Ifingatwafwa Ukushimikila Bwino—Ukulanga Umuntu Ifyo Tusambilila Baibolo Ukubomfya Icitabo ca Ico Baibolo Isambilisha

Umulandu Cacindamina: Abantu abengi tabeshiba umo tulosha nga twabeba ukuti tulefwaya ukulasambilila nabo Baibolo pa mwabo ukwabula ukubalipilisha. Bamona kwati bafwile ukuba pe bumba lya balesambilila nelyo kwati abakulabasambilisha bakulabatumina fye ifya kubelenga. Mu nshita ya kubeba fye ukuti mulefwaya ukulabasambilisha, kuti cawama mwabalanga ifyo isambililo liba. Kuti mwabalanga ifyo isambililo lya Baibolo lyawama mu mamineti fye ayanono, e lyo limo ni pa mwinshi fye mwingabalangila.

Ifyo Mwingacita:

Nga mwailondolola, ipusheni umwine wa ng’anda nga alasakamikwa pa fyo ifintu fikaba ku ntanshi.
Landeni ukuti abantu abengi nabo balasakamikwa, kabili mulangeni ifyaba pa ifilimo mu citabo ca Ico Baibolo Isambilisha. Mulondolweleni ukuti muli ici citabo mwaliba amasambililo aya-anguka ukumfwa, ayalanga ifyo Baibolo isambilisha pa fyo ifintu fikaba ku ntanshi e lyo na malyashi yambi, kabili mwipusheni icipandwa ico atemwamo.
Mupeeleni icitabo kabili kabiyeni pa cipandwa ico asala. Mulondolweleni ukuti amepusho ayali pa ntendekelo ya cipandwa yalyasukwa mu maparagrafu ayali mu kati.
Ebeni umwine wa ng’anda ukubelenga paragrafu ya kubalilapo nga kuti akumanisha. Lyena belengeni icipusho muli iyo paragrafu, kabili lanshanyeni icasuko. Belengeni no kulanshanya amalembo ayaletungilila icishinka. Mulangeni ifyo mwashila pa cishinka mu citabo cenu.
Lanshanyeni paragrafu yakonkapo, nomba uno muku ebeni umwine wa ng’anda ukwasuka mu mashiwi yakwe.
Mutasheni, kabili lanshanyeni ilyo mukabwelelako pa kuti mukapwishe isambililo.
Nga cakabilwa, kuti mwamutambisha vidio pa jw.org/bem iyakwata umutwe uutila, Bushe Isambililo lya Baibolo Liba Shani?

Esheniko Ukucita Ifi:

Pepeni ukuti Yehova amwafwe ukusanga uwa kusambilila nankwe Baibolo.—Fil. 2:13.
Esheniko nangu fye umuku umo ilyo muleshimikila ukulanga umuntu ifyo tusambilila Baibolo ukubomfya icitabo ca Ico Baibolo isambilisha, nelyo ukumutambisha vidio iitila, Bushe Isambililo lya Baibolo Liba Shani?