Kuti Mwacita Shani pa Kuti Mulesambililako ku Babombela Yehova pa Myaka Iingi?

Mu filonganino fyesu mwaliba bamunyinefwe na bankashi ababombela Yehova pa myaka iingi. Kanshi kuti twasambililako ku fyo batwalilila ukushintilila pali Yehova. Kuti twabeba ukuti batulondolweleko ifyo ifintu fyali kale mu cilonganino ca kwa Yehova, ne fyo Yehova alebafwa ukushipikisha amafya. Nalimo kuti twabetako na ku Mapepo ya Lupwa, no kubepusha ifyo babombela Yehova.

Nga ca kuti mwalibombela Yehova pa myaka iingi, muleitemenwa ukushimikilako abacaice pa fyo Yehova amwafwa. Yakobo na Yosefe balyebeleko abana babo ifyo Yehova abafwile. (Ukute. 48:21, 22; 50:24, 25) Na kabili Yehova aebele imitwe ya ndupwa ukulasambilisha abana babo pali fyonse ifyo abacitiile. (Amala. 4:9, 10; Amalu. 78:4-7) Na muno nshiku mwine, abafyashi e lyo na bambi mu cilonganino kuti bashimikilako abana kufyalwa pa fintu ifisuma ifyo Yehova acita mu cilonganino cakwe.

TAMBENI VIDIO ITILA BALITWALILILE UKUBA ABAIKATANA ILYO BABABINDILE, LYENA ASUKENI AMEPUSHO YAKONKAPO:

• Bushe umusambo wa ku Austria wa-afwilishe shani aba bwananyina mu fyalo fimo umo bashakwete ubuntungwa bwa kubila imbila nsuma no kulongana?

• Bushe aba bwananyina muli ifi fyalo bacitile shani pa kuti batwalilile ukuba ne citetekelo icakosa?

• Finshi fyalengele aba bwananyina bamo mu Romania bafume mu cilonganino ca kwa Yehova, kabili cali shani pa kuti babwele?

• Bushe ifyacitikile bamunyinefwe nafilenga icitetekelo cenu ukukoselako, kabili mulandu nshi?