Ifingatwafwa Ukulabila Bwino Imbila Nsuma—Ukushimikila Abantu Abekala mu Mayanda Ayakwata Amakamera Nelyo Amaintakomu

ICO CACINDAMINA: Pa mulandu wa kuti bumpulamafunde bulefulilako fye mu calo, abantu balabika amakamera na maintakomu pa fiibi nelyo pa miinshi ya malinga ya mayanda yabo pa kuti balemona no kulanshanya na beshile pa mwabo. Nalimo kuti twaumfwa umwenso ukubila ku muntu uuletumona lelo uo tushilemona. Ifyo twalalandapo kuti fyatwafwa ukuba abashipa ilyo tulebila imbila nsuma kuli aba bantu.

IFYO MWINGACITA:

• Mwilamona kwati te kuti bakutike. Bamo abakwata amakamera na maintakomu pa mayanda balasumina ukukutika ku mbila nsuma

• Muleibukisha ukuti amakamera yamo yatendeka ukukopa ilyo mushilalisha ne ndibu, kabili umwine wa ng’anda kuti alemutamba no kumumfwa ilyo mushilafika na pa mwakwe

• Umwine wa ng’anda nga ayasuka, tendekeni ukulanda kwati fye mulemumona. Mulemwentula kabili mulelanda fye filya fine mucita pa kulanda no muntu uuli mupepi. Landeni ifyo mwacipekanya ukulanshanya nankwe. Nga ca kuti iyo ng’anda naikwata kamera, mulingile ukwimininako akatalamukila na kamera. Nga ca kuti umwine wa ng’anda taleyasuka, kabiyeni ukwabula ukulanda icili conse

• Muleibukisha ukuti nangu ca kuti namupwisha ukulanshanya, uo mwacilalanshanya nankwe alashala alemumona no kumfwa fyonse ifyo mulelanda