Bushe Kuti Twatala Twaumfwana Shani na Munyinefwe?

Elenganyeni ukuti muli mu Galili ninshi Yesu na o ali pano calo. Mwishile ku Yerusalemu mu kusefya Umutebeto wa Nsakwe. Abantu abengi sana bafumine ku ncende shalekanalekana kabili bali mu musumba mu kupepa Yehova. Apo mulefwaya ukutuula ilambo kuli Yehova, mwasenda imbushi no kutendeka ukupita mu tumisebo utunono umufulile abantu nga nshi ilyo muleya kwi tempele. Lilya mwafika pe tempele, mwasanga abantu abengi balefwaya nabo ukutuula amalambo. Pa numa ya kulolelako, inshita yenu iya kupeela bashimapepo imbushi mwishile nayo yafika. E lyo mwaibukisha ukuti munyinenwe uuli na cimo kuli imwe ali kumbi nampo ni mwi bumba nelyo mu musumba. Yesu alilondolwele ifyo mwingacita. (Belengeni Mateo 5:24.) Bushe imwe na munyinenwe uuli na cimo kuli imwe kuti mwacita shani pa kuti mube pa mutende nga filya Yesu asambilishe? Pa fitantikwe pe samba, congeni pa casuko calungama.

MUFWILE . . .

• ukulanda fye na munyinenwe nga mwamona ukuti pali umulandu wa cine cine uwa kufulilwapo

• ukwesha ukwafwa munyinenwe nga ca kuti mwamona ukuti alakuntukilwa fye bwangu nelyo na o nga alilengele mwakwata ubo bwafya

• ukukutikisha ilyo munyinenwe alelondolola ifyo aleumfwa, kabili nangu tamwishibe bwino ifyo alanda, lombeni ubwelelo pa fyo mwapusene nelyo pa fyo mwacitile ifyalengele omfwe ububi nangu ca kuti te fyo mwalefwaya ukucita

MUNYINENWE AFWILE . . .

• ukwebako bambi mu cilonganino ifyo mwapusene pa kuti bengaba ku lubali lwakwe

• ukumwebelapo no kulanda pali fyonse fye ifyalengele mupusane e lyo no kumupatikisha ukusumina ukuti mwalilufyenye

• ukumona ukuiicefya no kushipa kwenu pa kuti muitendekeleko ukulanshanya nankwe, e lyo no kumwelela ukufuma pa nshi ya mutima

Bushe Yesu asambilishe ukuti ukuba pa mutende na munyinefwe kwayampana shani no kupepa kwesu nangu ca kuti muno nshiku nga twaya mu kupepa tatutuula amalambo ya nama?