Mulesambililako Kuli Bakasabankanya Abaishiba Ukusambilisha Bwino

Tulomfwa bwino sana ukuba na bakasabankanya abaishibisha ukusambilisha mu cilonganino. Bamo balibombela Yehova mu cishinka pa myaka iingi. E lyo bambi bena ni nomba line basambililile ifya kusambilisha bwino. Aba bakasabankanya balimona ifyo Yesu aletungulula icilonganino ca Bena Kristu muli shino inshiku sha kulekelesha ukupitila mu fyo umulimo wa kushimikila no kupanga abasambi ulelunduluka. (Mat. 28:19, 20) Pa mulandu wa kuti balashimikila, balipokelela “amaka yacila aya bantunse” ayabafwa ukushipikisha ilyo bali na mafya na lintu baleeshiwa. (2 Kor. 4:7) Kanshi kuti twasambililako ifingi kuli aba bakasabankanya. Na kuba, balatemwa sana ukusambilishako bambi ifyo baishiba. (Amalu. 71:18) E ico tulingile ukufwaya inshita ya kuba nabo pa kuti tulesambililako kuli bena. Nomba kuti twacita shani ifyo?

Ilyo Muleshimikila. Pa kuti bakasabankanya abapya nelyo abashaishibisha ukusambilisha baleshimikila bwino, balingile ukubasambilisha. Kuti basambililako ku fyo bakasabankanya abaishibisha ukusambilisha bacita ilyo baleshimikila. (Moneni icipande ca mu Ulupungu lwa kwa Kalinda ulwa February 15, 2015, icitila “Twalilileni Ukuba Abacincila mu Mulimo wa Kubila Imbila Nsuma,” mu paragrafu yalenga butatu pa ka mutwe akatila “Muleyafwa Abapya.”) Mwanonkelamo shani mu kubomba na bakasabankanya abaishibisha ukusambilisha?

Kuti mwaeba kasabankanya uwaishiba ukusambilisha bwino ukuti mukabombe nankwe mu mulimo. Nga ca kuti uyo kasabankanya alalwalilila, nalimo mu nshita mu nshita kuti muleya mu kutungulwila isambililo lyenu ku ng’anda ku mwakwe. Pa numa ye sambililo, kuti mwamwipusha nga pali ifyo acimona ifyo mwingabombelapo.

Mulekwatako Inshita ya Kuba Nabo: Mulekwatako inshita ya kuba pamo nabo pa kuti mukabeshibe bwino. Kuti mwalalikako umo ukuti akasangweko ilyo mukakwata amapepo ya lupwa pa kuti mu kamwipusheko ifipusho. Nga te kuti bese pa mulandu wa kuti bakalamba sana nelyo balwalilila kuti mwaya kwatila amapepo ya lupwa ku mwabo. Kuti mwabepusha ifyo basambilile icine. Bushe mapaalo nshi bakwata? Kulunduluka nshi bamona mu kuteyanya ku ncende mwikala? Bushe busuma nshi basanga mu kubombela Yehova?

Mufwile ukwishiba ukuti nabo te fyonse baishiba e lyo ne fya bupe bakwata na fyo filapusanapusana. (Rom. 12:6-8) Pa mulandu wa kuti bamo abakalamba tabakwata amaka sana, nalimo te kuti bakwate amaka ya kupoosa inshita iikalamba na ifwe. Na lyo line, kwaliba ifingi ifyo twingasambililako kuli bena pantu balibombela Yehova mu cishinka.