‘Tulelanda Bwangu Ico Tukonkele!’
1 Bushe umwine ng’anda alitalamupumfyanyapo lintu mulelanda ifyo mwapekenye bwino na mashiwi ya kuti: “Cinshi mulefwaya? Landeni ico mukonkele!” Cinshi twingasambililako kuli ci?
2 Abantu abengi ilelo tabatekanya. Bafwaya ukutwishiba na cintu twendeele. Lintu baishiba ukuti twendele ukulanshanya na bo Baibolo, pambi kuti bakaana ukukutika. Ukubelenga Baibolo no kulanda pa fya ku mupashi tafyacindama mu bumi bwa bantu abengi. Ni shani fintu twingashinina abene mayanda ukuti bafwile ukupaatulako amaminiti yanono aya kulanda pa lyashi lya mu Baibolo na ifwe?
3 Cinshi Cibomba Bwino: Icacindama kulanga mwine ng’anda ukuti Baibolo yakwata inshila shingapwisha amafya ashingwanapo na yo kabili tufwile ukulande fyo mu mashiwi fye ayanono. Inshila sha kulandilamo ishibomba bwino shikwata icipusho ca kulungatika ica kulenga mwine ng’anda ukutontonkanya, ukukonkwapo ne lembo ilyasuka ico cipusho. Kuti mwaipakisha ukwesha imitubululo imo imo iikonkelepo. Yalembelwe ku kutwafwa ‘ukulanda bwangu ico tukonkele’ ilyo tulelenga mwine ng’anda afwaishe ukumfwa icine.
4 Mu cifulo umo abantu ilingi batila tabalefwaya, bepusheni icipusho cibakumine:
◼ “Ilyo umwaka wa 2000 ulepalama, bushe mulemona kwati ifintu fikawama nelyo iyo? [Lekeni basuke.] Baibolo yasobele ifintu fisakamika ifyo tulemona ilelo ne fikafumamo.” Belengeni 2 Timote 3:1, 2, 5 na Amapinda 2:21, 22.
◼ “Abengi muli cino calo balyangwako ku kusakamana ubumi. Bushe mwalishiba ukuti Lesa alaya ifyo akafumyapo umupwilapo ukulwala konse?” Belengeni Ukusokolola 21:3, 4.
◼ “Bushe mulatontonkanya ukuti uno mushi wesu kuti wawama nga ca kuti bonse abekala muno balekonka ifyaba mu Baibolo?” Belengeni Mateo 22:37-39.
5 Apantu umulimo wesu wa kushimikila imbila nsuma iya Bufumu, ilyo twaba ne shuko tufwile ukulanda pa fyo Ubufumu bukacita. Pambi kuti mwatila:
◼ “Bushe mwalishiba ukuti icitabo ca kale sana, Baibolo, casobele ukuti kukaba fye ubuteko bumo ubwa calo conse?” Belengeni Daniele 2:44.
◼ “Bushe mutontonkanya ukuti imibele kuti yaba shani nga ca kuti Yesu Kristu aleteka isonde?” Belengeni Ilumbo 72:7, 8.
6 Mu cifulo umo abantu bapepa, kuti mwabomfya inshila imo pali shi:
◼ “Abantu abengi balafyengwa pa kuba abaume nelyo abanakashi, pa kupepa kumbi, nelyo pa mulandu wa nkanda. Bushe muletontonkanya ukuti Lesa alasuminisha impatila ya musango yu?” Belengeni Imilimo 10:34, 35.
◼ “Twalishiba ukuti Yesu Kristu acitile ifipesha mano ifingi mu nshiku shakwe. Nga ca kuti mwamulombele ukucitako icipesha mano cimo fye na cimbi, cinshi mwingalomba?” Belengeni Amalumbo 72:12-14, 16.
7 Nga ca kuti mwine ng’anda aleshimunuka pa kwisula iciibi, kuti mwatendeka ukulanshanya ukupitila mu kusosa ukuti:
◼ “Abantu abengi ilelo balinaka ukumfwa pa lwa mafya. Bafwaya ukumfwa pa lwa fingapwisha aya mafya. Ukwabula no kutwishika e fyo caba na kuli imwe. Lelo ni kwi twingasanga icingapwisha amafya yesu?” Lekeni basuke. Belengeni 2 Timote 3:16, 17.
8 Esheniko: Ilingi, icipusho cayanguka kabili icipi e cikabilwa fye pa kulenga mwine ng’anda afwaye ukumfwa ku cine. Umwanakashi umo uushalefwaya icine alaalike bankashi babili mu mwakwe pa numa umo amwipwishe ukuti: “Bushe mwalibwishiba Ubufumu mupepela mwi Pepo lya We Shifwe?” Uyu mwanakashi alicincimushiwe kuli ico cipusho kabili asumine ukusambilila Baibolo. Nomba mubomfi waipeela uwa kwa Yehova!
9 Ilyo mulelanda na mwine ng’anda, mulelanda ifilefuma pa mutima. Muleba abafumaluka. Abantu ilingi kuti baangwako nga bashininkisha ukuti twalibapoosako amano cine cine.—Imil. 2:46, 47.
10 Umulimo wa kushimikila imbila nsuma te cintu cayanguka ilelo. Bamo abene mayanda balatunganya uuli onse bashishibe. Bambi baliba abapamfiwa kabili tabakwata inshita ya kukutika. Lelo, kuti twashininkisha ifyo kucili abengi abayana abo twingasanga. (Mat. 10:11) Kuti twabomba bwino ilyo tulebafwayafwaya nga ca kuti tatulelanda ifingi lelo ‘tulelanda bwangu ico tukonkele!’