Bushe Mwalilangapo Umuntu Ifya Kusambilila Umuku wa Kubalilapo Mwalanda Nankwe?
Nga twaipusha abo tusanga pa mayanda nga kuti batemwa ukusambilila Baibolo, bamo batila tabalefwaya nelyo ukuti balasambilila Baibolo ku macalici yabo. Bena kuti balemona kwati ifyo tusambilila Baibolo na bantu ni filya fine basambilila ku macalici yabo, lelo ico bashaishiba ca kuti nga basumina ukusambilila na ifwe Baibolo kuti baishiba ifintu ifingi. Kanshi ukucila fye ukubepusha nga kuti batemwa ukusambilila Baibolo, mulandu nshi te kuti mubalangilile fye ifyo tusambilila pa muku wa kubalilapo mwalanda nabo? Natulangilile: Filya fine umuntu uwaishiba ukwipika tapelela fye pa kulanda ukuti alishiba ukwipika, no kutila kasuba kamo akaleta ifyo epika, lelo alapeelako umuntu ifyo epike pa kuti asumine, e fyo na ifwe tulingile ukucita. Tatufwile ukupelela pa kweba umuntu ukuti tulasambilila Baibolo, lelo tufwile ukumulanga mu kwipifya palya pene fye! Moneni ifyo mwingacita ifi twalandapo mu mamineti fye ayanono, ukukonka ifyebo fyaba mu Ubutumikishi bwesu Ubwa Bufumu ubwa January 2006, pe bula 6.
“Bushe mutontonkanya ukuti kasuba kamo aya mashiwi yakafikilishiwa? [Belengeni Esaya 33:24, kabili lekeni basuke.] Lekeni imulange ifintu fimo ifisuma pali ili lyashi.” Peleni abo mulelanda nabo icitabo ca Bushe Cinshi Baibolo Isambilisha?, kabili balangeni paragrafu 22 pe bula 36. Belengeni icipusho icili pe samba kabili, ebeni abo mulelanda nabo ukuti basange icasuko ilyo mulebelenga paragrafu. Lyena bepusheni icipusho na kabili, no kukutika ifyo baleasuka. Belengeni nabo ilembo na limbi. Bepusheni icipusho ico mukesayasuka ilyo mukabatandalila umuku uukakonkapo, kabili panganeni ubushiku bumbi ilyo mukabwela. Ninshi apa pene mwatendeka ne sambililo lya Baibolo!