete umutwe uuleti “Ukulubuka Nakupalama!” kukacindike Lesa no kutwafwa ukumupembela!

[Akabokoshi pe bula 5]

Ifya Kutucinkulako pa Kulongana kwa Citungu

◼ Inshita ya Kulongana: Ukulongana kukalatendeka na 8:45 hours. inshiku shonse shitatu. (Ku Lusaka Assembly Hall, amageti yakalaisulwa ne nshita ya 7:00 hours) Nga kwashala amaminiti yanono ukutendeka ukulongana, ceyamani akekala pa cisebele ninshi inyimbo sha Bufumu ishikalatangilila ukulongana shilelila. Ifwe bonse tufwile ukwikala nga twamone fyo, pa kuti ukulongana kukaletendeka mu mucinshi. Ukulongana kukapwa ne nshita ya 16:15 hours pa Bushiku bwa Kubalilapo, pa Bushiku bwa Cibili kukapwa ne nshita ya 16:05 hours, e lyo pa Bushiku bwa Citatu kukapwa ne nshita ya 15:10 hours.

◼ Ukwa Kwimika Bamotoka ne Ncinga: Pa fifulo fyonse ifya kulonganinapo, takwakabe ukulipilisha ukwa kwimika bamotoka ne ncinga, lelo cila muntu akapeelwa apa kwimika incinga nelyo motoka ukulingana ne nshita afikilapo. Amabaji ya pa Kulongana kwa Citungu e lyo na kapepala ako bakalapeela e fikaba ifya kwishibilako.

◼ Ukusungila Bambi Ifipuna: Kuti mwasungila fye ifipuna abo muleenda na bo mu motoka nelyo abo mwikala na bo ing’anda imo.

◼ Ifya Kulya pa Kutuusha: Mukwai mukese ne fya kulya fyenu pa kuti mwikalafuma pa cifulo ca kulonganina ku kuya mu kufwaya ifya kulya pa nshita ya kutuusha. Kuti mwasendela ifya kulya mu cipe cinono icingekala mwi samba lya cipuna. Te kwesha ukwisa ne fipe fya kubikamo ifya kulya ifikalamba sana, nangu kwisa ne fipe fya makalashi, nangu kwisa no bwalwa apo tukalonganina.

◼ Ubupe: Pa kupekanya ukulongana kwa citungu indalama ishingi shilafwaikwa. Kuti twalanga ukuti tulatasha nga tulesangwilako imisangulo ya kuitemenwa ku mulimo wa mwi sonde lyonse pa Ng’anda ya Bufumu nelyo pa kulongana kwa citungu. Nga ca kutila mwasangwilako ceke pa kulongana mufwile ukulembapo ukuti ipeelwe ku “Watch Tower Society.”

◼ Amasanso ne Ficitika Ukwabulo Kwenekela: Nga ca kutila kwaba umuntu uwalwalisha ukwabula ukwenekela pa kulongana, mukwai ebeni kapyunga uuli mupepi, na o akeba dipartimenti ya First Aid pa kuti abaishiba ukundapa bese bamone ifyo ubulwele buli no kumwafwa.

◼ Ukukopa: Umusango fye onse uwa ca kukopelako ifyebo taufwile ukukulikilwa ku fisoselo nelyo ku malaita ya pa kulongana kabili ifi fipe fifwile ukubomfiwa mu musango wa kuti tafipumfyenye abantu bambi.

◼ Ukukopa Ifikope: Nga mulekope ifikope ilyo ukulongana kulecitwa, mukwai mwibomfya ilaita lya kubyasha ulubuto pa kukopa.

◼ Amapeja na Mafoni ya Kwenda na yo: Amafoni tayafwile ukupumfyanya bambi.

◼ Amafuta ya Kuisansa pa Mubili: Kuti twacita bwino nga tatubomfeshe sana ifya kusubasuba ifingalenga bambi abalwala icifuba ukulwala.—1 Kor. 10:24.

◼ Amaformu ya Kulondwelapo Abantu: Formu wa Twapaapaata Fwayeni Uyu Muntu (S-43) afwile ukubomfiwa pa kuti tupeele ifyebo pa bantu abalesekelela pa mulandu wa kubashimikila mu lyashi fye mu nshita ya kulongana kwa citungu. Bakasabankanya bafwile ukukwata formu imo nelyo yabili aya kulondwelapo abantu abalefwaya ukusambilila ilyo baleisa ku kulongana. Nga mwalembapo pali formu kuti mwatwala ku Muputule wa Fitabo pa kuti baitume nelyo kuti mwapeela kalemba wa cilonganino cenu ilyo mwabwelela ku cilonganino ku mwenu.—Moneni Ubutumikishi Bwesu Ubwa Bufumu ubwa February 2005, ibu. 7.

◼ Ulubatisho: Abaleya ku lubatisho balingile ukwikala pa cifulo babapekanishishe ilyo ukulongona kwa Bushiku bwa Cibili takulatendeka. Umo umo uulepekanya ukubatishiwa alingile ukuiletela ica kufwala ca kusaamwina icabamo mucinshi ne taulo. Kale bamo balefwala ifya kufwala ifishayana kabili calelenga camoneka kwati ulubatisho talwacindama. Baeluda abalepitulushamo abaleya ku lubatisho mu citabo ca Abaiteyanya Ukucita Ukufwaya kwa kwa Yehova balingile ukumona ukuti cila muntu aumfwikisha ifi fishinka. Ukuipeela uko umuntu alangisha apabuuta ukupitila mu lubatisho, kwa muntu umo umo pa lwakwe na Yehova. E ico, tacalinga ku baleya ku lubatisho ukukumbatana nelyo ukwikatana mu minwe ilyo balebatishiwa.

◼ Amashiwi ya Kutucenjesha: Cenjeleni ku fingamuletelela. Ilingi line, abapuupu na bantu bambi incenjeshi balashukila abantu nga bali ku fifulo fimbi. Shininkisheni ukuti motoka yenu atemwa incinga yenu nafikomwa inshita yonse, kabili mwisha icili conse mu motoka pa mbilibili pantu umupuupu kuti amwibila. Abapuupu batemwa ukuli ibumba ilikalamba. Te kuti ciwame ukusha ifipe ifili fyonse pa cipuna. Pantu te kuti mwishibe nga ca kuti onse untu mupalamene nankwe Mwina Kristu. Mwilenga bambi kutunkwa ukucita icibi. Twalyumfwa ulukumo pa bantu ba ku nse bamo abesha ukusembeleka abana banono ku kufwaya ukubeeba. SOPENI ABANA BENU INSHITA YONSE.