Ifingatwafwa Ukulashimikila Bwino—Ifya Kwasuka Abashilefwaya Ukubashimikila

Ico Tushifwile Ukulekela Ukushimikila: Tutile namwishiba ukuti kwalaba ubusanso ubukalamba ubwingepaya abantu nga tabafumine kuli iyo ncende. Nomba cilya mwaya mu kusoka umwina mupalamano wenu, atila takwete inshita ya kukutika ku fyo mulelanda. Bushe kuti mwa muleka fye ifyo fine? Kwena te kuti mu cite ifyo. Ifi fine e ficita na bantu abengi abo tushimikilako, balakaana ukukutika pantu tabaishiba ukuti imbila nsuma tubila kuti yalenga baisapusuka. Nalimo icilenga ni co bamo balakwata ifya kucita ifingi ilyo twabatandalila. (Mat. 24:37-39) E lyo limbi balyumfwapo fimo ifya bufi ifyalenga ukuti bapate Inte sha kwa Yehova. (Mat. 11:18, 19) Nalimo bamona kwati na ifwe twaba fye cimo cine ne mipepele ya bufi. (2 Pet. 2:1, 2) Kanshi umuntu nga atila talefwaya ukumushimikila, tatulingile ukusondwelela bwangu ukuti te kuti omfwe imbila nsuma.

Ifyo Mwingacita:

Ilyo mushilatendeka ukushimikila ku ng’anda ne ng’anda, muletala mwatontonkanya na pa fyo abantu bengamwasuka pa kuti mufilwe ukubashimikila e lyo mwatontonkanishisha libela ne fya kwasuka.
Abo muleshimikila nga balanda ifingalenga mwafilwa ukubashimikila, esheni ukutwalilila ukulanshanya nabo mu mucenjelo. Nalimo kuti mwabatasha pa fyo balanda. Ku ca kumwenako, nga batila balikwata uko bapepa, kuti mwatila: “Natemwa sana ukumusanga, na kuba na cilafwaisha ukusanga umuntu uwatemwa ifya kwa Lesa.” E lyo limo, ukubeba ukuti namwishiba ifyo baleyumfwa kuti kwalenga basumina ukutwalilila ukulanshanya nabo. Ku ca kumwenako, nga batila nabapamfiwa kuti mwatila: “Mukwai naumfwa. Lelo ilyo nshilaya ndefwaya ukumushilako ici.” E lyo cimbi icingamwafwa ukulanshanya na batila balikwata uko bapepa kubepusha icipusho. Kuti mwatila, “Natemwa ukumusanga, na cilafwaisha ukusanga umuntu uwatemwa ifya kwa Lesa. Lekeni imwipusheko, bushe mumfwa shani nga mwabelenga ubulayo bwaba mu Baibolo ubwa kuti Lesa akonaula ababifi bonse no kusha fye abalungama pe sonde? Bushe tamumfwa bwino?”
Mwilabapatikisha. Muleibukisha ukuti Yehova tapatikisha abantu ukumumfwila. (Amala. 30:19) Umuntu onse alingile ukuipingwila nga alefwaya ukulaumfwila Lesa nelyo iyo. (Gal. 6:5) Kanshi nga mwamona ukuti tabalefwaya ukukutika, kuti cawama mwabasha. Nga mwacita ifi ninshi mwalanga ukuti namubacindika kabili na ba Nte bambi nga babatandalila ku ntanshi, kuti basumina ukubashimikila.—1 Pet. 3:15.

Uno Mweshi Citeniko Ifi:

Nga mwafuma pa ng’anda apo umuntu acilanda fimo pa kuti mwimushimikila, lanshanyeni na bo mulebomba nabo ifyo mwaciba no kwasuka bwino uyo muntu.